Mpangiko ya Kisaka—Kisonekwa kya Difuku
1 Bambutwile ba buswe baloñanga bukomo difuku ne difuku mwanda wa kudisha babo bana. Ino kwibapa bidibwa bya ku mushipiditu bidi mu Kinenwa kya Leza ko kwine kwa mvubu kutabuka. (Mat. 4:4) Muswelo umo wa kukwasha benu bana batamije ndyoko miyampe ya ku mushipiditu ne ‘batamine konka ku lupandilo’ i na kwitūdila’ko kitatyi kya kubandaula difuku ne difuku pamo na kisaka kisonekwa kya difuku ne nshintulwilo yakyo. (1 Pet. 2:2) Le i kitatyi’ka kyomukokeja kutweja’kyo mu mpangiko yenu ya kisaka?
2 Pa Nsaa ya Kudya: Kushilula difuku na mīsambo ya kisonekwa kukokeja kukwasha kisaka kyenu kulangulukila padi Yehova difuku dituntulu. (Mit. 16:8) Lolo umo wākwete mbila ya kutanga ne kwisambila pa kisonekwa ne nshintulwilo yakyo na wandi pobādi badya bidibwa bya lubanga, kupwa balombela kumeso kwa mwana kwenda ku masomo. Kino kyādi kikomeja mwana aleke kwikuja mu bimyanda bya kufwila muzo, akomene matompo a kulonga busekese, ne amone kusapwila bakwabo ne badimu na bukankamane. Nansha byaadi Kamoni bunka ku masomo, kadipo wimona amba udi kasuku.
3 Shi i bikomo kwisambila pa kisonekwa lubanga, mubwanya kubandaula’kyo nsaa mikwabo mu difuku pamo ne kisaka, pakwabo kitatyi kyomudya bidibwa bya kyolwa. Bamo nabo, pa kitatyi kya uno muswelo, besambilanga pa myanda yobadi abemwena mu mwingilo wa budimi ne mikwabo yobadi abatange mu Bible. Bavule bavulukanga na kuloelelwa bino bitatyi bya pa kudya amba byobyādi bitatyi bisangaja mpata mu kisaka.
4 Bufuku: Bisaka bimo bisangelanga kubandaula kisonekwa kya difuku kumeso’tu kwa kukalala. Kino nakyo kikokeja kwikala kitatyi kilumbuluke kya kulombela banwe bonso pamo. Bana benu pobemvwana difuku ne difuku mwisambila padi Yehova ne kumulomba, nabo bakamumona amba i muntu udi’ko bine.
5 Nanshi Yehova emwesele pomulonga bukomo bwa kukuna bubinebine mu benu bana na kwingidija biyampe Tubandaulei Bisonekwa Difuku ne Difuku.