Vuluka Kujokela’ko!

¹ “Tubesambe nandi biyampe kashā! Bine’nka mvuluke kukamupempula’ko monka.” Lelo kasha kwanene bino bishima, kupwa wailwa’nka ne kwine kushikatanga muntu’wa? Shi wilwanga’ko, nankyo yuka’mba muswelo umo kete okokeja kuvuluka kujokela’ko i kulemba.

² Lemba Myanda Yonso: Pokwaidilwe milangwe yomwadi mwisamba na muntu, po pa kulemba myanda yonso ya mvubu ya kukukwasha mu bupempudi bukwabo. Lemba dijina dyandi, ne tuyukeno twa kumujiudila’po. Lemba adelese yandi, ino kokafwatakanya’yo ku mutwe bitupu​—⁠tadija biyampe shi byonso byolemba i byabine. Lemba mwanda omwadi mwisambila’po, kisonekwa kyomwatangile, ne dibuku dyowamushidile.

³ Shi kudi kipangujo kyomulaile amba usa kwiya kulondolola’kyo posaka kwiya’ko dikwabo, lemba’kyo. Lelo kudi kintu kampanda kyowajingulwile pa uno muntu, pa kisaka kyabo nansha pa mutōtelo wabo? Shi kidi’ko, lemba’kyo. Pa kukamupempula’ko dikwabo, i biyampe kwikitela. Kuno kwikitela kulombola’mba umutele mutyima byabinebine. Ku mfulo, lemba difuku ne nsaa yomwetene dibajinji, ne kyaba kyowamulaile amba nsa kwiya kukutala dikwabo. Kulemba uno muswelo kukakuvuluja biyampe, ne kadi kukelwapo bilaeno byobe bya kujoka kukatala bantu.​—⁠1 Tem. 1:⁠12.

⁴ Shi ubapu kulemba namino, tūla papye’o pamo na bintu byoingidijanga mu busapudi​—⁠sakoshi, Bible, dibuku Kutoa Sababu, ne mikanda mikwabo​—⁠mwa kukulumwina’ye bukidi. I biyampe kulemba bantu botana kutupu pa kapapye ka bilembwa bya ku njibo ne njibo, ke pa tupapyepo tolemba’po kujokela’mo kupya. Eyo, monso mowakalembela myanda itala muntu wa kupempula i biyampe, ino kikatampe kine kisakwa i kuvuluka kujokela’ko!

⁵ Ela Milafwe ku Muntu’wa: Kitatyi kyowiteakanya mwa kutambila mu mwingilo, pituluka bidi mu myanda ya kujokela’mo kupya yolembele. Ela milafwe ku muntu ne muntu, yuka ne binenwa bya muneñenya byokashilula nabyo mu bupempudi bobe bupya. Langa muswelo wa kutamija kusepelela kwa muntu afike ku kwitabija kifundwa kya Bible. Byodi mwingidi wa myanda miyampe, kukwata ino milangwe kukokeja kukulupwila bipa bivule ne nsangaji pa mulongo.​—⁠Nk. 21:5a.

⁶ Shi ke pano, kyaba kikwabo kyokatana muntu ukuteja biyampe, kokalanga’mba usa kukavuluka kujokela’ko. Ino abe lemba, bandaula myanda yolembele, ela milafwe kwadi, kupwa vuluka kujokela’ko!