Kweji wa Buná—Kyaba kya Kupyasakena mu Mingilo Milumbuluke!
1 Shi kimpumpu kekifwena ku kibundi kya bantu, lubila lwa kudyumuna bantu ku kyaka kibalumba nalo lwelwanga na kampeja-bukidi. Ino shi kimpumpu kibafwenenena, po pene ke kwela mabila konso nteintei. Kyelelwanga mabila namino i kika? I kino, būmi bwa bantu budi mu kyaka! Padi kudi bantu bamo kebadipo bevwene lubila lubajinji. Bakwabo padi badi bevwene, ino abasūla’ko kebashikete. Mo monka ne lubila lwa kidyumu kya kwa Leza lotupelwe kwela pano kepafikile “kimpumpu” kya bukalabale bwendele’mo bwa Leza kisaka kukombeleja bityakuku byonso bya ino ntanda imbi. (Nk. 10:25) Būmi bwa nyeke bwa midiyo ne midiyo ya bantu budi mu kyaka! Lubila lwa kidyumu lufwaninwe kwelwa. Bine tufwaninwe “kupyasakena mu mīngilo milumbuluke.”—Tet. 2:11-14.
2 Pano ke myaka makumi ne makumi, bantu ba Yehova besakanyanga bininge mu kitatyi kya Kivulukilo, mwanda bayukile amba i kitatyi kya kwingila na bupyasakane bwa pa bula. Ku muketeko wa 1939, Informateur (Mulombodi), witwa dyalelo bu Mwingilo Wetu wa Bulopwe, wākankamikile banabetu amba: “Ku muketeko wa mvula wiya’mo’u, kitatyi kikalanga kūlu kuyampe, tukulupile amba nsaa ipityijibwanga mu budimi na basapudi [ba pa kipwilo] isa kuvudila’ko misunsa ibidi kupita pabajinji, ne kitatyi kya bapania nakyo kisa kwibweja’ko mpata. Mu uno Kweji wa Buná mudi mafuku a dya Yenga atano, a dya Mposo nao atano. Longai dya Mposo ne dya Yenga dyonso mu Kweji wa Buná dikale . . . kyaba kya kusapula mu muswelo wa pa bula.” Kino kyo kitungo kikatampe kyētungile banabetu myaka 60 kunyuma! Mu uno mwaka namo, Kweji wa Buná wadingakana na wa mu 1939, mudi mafuku a dya Mposo atano ne a dya Yenga atano. Le byowitungile kulonga mu uno kweji i bika? Le byowalembele pa kalandadiye amba byo byosaka kulonga mu Kweji wa Buná 2000 i bika? Witūdile’ko mpangiko ya kwingila bininge mingilo milumbuluke pamo na bantu bonso ba Yehova mu bula bwa uno kweji yense wa pa bula mu mingilo ya kumushipiditu yendelela nyeke kumeso.
3 Byotukanine Kulonga: Difuku dya mvubu mikatampe kupita onso a mu 2000 i diponene mu uno kweji. I dya 19 Kweji wa Buná, difuku dyāfwile Yesu. Tulongei bukomo bwabinebine bwa Kwita bantu bavule mpata ku Kivulukilo. Lemba mulongo wa majina a bantu ba kutanwa nobe ku Kivulukilo pamo bwa motwanenene’kyo kweji wapityile’u, kadi tadija kutyina’mba wakakila’ko nansha umo. Mu boita mufwaninwe kwikala boba kebakyendanga mu busapudi, befundi ba Bible, bantu bopempulanga, bowadi wifunda nabo kala, bengidi nobe, bakwenu ba ku masomo, balondakani, babutule, ne bantu bakwabo boyukile. Lelo boba basaka kukatanwa’ko badi na muswelo wa kufika’ko? Shi kebadipo nao, mwene ubwanya kwibakwasha’ko? Shi kyolwa kya Kivulukilo kibabwana, batwe bonso tudi na madyese a kutundaila na nsangaji bonso bāya kutanwa’ko. Shi Kivulukilo kibapu, tukokeja kupāna monka bukwashi bwa kumushipiditu ku bano bantu basepelela musapu.
