Kunai Mu Bakwabo Lukulupilo Lwa Būmi Bwanyeke
1 Muntu i mukimbe miswelo mivule ya kuleñanya bununu ne ya kuvudija mafuku a būmi bwandi, abo bununu ne lufu kasha bibikala, kebidipo ngepukilo. Bine tufwijanga’ko Leza mpata pa kwitupa Bible witushintulwila mwanda waka bantu banunupa ne kufwa, ne muswelo ukatalulwa byamalwa bitamba ku bununu ne mukafundwilwa lufu! Buno bubinebine i bulombolwe mu muswelo ukulupija mu dibuku Buyuki Butwala ku Būmi Bwanyeke. Dino dibuku i dilondolole senene ku bipangujo bikoleja bitala pa būmi ne pa lufu, kadi ditwalanga milangwe ya mutangi mu kitatyi kikajokejibwa Paladisa.
2 Mu kweji 4 tukapāna dibuku Buyuki na kitungo kya kushilula bifundwa bya Bible bya ku mobo. (Mat. 28:19, 20) Kupwa tukalonga kujokela’mo kupya ku boba bonso balombola kusepelela musapu wa Bulopwe. Uno o muswelo otukokeja kukuna lukulupilo lwa būmi bwanyeke mu bakwetu. (Tet. 1:2) Pa kubwanya kino, ivwana madingi alonda’ko adi na bukwashi.
3 Kitatyi kyopempula muntu dibajinji, ukokeja kwipangula kino kipangujo:
◼ “Lelo kodi mwiipangule kisakilanga bantu kwikala na būmi bwa myaka mivulevule? [Muleke akulondolole.] Bene Buddha, bene Kidishitu, Bene Hindu, Bamizilma ne bakwabo bonso bakulupile amba kudi būmi kupwa kwa kufwa.” Pūtula dibuku Buyuki pa shapita 6, “Mwanda’ka Tununupanga ne Kufwa?,” ebiya tanga musāngo 3. Languluka nandi pa bisonekwa biletelwe’mo. Kupwa pituluka mu bipangujo bibidi bidi ku mfulo kwa musāngo, ipangula mwisambi nobe shi ukasa kuyuka malondololo. Shi waitabija, nankyo endelela na kwisambila pa misāngo ilonda’ko. Papo kubapu, ubashilula kifundwa! Shi bitupu, mushile dibuku ashale atange’dyo, ukwate ne mpangiko ya kumujokela’ko dipya, nakampata kupwa kwa difuku dimo nansha mafuku abidi, mwanda wa kubandaula malondololo.
4 Pokapempula muntu waitabije dibuku “Buyuki,” ukokeja kunena’mba:
◼ “Naiya tubandaule bipangujo bibidi bitala pa lufu byotwashile byambulwa kulondololwa.” Muvuluje bipangujo bine. Kupwa wisambile pa myanda idi mu shapita 6 munshi mwa kamutwe ka mwanda kanena’mba “Kitumba kya Lufu.” Mwendele ngikadilo yomudi’mo, ukokeja kwendelela na kifundwa nansha kwingidija kipangujo kyamfulo kidi ku mfulo kwa musāngo 7 mwanda wa kwala kyalwilo kya mīsambo ilonda’ko. Mwipei kilaeno kipotoloke. Mupe kakanda ka lwito, ne kumulombola mu kīpi mupityilanga kupwila kwa pa kipwilo. Mwite na nsangaji ku kupwila.
5 Mu mwingilo wa ku njibo ne njibo nansha mu busapudi bwa kiponka na ponka, ukokeja kushilula mīsambo namino:
◼ “Lelo kodi kala mwiipangule mukekadila būmi bwetu bwa kumeso ne mukekadila ntanda? [Muleke akulondolole.] Bible i mukongele mukekadila būmi bwa kumeso mu kishima kimo—Paladisa! Ushintululanga’mba ku ngalwilo, Leza wālongolwele kifuko kimo pano pantanda ke paladisa milumbuluke mwaātūdile ba mulume ne mukaji baāpangile. Bādi ba kuyuja bantu pano pantanda ponsololo, ne kwiyalamuna bityebitye ke paladisa. Tala moyādi ya kwikadila.” Pūtula dibuku Buyuki pa paje 8, tanga musāngo 9 munshi mwa kamutwe ka mwanda “Būmi mu Paladisa.” Kupwa wisambile pa myanda idi mu musāngo 10, tanga ne kisonekwa kiletelwe’mo, Isaya 55:10, 11. Mulombe mwisambile pa mukekadila būmi mu Paladisa ikajokejibwa ne kubandaula nandi musāngo 11-16. Nansha kadi mukankamike ashale etangile’o aye mwine, inoko mwipei nandi kilaeno kya kwiya kwisambila’po monka.
6 Shi powesambile nandi dibajinji kwashilwilepo nandi kifundwa, ukokeja kutompa kwikishilula mu kujokela’mo kupya namino amba:
◼ “Enka na motwānenene kala mu mīsambo yetu, mpango ya Leza i ya kusaka ntanda yonso yalamunwe ke paladisa. Pa kino, ivwana kipangujo, ‘Lelo būmi bukekala namani mu Paladisa?’ ” Pūtula dibuku Buyuki mu shapita 1, mwifundei musāngo 11-16 pa kamutwe ka mwanda “Būmi mu Paladisa Ikajokejibwa.” Kupwa mulombole kifwatulo kidi pa paje 4-5, mwipangule shi wabilanga kwikala na būmi mu ngikadilo milumbuluke uno muswelo. Kupwa tanga musemwa umbajinji udi mu musāngo 17 pa paje 10. Mungya ngikadilo yomudi’mo, ukokeja kwendeleja kifundwa nansha kunena’mba mu bupempudi bobe bukwabo ukashintulula kisakibwa kilombwa ku muntu mwanda wa akekale na būmi mu Paladisa ikajokejibwa. Mushile kakanda ka lwito, mushintulwile mpangiko ya kupwila, kupwa mwite na kyanga aye atanwe ku Njibo ya Bulopwe.
7 Dibuku Buyuki i kingidilwa kilumbuluke kya kuyukija nakyo bakwabo “būmi bwanyeke” bulaile Leza. Twendejei bifundwa bya Bible bya ku mobo, mwanda ko kwetu kukuna konso kotukunanga lukulupilo lukatampe lwitupele Leza “kayūkile kubepa.”