Malondololo ku Bipangujo Byenu

◼ Mwanda waka kifwaninwe kukosoka kitatyi kyotusapwila muntu na kumutumina mukanda?

Kusapwila muntu na kumutumina mukanda i muswelo muyukane tamba kalā wa kusapwila bantu myanda miyampe. Bimyanda byatambile panopano mu kipindi kampanda kya ntanda bibakosokeja bantu bavule, kebapele kufungula mukanda okebayukile mwine utumine’o. Maamvelope ambulwa kuyukana koatambile, akubulwa adelese ya kujokeja’ko malondololo, pavule kealeta moyo, nakampata shi i palembe ku makasa nansha amweka bu mayule bintu munda. Benē njibo babwanya kusumbula maamvelope a uno muswelo pakubulwa kwiafungula. Le tukalonga namani kutyina amba mikanda yotutuma yakasumbulwa uno muswelo?

Shi bikokejika, i kiyampe kusoneka mukanda ku mashini ne pa amvelope pene. Pa amvelope bafwaninwe kwandikwa dijina dya mwinē njibo. Ke biyampepo kulemba’po amba mukanda kudi “Yewa wikalanga mu ino njibo.” Kadi, lemba ne adelese kwakokeja kukutumina wandi mukanda. Shi utyina kumulombola yobe adelese, lemba’po dyobe dijina ne adelese ya ku Njibo ya Bulopwe. Kokatuma mukanda wakubulwa dijina. Kokolwa kulemba’po adelese ya bilo ya musambo.​—Tala Mwingilo Wetu wa Bulopwe wa Kweji 12, 1996 pa Malondololo ku Bipangujo Byenu.

Madingi makwabo pa kulondela atanwa mu dibuku Manuel pour l’École du ministère théocratique, paje 84-90. Buno bulombodi buketukwasha twingidije mikanda mobifwaninwe mu kwenda kufikila bakwetu na myanda miyampe.