Mwa Kwingidila Kisaka Kyonso Pamo Senene—Mu Mwingilo wa Busapudi
1 Lelo kudi kintu kikwabo kileta nsangaji ku mutyima kipityile kumona balume ne bakaji, bambutwile ne bana bengidila pamo senene mu mwingilo wa bwine Kidishitu, benda batumbija dijina dya Yehova ku meso a bantu bonso? (Mit. 148:12, 13) Bisaka byonso bifwaninwe kwikala na kibidiji kya kutambila mu busapudi kitatyi ne kitatyi. Lelo kyobe kisaka nakyo kitūngile’ko difuku dimo dya kutambila pamo mu busapudi yenga ne yenga? Shi i amo, nankyo bonso bayukile senene byobafwaninwe kuteakanya mwa kuputumina mu uno mwingilo.—Nk. 21:5a.
2 Kumeso kwa difuku dya kutambila mu busapudi na kisaka, mubulwepo kuteakanya’ko misapwilo yomukengidija mu mwingilo? Kupituluka’mo kyaba ne kyaba nako kudi na kamweno kakatampe, mwanda kulangulanga mushipiditu wabinebine wa kwingidila pamo senene mu kisaka. Bine, kebyo kunengela shi kisaka kikwete mwingilo wa busapudi makasa abidi ne shi bantu bonso badi’mo beteakanyanga’ko senene!
3 Mutadi wendakana umo wakatwele kisaka kimo mu mwingilo wa kupāna mapepala. Umo mu bana bana-bakaji watambile nandi mu busapudi bwa ku njibo ne njibo wamwipangula’mba: “Usa kusapula nami mu bula bwa nsaa inga?” Kupwa mwana mwana-mukaji wāmushintulwila’mba usa kadi kutambila mu mwingilo wa busapudi na shandi. Buno i bukamoni bulombola’mba aye ne shandi basangelanga kutambila pamo mu mwingilo. Uno o mushipiditu mulumbuluke kwikala nao mu kisaka!
4 Ba mu bisaka bimobimo babwanya abo bonso kwingila mwingilo wa bu pania mukwashi mu kweji umo pa mwaka. Nansha kwikala na muntu umo mu kisaka wingila lonso bu pania mukwashi, nansha kulomba mwingilo wa bu pania walonso. Shi kwikale kwilongolola kuyampe ne kwingidila pamo, nankyo bantu bonso ba mu kisaka babwanya kulundila’ko bupyasakane mu mwingilo wabo na kukwasha yewa wingila bupania. Bonso ba mu kisaka bakeselwa madyese abinebine ne kwimwena bintu biyampe bimonwanga mu mwingilo wa busapudi shi bekale kulundila’ko mwingilo wabo.—Mal. 3:10.
5 Kwingidila pamo senene mu mwingilo wa busapudi kuloejanga bumo ne bupyasakane bwa bisaka, kulupula bipa biyampe ne nsangaji mu mwingilo wa Yehova!—Enzankanya na Fidipai 2:1, 2.