Tulumbululei Manwa Etu mu Mwingilo—Na Kusoneka Boba Basangela Musapu

“Kyaba kyonso wite mutyima abe mwine ne bufundiji bobe.” (1 Tm. 4:16) Ano madingi a ku bukomo bwa mushipiditu ātumine mutumibwa Polo kudi Temote, alombola amba twikale bapya nansha ke tudi beje tufwaninwe kulonga bukomo bwa kutama. Pa kusaka tufikile’po, kudi bishinte bipya bisa kulupuka mu Mwingilo Wetu wa Bulopwe bikekala na mutwe wa mwanda unena’mba “Tulumbululei Manwa Etu mu Mwingilo.” Kishinte ne kishinte kikesambila pa manwa a mvubu, kadi kikalombola ne milangwe kampanda ya mwa kwiatamijija. Mu bula bwa kweji, basapudi bonso i bakankamikwe kuta mutyima mpata ku ano manwa. Ino shi kweji wapu, kipindi kimo kya ku Kupwila kwa Mingilo kiketupa mukenga wa kushintulula byabuyabuya byotwemwenine mu kwingidija bininge ano manwa. Uno kweji twi bakankamikwe kulonga bukomo bwa kusoneka boba basangela musapu.

Mvubu Idi mu Kusoneka: Pa kusaka amba tuvuije mwingilo wetu, bitulomba kulonga bivule, ke enkapo kusapula kete. Tufwaninwe kujokela boba balombola kusangela ne kwibafundija, ke kusangila nkunwa ya bubinebine yotukunine kadi. (Mat. 28:19, 20; 1 Ko. 3:6-9) Kulonga namino kulomba kukamona muntu’wa monka, kwisambila nandi pa myanda yatele’ko mutyima, ne kutamija mīsambo yetu mibajinji. O mwanda, shi tubatana muntu usangela musapu i biyampe kusoneka.

Mwa Kulongela:

• Ufwaninwe kujingulula’amba mu sakoshi obe wa busapudi mudi bingidilwa bya kulemba’po boba basangela musapu. Lama senene byobya byosonekele, wibitūle mu ndudi, ne kulemba’mo kitatyi ne kitatyi. Soneka ponso popwa kulonga kujokela’mo.

• Lemba myanda itala muntu omwisamba nandi. Le ubulwe’po kusoneka dyandi dijina, kuyuka mwa kumutanina, pamo bwa adelese yandi, nimelo yandi ya telefone nansha adelese yandi ya Entelenete? Le i bintu’ka byowamona kwadi aye ne kisaka kyandi bikokeja kwisambilwa’po?

• Soneka kanda ne kanda ka byomwesambanga. I bisonekwa’ka byomwatañanga? Le wanenanga bika pa bitala nkulupilo yandi? Le i dibuku’ka dyowamushilanga? Soneka kitatyi, difuku dyomwesamba nandi, ne difuku dyo musa kwimona monka.

• Soneka byopangikile kulonga kitatyi kikwabo. Le i mwanda’ka omulaile kukesambila’po? Le wi mumulaye kumujokela difuku’ka?

• Kitatyi kyonso kyojokela muntu, soneka. Shi usaka kusonekela’ko myanda mikwabo, soneka kebibipo.

Tompa Kulonga Namino uno Kweji:

• Shi kosoneka, lombola’mo boba bosapula nabo bine byosoneka.