4 “Kupyasakena mu mīngilo milumbuluke” mu mafuku a kumeso ne kunyuma kwa Kivulukilo i muswelo mulumbuluke wa kulombola Yehova amba tutendelanga byonso byaetulongela. Nanshi bavule umbukata mwetu basa kwingila mwingilo wa busapudi na bukomo kupita mobengidilanga nyeke. Shi wi pania mukwashi, longa bukomo bobe bonso ubwanye nsaa 50 mu mwingilo, pakwabo ne kupita’po. (Mat. 5:37) Londa biyampe mpangiko yowatandikile ku ngalwilo kwa kweji. (Mus. 3:1; 1 Kod. 14:40) Batwe bonso tulongei buninge bwa kwela’ko bapania bonso kuboko, na kwibakankamika ne kwingila nabo pamo mu mwingilo wa budimi. (Dingakanya na 2 Balopwe 10:15, 16.) Shi tukune mu Kweji wa Buná, tukatengela kwangula nsangaji mikatampe ne madyese mavule aketwesela Yehova. (Mal. 3:10) Pakwabo kino kikekala bu kitumbukilo kitupa milela ya kwendelela na kwingila bu bapania bakwashi nansha balonso. Tusaka umpuya wa kumushipiditu otwikala nao mu Kweji wa Buná wendelele ne mu myeji mikwabo na kwikala nyeke basapudi ba Bulopwe ba kitatyi kyonso.
5 Tukulupile amba mu uno kweji, bantu ba Yehova tununu ne tununu basa kushilula bifundwa bya Bible bivule mpata. Ubulwe nobe kushilula’ko kimo? Lomba Leza akupe kifundwa, kupwa longela mwendele milombelo yobe. Kulupila na mutyima umo amba Yehova ukatendela milombelo yomwabija na kwityepeja, ukakupa muntu wa mutyima moloke wa kufundija.—1 Yoa. 3:22.
6 Ivwana ntwelelo imo mitompwe kala mu busapudi ishilulanga nayo banabetu mīsambo biyampe. Shilula na kino kipangujo: “Molangila bupolapola ne buenda bwavula ku masomo’bu i bademona bebulenga’ni nansha i bambutwile bo batunya kufundija babo bana?” Muleke akulondolole. Shi wanena’mba i “bademona,” mutangile Kusokwelwa 12:9, 12. Lombola patōka mwingilo wingila Dyabola wa kuleta tuvutakanya mu ino ntanda. Kupwa pūtula mukanda Kisaka Leza pa kifundwa 4, mwipangule shi nandi usakanga kuyuka kwātambile Dyabola. Endelela na kutanga ne kwisambila pa misāngo ibidi imbajinji. Ino shi wanena’mba i “bambutwile bo batunya kufundija babo bana” o mwanda ku masomo kubayula bupolapola ne buenda, tanga 2 Temote 3:1-3, kupwa tela tuyukeno tulengeja kwikale bino bintu bibi. Ebiya pūtula mukanda Kisaka Leza pa kifundwa 8, tanga musāngo 5, endelela na mīsambo. Shi umupe kilaeno kya kujokela’ko, nalanga kukabulwepo kushilula nandi kifundwa kya Bible kyendelela biyampe. Mu bupempudi bukwabo, mwipangule shi kudi muntu ungi wayukile ukokeja kusepelela kwivwana myanda yomufundija.
7 Muswelo mukwabo wa “kupyasakena mu mīngilo milumbuluke” mu Kweji wa Buná i kutambila mu miswelo mishileshile ya busapudi. Lelo ulañanga kusapula mu biwanza ne pa nshīko? Kifwa pa nshīko ya myotoka ne mu ngala? Le i mu nsoko ne ku njibo ituminwa’ko foni’ni? Nansha usakanga kusapula busapudi bwa ku telefone, mu bipito, ne mu mikenza ya busunga? Mwene ukokeja kwingidija ino milangwe mu uno kweji? Yehova ukakukwasha wikale muntu wakubulwa moyo. (Bil. 4:31; 1 Tes. 2:2b) Padi muketeleka kwingidila pamo na pania nansha na musapudi upotolwele biyampe ino miswelo mishileshile ya busapudi.
