Malondololo Ku Bipangujo Byenu

◼ Kitatyi kyotutuma mukanda ku bantu boketutanangapo ku bīkalo byabo, i kika kyotufwaninwe kuta’ko mutyima?

Pamwanda wa buluji buvule, tumona bu kyenda kikoma kutāna bantu ku mobo abo. Basapudi bamo-bamo i bamone’mba muswelo muyampe i kwibatumina mikanda, kino kikokeja kulupula bipa bilumbuluke; inoko, kifwaninwe kuvuluja myanda imo-imo iketwepeja makambakano:

Ketwakingidijai adrese ya Sosiete. Kino kikaleta mulangwe wa’mba ino mikanda itambanga ku bilo byetu, kadi kikaleta makambakano ne kulengeja kujimija lupeto bitupu.

Tufwaninwe kutadija shi adrese ya yewa otutumina mukanda i misonekwe senene ne shi i mufutyilwe tembele ku poshita bibwane.

Ketwakituminai muntu mukanda kwampikwa kusoneka’po dyandi dijina.

Ketufwaninwepo kushiya mikanda ku bibelo.

Mikanda mīpi ikalanga milumbuluke. Pa kyaba kya kusoneka bila-bila, tutumei’mo trakte nansha dipepala.

Mikanda misonekwe ku mashini ipēlanga kutanga kadi idi na bulēme.

Kutuma mukanda kekukabalwapo bu kujokelamo kupya, poso shi enka kodi kala musapwile mwine muntu’wa.

Shi tusoneka mukanda wa kutumina muntu kemupwe kala kulombola kusepelela, tufwaninwe kumutumina adrese nansha nimero ya telefone kwabwanya kwitutana. Tushintululei ne mpangiko yetu ya kwifunda kwa Bible.

Tumwitei akatanwe ku kupwila kwa pa kipwilo, na kumuyukija biyampe adrese ne bitatyi.

Ketwakituminai bantu boketwatene’kopo shi ketudi bapwe kala kujokeja mwaba; pano ke yewa musapudi obapele’o ye ufwaninwe kukasapula’mo.