Malondololo ku bipangujo byenu

◼ Le wi mwiteakanye ku myanda ya mu kitulumukila?

Mu ino myaka, “kitatyi ne myanda yampikwa kulaya bifikilanga bonso” kebyo kukolomwena bantu myanda ya bundapi bwa mu kitulumukila, pakwabo ne kuningilwa kwelwa mashi. (Mus. 9:​11, NW) Yehova witukwashanga mu miswelo mivule kupityila ku bulongolodi bwandi amba twikale beteakanye ku uno mwanda, ino usakanga netu tuvuye’mo kyetu kipindi. Kunshi’ku kudi mulongo wa bintu bya kukukwasha.

• Wilamije kitatyi kyonso kalata Instructions médicales/Pas de sang.

• Tadija biyampe shi bobe bana baselanga Carte d’identité.

• Pituluka mu myanda idi pa dyani dya ntentekelo dya Mwingilo Wetu wa Bulopwe wa Kweji 5, 1995, dilombola biyampe muswelo wa kwisamba na bamuñanga ne batyibi pangala pa bundapi bwa bobe bana.

• Pituluka mu bishinte bisambila pa myanda ya mashi ne pa malawa a kupingakena pa mashi. (Kifwa: Kiteba kya Mulami kya mu Falanse, kya 1 Kweji 10, 1994, paje 31; kya 1 Kweji 6, 1990, paje 30-31; kya 1 Kweji 3, 1989, paje 30-31; Réveillez-vous ! wa 8 Kweji 12, 1994, paje 23-27; wa 8 Kweji 8, 1993, paje 22-25; wa 22 Kweji 11, 1991, paje 10; ne dyani dya ntentekelo dya Mwingilo Wetu wa Bulopwe, wa Kweji 5, 1995 ne wa Kweji 5, 1994. Wibitūle pantu payampe mwa kunyemena’ko bukidibukidi.)

• Tyiba mbila na mutyima umo shi ukokeja kwitabija kusomekwa ku mashini anangija mashi panja pa umbidi nansha shi ukokeja kwitabija kundapwa na malawa matyangwe’mo mashi.

• Shi bibwanika, kumeso kwa kwenda ku lupitalo, yukija bidi bakulumpe nabo bamone muswelo wa kukukwasha ne kwimona na Komite Utala Myanda ya Bundapi shi bidi na mvubu. Shi i mwanuke mutyetye undapwa, lombola bakulumpe, nabo bayukije uno komite pakidi mema mu manwi.

Lombola patōka kupela kopelele mashi: Malapolo alombola amba batutu ne bakaka bavule belaijanga enka poso misongo ibakoma penepa kebalombola muñanga wibondapa amba kebasakilepo kwelwa mashi. Kino ke kyendele’mopo ku meso a bamuñanga, kadi kikutūlanga mu kyaka kya kwelwa mashi. Shi bamuñanga bayukile kala nkulupilo yobe, ne shi milangwe yobe i mimanine pa mikanda mishinye ilombola bintu byosaka, kikebakwasha bengile bya bukidibukidi, kadi divule kibapanga mashinda mavule a kundapa na malawa angi pampikwa kwelwa mashi.

Myanda ya bundapi bwa mu kitulumukila imwekanga pa kitatyi kyo-kyonso, divule i enka pokulangila nansha kulangila’mba ibwanya kukutana, nanshi alwila’ko kala kwiteakanya mwa kwikingila abe mwine ne bobe bana ku kwelwa mashi mu mijilo.​—⁠Nk. 16:20; 22:⁠3.