Malondonolo Ku Bipangujo Byenu

◼ I milangwe’ka yotufwaninwe kwikala nayo kitatyi kyotutanga misāngo mu kupwila?

Kitatyi kivule, mu kifundwa kya Kiteba kya Mulami ne kya kitabo, i kilamibwe mwanda wa kutanga misāngo. Kino kishintulula’mba mutangi udi na kiselwa kikatampe mu bufundiji. Ufwaninwe kutanga mu muswelo ‘uleta buluji’ bwa myanda yatanga, mwanda wa bemvwaniki bemvwane ne batengwe pa mityima, bamone kwingidija’yo. (Neh. 8:⁠8) Omwanda mutangi ufwaninwe kwiteakanya biyampe. (1 Tem. 4:13; tala ne kifundwa 6 mu Manuel pour l’École) Tala pano myanda imo-imo ya kamweno mu butangi bulumbuluke bwa kumeso a bantu.

Kujadika Muneneno Mufwaninwe. Badikila kutonga bishima nansha misemwa yofwaninwe kukakokela’po milangwe mwanda wa kufikila pa kwivwanija kwabinebine.

Kutela Bishima Senene Mobinenenwanga. Kifwaninwe kutela nansha kutanga senene mwanda wa bemvwaniki bemvwane bishima bingidijibwe mu mabuku. Kimba mutangilo wa bishima byokuyukile nansha byobya byakubulwa kwingidijibwa divule na bantu, mu dibuku dishintulula bishima.

Kunena mu Muswelo Umvwanikwa ne na Buzanzamuke. Shi utanga na diwi ditunduke ne na buzanzamuke, ukasamuna kusepelela kwa bemvwaniki, ukalangula milangwe yabo ne kwibatonwena ku kilongwa.

Kutanga na Kyanga ne na Diwi dya mu Mīsambo. Muneneno muyampe utambanga ku kupelwa ludimi. Shi mutangi i mwiteakanye ne kupituluka’mo, ukapēlelwa kutanga ne butangi bwandi bukekala buyampe kuteja, kebukekalapo bwa nselelele, buleta mpungiji.​—⁠Hab. 2:⁠2.

Kusoma Byonso Bisonekelwe. Binenwa bidi kunshi kwa dyani ne myanda idi mu tuboko nansha mu tupango ikatangwa na diwi ditunduke, shi ibweja milangwe kampanda ku kipindi kitangwa. Poso’nka myanda ya kunyemena’ko, ilombola kulupwilwe myanda, yo keikatangwepo. Binenwa bidi kunshi kwa dyani bikatangilwa’nka pa kifuko palombwelwe kayukeno mu musāngo ne ukatanga namino’mba: “Kunshi kwa dyani kunena’mba . . . ” Pa kupwa kwikutanga, mutangi ukendelela na myanda yadi ishele ku musāngo.

Butangi bulumbuluke bwa kumeso a bantu bonso i umo wa miswelo ya ‘kufundija bakwetu balaminine byonso byetulaile’ Mufundiji wetu mukatampe.​—⁠Mat. 28:⁠20.