Misambo Ya Bulunda Ikokeja Kutenga Pa Mutyima

¹ Misambo ikokeja kushintululwa bu “kwishinta milangwe.” Kushilula misambo ya bulunda itala pa kishinte kisangaja muntu, kikokeja kusamuna milangwe yandi ne kwitukwasha tutenge mutyima wandi na musapu wa Bulopwe. Boba kebalale myaka mivule mu mwingilo banenanga’mba i kiyampe kushilula misambo ya bulunda na bantu ne na kitukijetyima kupita’ko kwisamba bila-bila.

² Muswelo wa Kushilula Misambo ya Bulunda: Kwikala na bwino bwa kwisamba na muntu kekishintululapo kutunga mulongo wa milangwe nansha wa mavese mhm. Ino kishintulula kumona pakwivwanina bitupu. Kimfwa, kitatyi kyotwisambanga na mulondakani netu twikalanga twingidija diwi ditūke na muneneno wa bulanda. Ketwikalangapo tulanguluka ku kishima kyotukengidija, ino twikalanga tulondolola bukidi-bukidi ku milangwe yaleta. Shi tute mutyima ku byanena, pakwabo ukasepelela kukashilula monka misambo ya uno muswelo. Kifwaninwe kwikala muswelo umo ne kitatyi kyotupāna musapu.

³ Bishinte pamo bwa bino, buñonaona, myanda itala bankasampe, myanda itala bipita mu ntanda yetu, myanda ipita kujokoloka ntanda yonso, ne kitatyi, bikokeja kukwasha mwanda wa tushilule misambo ya bulunda. Bishinte bitala pa būmi bwa bantu bwa difuku ne difuku i bifwaninwe nakampata mwanda wa kusamuna milangwe yabo. Shi tuwashilula misambo, tukokeja bityebitye kwiikupwila ku musapu wa Bulopwe.

⁴ Kwikala na misambo ya bulunda kekishintululapo’mba ketufwaninwepo kwiteakanya mhm. Kudi na mvubu. Inoko, kebiyampepo kwimika milangwe enka pa mwanda umo kete nansha kukwata ku mutwe kishinte kampanda, nabya tukakomenwa kulupwila misambo ku myanda isangaja besambi netu ne kwikala bafwaninwe. (Tala 1 Kodinda 9:​20-23.) Muswelo muyampe wa kwiteakanya i kutonga kishinte kimo nansha bibidi bya mu Bible, na kitungo kya kukokela misambo pa bino bishinte. Kubandaula myanda idi mu dibuku Kutoa Sababu kuketukwasha pakatampe.

⁵ Ngikadilo ya Mvubu Mwanda wa Kwikala na Misambo ya Bulunda: Kitatyi kyotwisamba na muntu kampanda, tufwaninwe kwikala ne kyanga ne pakubulwa budimbidimbi. Tusepo ne nsangaji biketukwasha tukalombole pakatampe ino ngikadilo. Bine tudi na musapu mulumbuluke kashā wa kupāna mu ino ntanda; kekukidipo kintu kikwabo nansha kimo kikokeja kukoka bantu bakubulwa budimbidimbi bakimba boloke. Shi bajingulule’mba kwibata mutyima kwetu kutononwanga na kyaka kyabinebine kyakusaka kwibasapwila myanda miyampe, pakwabo bakakunkwa ku mutyima baketwimvwane.​—⁠2 Kod. 2:⁠17.

⁶ Misambo ifwaninwe kwikala bu kitatyi kilumbuluke. Omwanda, tufwaninwe kwikala na kanye ne na manwa kitatyi kyotupāna musapu wa Bulopwe. (Ngat. 5:22; Kol. 4:⁠6) Tulongei bukomo bwa kushiya mwisambi netu na mulangwe muyampe potudi. Mu uno muswelo, nansha shi ketubwenyepo musunsa umbajinji kutenga mutyima wandi, padi uno muntu ukokeja kukatambula musunsa mukwabo Kamoni ukapita mwanda wa kwisamba nandi.

⁷ Pa kushilula misambo ya bulunda, kekilombengapo kukwata ku mutwe kishinte kyokesambila’po. I kusamuna bitupu milangwe ya muntu na kwisambila pa mwanda umutenga pa mutyima. Shi twiteakenye, tukekala na muswelo wa kushilula misambo ya bulunda na bantu bonso. Tulongei buninge bwa kutenga mityima ya bantu botutana na kwibasapwila mwanda muyampe obafwaninwe kwivwana: ke madyese akubulwa mfulo a Bulopwe kadi.​—⁠2 Pet. 3:⁠13.