Mwa Kwikadila na Būmi bwa Nsangaji Dyalelo
BINE, mu mafuku a kumeso ubwanya kukekala na būmi bwampikwa misanshi ya misongo, bununu, ne lufu! Shako, dyalelo būmi bukidi buyule makambakano ne bikoleja. Le i bika bibwanya kukukwasha wikale na būmi bwa nsangaji dyalelo? Mu Bible mudi buludiki bubwanya kukukwasha wikale na būmi bwa nsangaji ne kuloelelwa tamba’nka pano. Tala bidi bikoleja bimobimo bya mu būmi ne muswelo ukokeja kukukwasha Bible.
MUSWELO WA KUSANGELA BYODI NABYO
Madingi a mu Bible: “Mwikadilo wa būmi bwenu wikale wa kubulwa kusanswa lupeto, koku musangela bintu bidi’ko pano.”—Bahebelu 13:5.
Ntanda dyalelo itubeleñenyanga bintu bivule ne twaji bya kwitukoka. Inoko Bible unena’mba tubwanya ‘kusangela bintu bidi’ko pano.’ Namani?
Leka “kusanswa lupeto.” Bantu bonanga bukomo bwabo bwa ngitu, kisaka, bulunda, misoñanya, enka ne bulēme bwabo mwanda’tu wa “kusanswa lupeto.” (1 Temote 6:10) Bine bonanga bintu bya mvubu mpata! Ku mfulo muntu usenswe bupeta “kakekutapo.”—Musapudi 5:10.
Mona bantu na bulēme kupita’ko bintu. Shako bintu bya ku ngitu bidi na kamweno. Inoko bintu kebibwanyapo kwitusanswa nansha kwitufwija’ko; poso’nka bantu. Kupwana ne kwikala na “mulunda wa bine” kwitukwashanga twikale na nsangaji mu būmi.—Nkindi 17:17.
TUBWANYA KWIKALA NA BŪMI BWA NSANGAJI DYALELO SHI TULONDA BULUDIKI BWA MU BIBLE
MWA KULWILA NA MISONGO
Madingi a mu Bible: “Mutyima wa nsangaji i bwanga buyampe.”—Nkindi 17:22.
Pamo bwa “bwanga buyampe,” nsangaji ibwanya kwitukwasha tulwe na misongo. Ino le tubwanya kwikala na nsangaji namani kitatyi kyotubela?
Ikala na mutyima wa kufwija’ko. Shi tute mutyima’nka ku byamalwa byetu, “mafuku onso” akekala mabi. (Nkindi 15:15) Ino Bible unena’mba “ikalai na mutyima wa kufwija’ko.” (Bene Kolose 3:15) Wifunde kufwija’ko pa bintu biyampe mu būmi nansha shi i bityetye namani. Buya bwa kupona kwa dyuba, kaluvula kayampe, mimungomungo ya muntu otusenswe, i bintu bibwanya kwituletela nsangaji mu būmi.
Longela bakwenu bintu. Nansha shi tubela, “nsangaji ya kupāna itabukile ya kupebwa.” (Bilongwa 20:35) Shi bakwetu betufwija’ko pa byotulonga tusangalanga bininge, ne kino kitukwashanga twilwe makambakano etu. Būmi bwetu bubwanya kwikala biyampe shi tukwasha bakwetu bekale na būmi buyampe.
MWA KUNINGIJIJA BUSONGI
Madingi a mu Bible: “Mujingulule bintu bya mvubu mikatampe.”—Bene Fidipai 1:10.
Ba mulume ne mukaji bapityija kitatyi kityetye pamo, badi mu kyaka kya kwisonsoloka. Mu uno muswelo i biyampe balume ne bakaji batangidije busongi bwabo kumeso—kintu kya mvubu mpata mu būmi.
Longelai bintu pamo. Pa kyaba kya kulonga bintu wa byandi wa byandi, tūlai’ko mpangiko ya kulongela bintu pamo. Bible unena’mba, “babidi bapityile buya muntu umo.” (Musapudi 4:9) Mubwanya kutēka pamo, kwitamuna bidyoma, kutoma twa kutoma, ne kwipwija mukose.
Mwilombolei buswe. Bible ukankamika ba mulume ne mukaji besanswe ne kwilēmeka. (Bene Efisesa 5:28, 33) Kumungamunga, kwipamba bīpa na buswe ne kwipa tubyabuntu kubwanya kuningija busongi bininge. Na bubine bantu besongele, bafwaninwe kwinena binenwa bya bukena enka abo bene kete.—Bahebelu 13:4.