Kujokela ku Boba Basangela—Kitatyi’ka?
1. Le kulonga bana ba bwanga kulomba bika?
1 Kulonga bana ba bwanga kulomba kujokela ku bantu balombola mutyima wa kwifunda mpango ya Bulopwe bwa Yehova. (Mat. 28:19, 20) Divule dine kitatyi kiyampe kya kujokela ku muntu kilondanga mpangiko yetu ne ya muntu usangedile musapu. Mwanda waka tufwaninwe kupelakana kujokela muntu kupwa kwa kwimona nandi musunsa umbajinji?
2, 3. Mwanda waka tufwaninwe kujokela ku muntu bukidibukidi?
2 Mwanda Waka Ujokele’ko Bukidibukidi? Mwingilo wa kusapula “īno myanda-miyampe ya buno bulopwe” ke usa kufula, kadi mfulo ya ngikadilo ya bintu nayo ibafwena pabwipi. (Mat. 24:14; 1 Pet. 4:7) Nanshi “difuku dya kupanda” byodikidi ku bantu basangela musapu, tufwaninwe kuteja musoñanya wa ‘kusapula mwanda na bupyasakane,’ ulomba ne kujokela bukidibukidi mwanda wa kutamija kusangela kulombwelwe.—2 Kod. 6:1, 2; 2 Tem. 4:2.
3 Satana upelakananga kutekuna nkunwa ya Bulopwe yotukuna mu mityima ya bantu basangela. (Mako 4:14, 15) Divule dine babutule, balunda ba ku kaji, ne bakwabokwabo, bafutululanga boba basangela musapu. Kujokela’ko bukidibukidi kuketukwasha tushilwile pa mīsambo yetu imbajinji, bakwabo pokebatalwile mutyima wa muntu wa kusepelela.
4. Mu kwitana kubajinji, lelo i muswelo’ka otukāla mwadijo wa kwimona dikwabo?
4 Mwilayei: I biyampe kwilaya difuku dipotoloke dya kwitana monka kumeso kwa kutaluka. Ipangula kipangujo kyokalondolola mu kwitana kukwabo. I biyampe kusoneka senene kilayeno. Shi mpangiko yobe ikupa muswelo, munene mwitane kesha nansha mu mafuku alondakana na kwitana kwenu. Shi mwetene dibajinji ku mfulo kwa yenga, ino muntu usangedile musapu wingilanga mu bula bwa yenga, padi ukasaka mwimone dikwabo enka ku mfulo kwa yenga. Shi mubelaya, nankyo lama kilayeno.—Mat. 5:37.
5. Kujokela ku bantu pampikwa kwija kwitukwashanga namani tuvuije mwingilo witupele Yesu wa kulonga bana ba bwanga?
5 Tudi na bubinga bwa kujokela bukidibukidi bantu basangela musapu. Nanshi, mwilayei ne kujokela’ko pampikwa kwija, ke-kuntu, “kubashala kitatyi kityetye tu.” (1 Kod. 7:29, MB) Shi tupelakane kupempula boba basangela musapu wa Bulopwe, po pene nabya bukomo bwetu kebukabulwepo kulupula bipa.