Jokela ku Bonso Baikele Kusepelela Nansha Bityetye
1 Batwe bavule tudi mu bubinebine dyalelo mwanda muntu kampanda wajingulwile amba tubasangela musapu wa Bulopwe, penepa wajokela kotudi na kitūkijetyima—pakwabo misunsa mivule—mwanda wa kutamija kusepelela’kwa. Mo monka netu, na kitūkijetyima, tufwaninwe kujokela boba bonso baikele kusepelela nansha bityetye. Bine, kulonga kujokela’mo kubadilwa mu mwingilo otupelwe wa ‘kulonga bana ba bwanga.’—Mat. 28:19, 20.
2 Jingulula Kusepelela Kulombwelwe: Nansha shi muntu wapele kitabo, mpala yandi, lupumo lwa diwi dyandi, nansha bishima byalupula bikokeja kulombola amba wasangela nansha bityetye’tu musapu wa Bulopwe. Kino kikokeja kwikala kyalwilo kya kujokela’mo. Tutu umo wapempwile mukelenge umo mu bula bwa mayenga atano ino watunya kumushila nansha kitabo kimo. Mu bupempudi bwa busamba, mukelenge’wa waitabija kitabo, ne kifundwa kya Bible kyashilwididila.
3 Shi ubajingulula mutyima wa kusepelela, nabya jokela’ko bukidi, padi kupwa’tu kwa mafuku matyetye. Kokashila “yewa mubi” mukenga wa kutekuna nkunwa yowakusa mu mutyima wa muntu’wa. (Mat. 13:19) Kokilwa’ko kwenda ku kilaeno kyomwelaile kwitana na muntu mu difuku ne nsaa kampanda.—Mat. 5:37.
4 Mu Mwingilo wa mu Kipito: Lelo uloñanga bukomo bwa kukemona na boba bomwetene nabo mu mwingilo wa mu kipito nansha mu busapudi bwa kiponka na ponka? Ku mfulo kwa mīsambo yenu, ukokeja kunena’mba: “Nasangela mīsambo yetu. Le i kwepi kotukokeja kwitana dikwabo mwa kwisambila monka?” Basapudi bamo, shi abamone’mba i kyendele’mo, bapānanga nimelo yabo ya telefone nansha kulomba ya muntu’wa. Shi bantu bakumonanga nyeke mu mwingilo wa mu kipito ne pa kifuko kampanda kebakekakapo kukupa nimelo yabo ya telefone nansha adelese yabo. Wivwane nansha abapele kukusapwila’byo, ukokeja kutompa kushinsakanya kusepelela kwabo kitatyi kikwabo kyomuketana nandi mu kipito.
5 Tusangalanga shi byotwadi tukunine ne kusangila mema bibatama biyampe. Netu monka na monka, tusangalanga shi tubakwasha muntu endelele ku mushipiditu na kujokela’mo kupya kotumujokele. (1 Kod. 3:6) Witungile kitungo kya kujokela ku bonso baikele kusepelela nansha bityetye.