Twi Batyipe Kulonda Dishinda dya Yehova dya Būmi

¹ Kafula mpako kefudilwe nako ku Bitango “Dishinda dya Leza dya Būmi” lwadi lukwembo lotwatyipile ku kishinte kya mfulo. Lwadi lushilula na musapu unena’mba: “Batwe . . . tubaitabija na mutyima onso amba dishinda dya Leza dyo dishinda dya būmi ditabukile buya mashinda onso.” Vuluka myanda mikatampe ya luno lukwembo lotwaitabije amba “EYO!”

² Bine twi batyipe lukwembo lwa kwikala batōka ku meso a Yehova, pampikwa kiko kya ku ino ntanda. Tukendelela kutangidija kiswamutyima kya Leza kumeso mu būmi bwetu. Byotwingidija Bible, Kinenwa kyandi, bu kalombwe ketu, ketusapo kusāsukila ku lundyo nansha ku lunkuso, ino tukalombola amba dishinda dya Leza i ditabuke kulampe kwine mashinda a ino ntanda.

³ Ino ntanda i mifutulule dishinda dya Leza dya būmi, o mwanda yangula bipa bilula. (Yel. 10:23) Nanshi tufwaninwe kufundijibwa nyeke na Yehova, Mufundiji wetu Mukatakata, unena’mba: “Dine dino’di dyo dishinda, nangaimo.” (Is. 30:21) Dishinda dya Yehova dya būmi, disebelwe mu Bisonekwa, i dipite’byo buya mu myanda yonso. Shi tusaka kwidilonda biyampe, tufwaninwe kumwena kamweno mu bintu byonso bitufundija Yehova.

⁴ Bukatampe bwa Bufundiji bwa Yehova: Yehova witufundijanga kitungo kinekine kya būmi ne muswelo otukokeja kwingidija būmi bwetu senene. Witufundijanga ne mwa kulumbulwila būmi bwetu mu ñeni, mu mwikadilo ne kumushipiditu ne mwa kwikadila mu ndoe na banabetu, na kisaka ne na bantu netu. Witufundijanga’byo kupityila ku Bible, bilembwa byandi, ne ku bulongolodi bwandi.

⁵ Kupwila kwa pa kipwilo kudi na mvubu mikatampe mu uno mwanda. Kitatyi kyonso kyotutanwa ku kupwila konso kutano ne kulondolola’ko, tutambulanga bwino buvule bwa bu bengidi ba myanda miyampe, ne bufundiji bujalale bwitukwasha mu būmi bwetu bwa bwine Kidishitu. (2 Tem. 3:​16, 17) Mufundiji wetu Mukatakata witupanga monka bufundiji bwa kiteokratike ku kubungakana ne ku bitango. Nanshi twitungilei kitungo kya kuleka nansha dimo kubulwa kupwila nansha kitango kampanda shi bukomo bwa ngitu ne ngikadilo yotudi’mo kebitukankaja’po.

⁶ Shi ke pano, twendelelei nyeke kulonda dishinda dya Leza na kininga kyonso, nabya tukapa Yehova ntumbo ne kumwena’mo byabuyabuya byanyeke ne nyekeke!​—⁠Is. 48:⁠17.