Bukwashi bwa Pabwipi Ponka
1. Muntu ubwanya kuzoza namani ku mushipiditu?
1 Ana, kaka udi na mulume wampikwa kwitabija udi na twaji tuvule twa kwingila, kadi ulwanga pa kutanwa ku kupwila kwa Bwine Kidishitu nyeke, pa kutambila mu mwingilo, ne pa kwifunda Kinenwa kya Leza. Bine uswele Yehova, inoko’ko pano kakingilanga. Na bya dyese, bakulumpe abaiya kumukwasha ku mushipiditu.
2. Le Bene Kidishitu bonso bakokeja kuleta namani bukwashi bwa pabwipi ponka?
2 Kwitabija bukwashi bwitupebwa kupityila ku kipwilo kya Bwine Kidishitu i kilomboji kilombola amba twiubijanga mudi Yehova. Bakulumpe beulanga buswe bwa Yesu Kidishitu pobakimba mukenga wa kukankamika ne kukwasha bonso batanwa na makambakano a ku mushipiditu. (1 Tes. 5:14) Divule dine, padi muntu usakilwa’tu kukankamikwa kwa buswe kwimanine pa bisonekwa bikulupija. Bine, kwielela’ko kukwasha boba bazoza kitatyi kampanda i mwanda utala Bene Kidishitu bonsololo, ke enkapo bakulumpe kete, ehe. Ne kutatana kwine mpika, batwe bonso tukomejibwanga na “kinenwa kinenwa pafwaninwe.”—Nk. 25:11; Is. 35:3, 4.
3, 4. Pa kukwasha bakwetu, tufwaninwe kulonga bika ne bika, ne tukalonga’byo namani?
3 Alwila’ko: Kuta mutyima na buswe boba basakilwa bukwashi kulomba kwalwila’ko kwikala na mutyima wa lusalusa ne kanye. Yonafane wāyukile amba Davida udi mu ngikadilo ya bulanda, penepa “wataluka waenda kudi Davida mu mityi’mwa, ne kumukankamika.” (1 Sam. 23:15, 16) Nobe lumba bakwenu na kanye. Binenwa bilupuka ku mutyima wa binebine bilupulanga bipa biyampe. Ne kadi, Yesu wālombwele amba bukomo ne kininga bikokeja kwaluja tutu nansha kaka ku mushipiditu. (Luka 15:4) Nanshi shi tudi na mutyima wa kukwasha muntu, tukendelela na kulonga bukomo bonso nansha shi kwendelela kwandi ke kwiyapo bukidi.
4 Bine, i kya nsangaji shi tubaalwila’ko kwita bakwetu, kimfwa boba ba mu kisumpi kyetu kya kifundwa kya kitabo, twende nabo mu busapudi! Potukwasha bengidi netu ba Yehova kutambila mu mwingilo, twibapanga mukenga ne kwibakomeja balonge bivule. Bino bitatyi bya nsangaji byotupityija mu mwingilo wa Yehova byo bikwasha nakampata bakwetu bekale na bujalale bwa ku mushipiditu.
5. Bakulumpe bakokeja kukwasha mu ngikadilo’ka imoimo?
5 Mpangiko ya Buswe: Boba ke beje kutambila mu busapudi mpika nansha boba bakilunga na kipwilo bafwaninwe kukwashibwa mu kutamija lwitabijo lwabo. Kifundwa kya Bible mu dibuku pamo bwa Tōta Leza Umo Kete wa Bine, Approchez-vous de Jéhovah, ne Lelo I Bika Bine Bifundija Bible? kikokeja kwibakwasha. Mwanetu’wa byadi kala mubatyijibwe, kifundwa kekikalombepo kulāla mafuku myeji mivulevule. Komite wa Mingilo wa pa kipwilo ufwaninwe kutala i ani ukokeja kumwena mu ino mpangiko.—Tala Mwingilo Wetu wa Bulopwe wa Kweji 11, 1998 ne wa Kweji 11, 2000 mu Malondololo ku Bipangujo Byenu.
6. Le kaka umo wakwashibwe namani ekale monka mukomo ku mushipiditu?
6 Ana, otwatelanga kala, wafwijije’ko bakulumpe pa kumupa kaka mupye ku mushipiditu efunde nandi kifundwa kya Bible. Misunsa’tu iná yobefundile yamukweshe afwene monka kudi Yehova. Washilwile kutanwa monka ku kupwila kwa pa kipwilo ne kwikala na mutyima wa kutendela Leza ku meso a bantu bonso. Uno kaka mupye wamukweshe kadi mu mwingilo wa busapudi na kwenda nandi mu bifundwa byandi bya Bible kufika ne paabwenye nandi kusapula ku kibelo ne kibelo. Bine, bukwashi buno bo bwadi bumusakilwa amba ashilule dipya!
7. I byabuyabuya’ka bimwenwa mu kukomeja bakwetu ku mushipiditu?
7 Kukomeja boba basakilwa bukwashi kuletelanga bonso madyese. Ukwashibwa usangelanga kufwena kadi monka kudi Yehova ne kushilula kwingidila pamo na bulongolodi Bwandi. Bakulumpe nabo baloelelwanga pa kumona kwendelela kwa ku mushipiditu. (Luka 15:5, 6) Kipwilo kyonso kikutanga umbumo mwanda bonso betele mutyima. (Kol. 3:12-14) Bine, tufwaninwe nanshi kwiula Yehova, udi na bukwashi bwa pabwipi ponka!—Ef. 5:1, BB.