8 Yewa yense usaka kutandabula mwingilo wandi wa busapudi ukatambila ne mu busapudi bwa kiponka na ponka. Divule kilombanga’tu kutweja muntu mu mīsambo kampanda miyampe. Abe kolomona mwanda usangelwanga na bantu bavule. Ukokeja kushilula na ntwelelo iletelwe mu musāngo wa 6. Longa buninge bwa kukwatakanya ne tuminite tutyetutye kutyina’mba twakajimina’tu bitupu. Māni, nansha i a mu lupawa, nansha i a mu kakopo, nansha adi munshi mwa Simba, ketwiamwañangapo amba mwanda’po keabwenepo ntyupa mutuntulu. Wabulwa’po nobe kusela nansha minite itano, nansha dikumi, pakwabo dikumi ne itano ya kusapula kiponka na ponka?
9 Kitatyi kya Kulanga: Ela milafwe ku myanda ya mushike yanenwe mu drame yalongelwe ku mwaka ku Kitango kya Distrike “Kinenwa kya Leza kya Bupolofeto.” Ino drame, yadi na mutwe wa mwanda unena’mba Tukwatei Bupyani Bwetu bwa Kumushipiditu na Mutyika, yetulangulukije pa kwishila kwādi kwishidile Yakoba na Esau. Esau wādi unena amba nandi wādi mute mutyima ku bintu bya kumushipiditu pamo bwa Yakoba, ino ayo mingilo yandi koku ilombola bingi. (Ngal. 25:29-34) Kino i kidyumu kikatampe kotudi! Twikalei bwa Yakoba, twielelei’ko, tulwei, eyo tukalabilei madyese a Yehova. (Ngal. 32:24-29) Mwene i biyampe kulangula monka bupyasakane bwetu mu Kweji wa Buná ne mu myeji mikwabo ilonda’ko? Bine ketukolwa kukwatyila ku mitembwe bupyani bwetu bwa kumushipiditu bulumbuluke namino.
10 “Difuku dikatakata dya Yehova didi pabwipi, didi pabwipi ponka, ne kupeja’dyo nakampata.” (Zef. 1:14) Tufwaninwe kwela lubila lwa myanda miyampe ya Bulopwe. Bine būmi bwa bantu budi mu kyaka! Shi ke pano, tulomba Yehova esele mpata bantu bandi bonso mu uno kweji, ponso potwilombola batwe bonso pamo bu bantu ‘bapyasakena mu mingilo milumbuluke.’
[Kapango pa paje 4]
Kuvuluka bya Kuteakanya pa Kivulukilo
Kivulukilo kya uno mwaka kikaponena mu dya Busatu, 19 Kweji 4. Bakulumpe bafwaninwe kuta mutyima ku myanda ilonda’ko ino:
◼ Pa kutunga kitatyi kya kupwila, tai’ko mutyima, kutyina’mba byelekejo byakapityijibwa dyuba kedyaponene.
◼ Bantu bonso, ne muneni mwine, bafwaninwe kuyuka senene kitatyi ne ku kifuko kukalongelwa Kivulukilo.
◼ Teakanyai mukate ne vinyu biyampe shē, kadi kumeso kwa kitatyi.—Tala Kiteba kya Mulami kya 1 Kweji 1, 1986, paje 17.
◼ Masani, bilaudi, meza mayampe ne kisandi kya kupūta’po bifwaninwe kuselelwa ku njibo kukapwidilwa ne kwibyala kumeso kwa kitatyi.
◼ Mufwaninwe kukundula senene Njibo ya Bulopwe nansha kifuko kikwabo kyomukapwidila’ko.
◼ Banabetu batundaila bāya ne boba bakapityija byelekejo bafwaninwe kutongwa, ne kufundijibwa kumeso kwa kitatyi mingilo yabo ne ndudi ya mwa kwiingidila biyampe.
◼ Mufwaninwe kukwata mpangiko ya kukapityija byelekejo kudi mushingwe-māni ye-yense ukolejibwe, ukomenwe kufika ku kupwila.
◼ Shi kudi bipwilo bivule bingidijanga Njibo ya Bulopwe imo, i biyampe bikale kumvwañana, kutyina’mba kwakekala kwityinya mu pitapita, pa ntwelelo, mu bimama mupita bonso, ne pa nshīko.