I Bika Bibwanya Kwitukwasha Twikale Bemanije mu Lwitabijo?
1 Tamba twilunga ku bulongolodi bwa Yehova, kwendelela kwetu kwa kumushipiditu kyo kintu kituletelanga nsangaji! Ino tufwaninwe kwendelela na kutamina’ko kumushipiditu mwa kwikadila ‘bajīke miji, bashimikwe, bashimatyije mu lwitabijo.’ (Kol. 2:6, 7) Nansha bavule byobenda batama kumushipiditu, ino bamo badi mu kweja mwanda ‘kebemanijepo mu lwitabijo.’ (1 Kod. 16:13) Twilamei, shi bitupu, kiketufikila ne batwe. Kwilama namani?
2 Mingilo ya Kumushipiditu ya Kitatyi Kyonso: Ikala na būmi bwa kumushipiditu buyampe mu bulongolodi bwa Yehova. Ye mobetupa bisakibwa byetu bya kumushipiditu bivulevule. Kupwila kwa pa kipwilo, kubungakana, ne bitango, bitusombelanga nyeke ku kutamina’ko ne ku kushimatyija kumushipiditu. (Bah. 10:24, 25) Kwibidila kutanga Bible ne mapepala Kiteba kya Mulami ne Réveillez-vous ! kutentekela’po ne mabuku esambila pa bidibwa bikomokomo bidi mu Kinenwa kya Leza kukalengeja miji yetu ya kumushipiditu kutwela’yo palampe ne kuninga’yo. (Bah. 5:14) Kwitungila bitungo bya kumushipiditu wa byandi wa byandi ne kwielela’ko kufikila’po kuketumwesha byabuyabuya byaendaenda.—Fid. 3:16.
3 Kukwashibwa na Boba Ke Bapye: Kimba kupwana na boba ke bapye kumushipiditu badi mu kipwilo. Anza kwiyuka na bakulumpe, mwanda abo bo bene babwanya nakampata kwituningisha. (1 Tes. 2:11, 12) Tambula madingi onso ne misoñanya yonso yobakupa. (Ef. 4:11-16) Ne bengidi ba mingilo nabo batele mutyima konka ku kukwasha bakwabo amba nabo bekale bemanije mu lwitabijo, nanshi nyemena ku bano batutu shi usaka kukankamikwa.
4 Lelo usaka ba kukukwasha mu busapudi? Wisambe na bakulumpe, wibalombe bukwashi. Babwanya kukutūla mu mpangiko ya Bapania Bakwasha Bakwabo. Le ukidi mupya wabatyijibwe panopano? Kwifunda dibuku Huduma Yetu ne kwingidija myanda idi’mo kukakutamija kumushipiditu. Lelo wi mbutwile? Endelela na kukwatakanya būmi bwa kumushipiditu bwa bobe bana.—Ef. 6:4.
5 Shi binebine twikale bajīke miji, bashimatyije mu lwitabijo, nankyo tubapwana bulunda na Yehova ne kuloeja kisense na banabetu. Kino kiketupa bukomo bwa kwikala nyeke bemanije nansha shi tubatambwe na Satana, ebiya kadi kikakomeja lukulupilo lwetu mwa kukamwena būmi bwa nyeke ne nyeke bwitutengele kumeso’ku.—1 Pet. 5:9, 10.