Nkunwa pa Kutama Ifwaninwe Kusangilwa Mema
1. Le ibika bifwaninwe kusangilwa mema pa kusaka bitame?
1 Pa kusaka nkunwa ikuninwe mu budimi itame ifwaninwe kusangilwa mema. Mo monka ne nkunwa ya bubinebine ikunwanga mu mityima ya bantu ba mu wetu mwaba. (1Kod. 3:6) Shi tusaka ino nkunwa ya kyelekejo yale miji, itame ne kutōya maluba, tufwaninwe kulonga kujokela’mo kupya ne kwiisangila na kwingidija kinenwa kya Leza.
2. I muswelo’ka otukāla kyalwilo kya kwitana dikwabo?
2 Ipangula Kipangujo: Kitatyi kyoteakanya musapwilo obe, ubulwe’po kuteakanya’ko ne kipangujo kyobwanya kukalondolola mu kujokela’mo kupya? Ipangula’kyo ku mfulo kwa mwisambo mubajinji ne kumulaya wiye umujokele. Bavule bamonanga bu i biyampe kutonga mwanda kampanda mu Dibuku Bifundija Bible ukebakwasha balombole mwifundilwanga Bible.
3. Shi ubatana muntu usangedile, le i myanda’ka yokasoneka?
3 Soneka: Shi kodi kubwipi na kutaluka, shiya’ko kitatyi kya kusoneka. Soneka dijina ne adelese ya muntu. I biyampe ne kulemba mafuku a mweji ne kitatyi kyo wesambile nandi, byo mwesambile’po ne dibuku dyo-dyonso dyowamupele. Le wanene’mba udi mu kipwilo kampanda? Le udi na kisaka? Lelo walombwele kusangela ne kuta’ko mutyima? Ino myanda ikakukwasha umone mwa kukwatañenya na misambo ilonda’ko. Shi ubaitabija kumujokela, soneka ne kipangujo kyokalondolola.
4. Mwanda waka tufwaninwe kūminina kitatyi kyotulonda basangela?
4 Ūminina: Satana kakalekapo kulonga bukomo bwa ‘kutekuna mwanda’ ukuninwe mu mityima ya bantu. (Mako 4:14, 15) O mwanda kokakōka shi udi na makambakano a kutana monka ku njibo muntu usangedile. Ubulwe’po kutuma nansha kushiya mukanda pa kibelo? Pania umo washilwile kifundwa kya pa kibelo na mwana-mukaji wa kādipo ubwanya kutana kwinjibo, ebiya wamutumina mukanda. Kaka pa kumutana kwinjibo mwenda mafuku, uno mwana-mukaji walombola muswelo waatengelwe bininge pa kumuta kwaadi umutele mutyima. Kitatyi kyotusangila nkunwa ya bubinebine, tubwanya kwimwena nsangaji itamba ku kwiimona imena, itama ku mushipiditu ne kupa ‘bipa makumi asatu, ne makumi asamba, ne katwa.’—Mako 4:20.