Ta Mutyima ku Kinenwa kya Yehova Difuku ne Difuku!
1 Difuku ne difuku ditūlanga lwitabijo lobe mu kyaka. Kepabulwe padi kudi muntu kampanda mwine ntanda omwiyukile nandi ukuzenzanga’nka kukuzenza amba mwende nandi kuntu kankenge. Mwadimu obe ukusakila utwele pa kaji, pakwabo i mukulumpe obe wa kaji ukusakila wingile nsaa mivulevule. Kadi ukokeja kwivwana bukomo bwa ngitu yobe bwenda buzoza. Eyo, matompo a uno muswelo akokeja kukutana kyaba kyo-kyonso, ino yuka’mba kudipo kasuku kobe. Yehova udi’ko wa kukupa tunangu twa kunekenya nato ano matompo. Muswelo umo wa kwifunda Kinenwa kya Yehova kitatyi ne kitatyi i kubandaula kisonekwa kya mu Bible ne nshintulwilo yakyo mu kabuku Tubandaulei Bisonekwa. Lelo nobe ukwete na makasa abidi ino mpangiko?
2 Bukwashi Budi’ko: Isaya 30:20 unena’mba Yehova i ‘Mufundiji Mwine Mukatampe’ obafwaninwe kwabija kudi bantu bandi. Ukupanga byonso bikusakila mwa kulwila na byaka bikutana mu lwitabijo lobe. Ukupanga’byo namani? Vese ulonda’po ushintulula’mba: “Matwi obe akevwana kinenwa kunyuma amba: Dine dino’di dyo dishinda, nangaimo.” Mu ino myaka, Yehova utumanga “kinenwa” kyandi pi na pi kupityila ku Bisonekwa ne mabuku alupula “umpika wabinebine.” (Mat. 24:45, NW) Mu bishinte bya Kiteba kya Mulami byotupwile kala kwifunda mudi tunangu tuvule tutenga ngikadilo yonso ya būmi bwa bwine Kidishitu. Kupituluka kopitulukanga mu myanda iletelwe mu kabuku Tubandaulei Bisonekwa kukupanga muswelo wa kuvudija kibīko kyobe kya buyuki bubwanya kukukwasha mpata mu kulwa na matompo a miswelo ne miswelo.—Is. 48:17.
3 Witūdile’ko Kitatyi kya Kubandaula’byo: Kaka umo inamwana wadi nyeke na mingilo mivule lubanga ne lubanga, inoko kadipo uleka kutanga ne kwisambila pa kisonekwa kya difuku ne pa nshintulwilo yakyo pamo na wandi mwana mwana-mulume pa kudya bidibwa bya lubanga. Bino binenwa ne milombelo byo byadi bishima bya kwishadika nabyo lubanga ne lubanga shi mwana kaenda ku masomo. Byadi bipa mwana bukomo bwa kukapela bansongwakaji badi bamuselembeja, ne kuleka kwikuja mu bimyanda bya kufwila ntanda, kadi wadi upāna bukamoni na kininga ku bana ba masomo bakwabo ne ku badimu bene. Nansha byaadi Kamoni bunka bwandi ku abo masomo, kadipo wimona nansha dimo amba udi kasuku.
4 Abija Yehova koku utala mu Kinenwa kyandi, ukakuludika ne kukwendeja biyampe. Shi ulonge namino, ukamumona bu muntu udi’ko binebine, mulunda nobe mukulupilwe. Nanshi wiubije mwadi difuku ne difuku! Tukusakila abe, ne bantu bakwabo midiyo na midiyo babandaula Kinenwa kya Leza difuku ne difuku pano pantanda ponso, mwikale kwimona’mba meso enu i ‘meso amona wenu Mufundiji Mwine Mukatampe.’