Lelo Ukwete Bintu Bikola na Mutyika?
1 Shi muntu wetwipangula amba lelo mukwete bintu bikola na mutyika? Tusa kulondolola pampikwa kwikaka amba eyo! Lelo i bintu’ka bimobimo bikola bitupele Leza byotukwete na mutyika?
2 Bine umo ne umo ukwete na bulēme bukatampe kipwano kyapwene na Tata wetu wa mūlu! Aye witukulupija amba shi ‘tufwene kubwipi nandi, nandi ukafwena kubwipi netu.’ (Yak. 4:8) I kutupu muntu wadi wa kumona būmi bwa nyeke shi Yesu Kidishitu kāelelepo kitapwa kyandi kya kinkūlwa. (Yoa. 3:16) O mwanda tufwijanga’ko Leza na mutyima umo, kadi difuku ne difuku tulombola mu milombelo yetu kukwata kotukwete na mutyika mukatampe kino kyabuntu kilēme kyaetupele.
3 Mukanda Ukola, Kinenwa kya Leza kya ku bukomo bwa mushipiditu, nao i kintu kikola kotudi, monka mwikadile bulongolodi bwa Yehova bwa pano pantanda. Tulombolanga amba tukwete na mutyika mwendele’mo bino byabuntu bitupele Yehova ponso potulondanga misoñanya ya mu Bible mu būmi bwetu, tuningisha buswe bwetu bwa bu bana na bana, tulonda senene ndudi ya Kiteokratike, twingidila ne pamo na boba betuludika.—1 Pet. 1:22.
4 Tutambulanga bidibwa bivule bya ku mushipiditu kupityila kudi umpika wabinebine ne wamanwa. Tusa kwibitambula monka uno mwaka ku Kitango kya Distrike “Balongi ba Kinenwa kya Leza.” Tukapebwa’ko misoñanya ya mvubu ne kwikala mu kisense kilumbuluke kyotwabilanga. I bika byotubwanya kulonga bilombola amba tukwete bino bintu bikola na mutyika mukatampe?
5 Ketwakizobololai Njibo ya Yehova: Nehemia wādingile boba bādi baputumina mu mingilo ya kūbakulula nsakwa ya Yelusalema amba ‘kemwakizobololai njibo ya Leza.’ (Neh. 10:39) Dyalelo, “njibo” ya Yehova i mpangiko yakwete itala pa mutōtelo. Bitango byetu bya distrike bibadilwanga mu ino mpangiko. Kuleka kuzobolola ino mpangiko i kukatanwa’ko ne kukata’ko mutyima byabinebine. I amo, kulonga namino ye kukalombola Yehova amba tukwete na bulēme bukatampe bintu byonso byaetulongela. (Bah. 10:24, 25) Le i ñeni’ka yotufwaninwe kukwata’po tamba pano ilombola amba tukwete uno mwanda ukola na mutyika?
6 Tutanwei’ko Mafuku Onso Asatu: Umo ne umo umbukata mwetu ufwaninwe kwiteakanya mwa kukataninwa ku kitango mafuku onso asatu. Lelo kodi mwalwile’ko kwiteakanya mwa kukafikila’ko kumeso kwa kitatyi difuku ne difuku, ne kushikata’ko kutūla ne ku milombelo ya mfulo ya mu dya Yenga? Shi kodi mwalwile’ko i biyampe, ukeselwa madyese mavule. Kutanwa ku kitango ke ponsopo pokupēlanga. Kusendulula kaji koingilanga kukokeja kukulomba kininga kyabinebine. Lwendo lukokeja kwikala lukomo. Ino kokapungila pangala pa bintu bya uno muswelo bibudijanga bantu kukatanwa’ko.
7 Tulondei Kino Kifwa Kilumbuluke: Ku mwaka, mu ntanda imo ya mu Afrika mudi bulwi bwa bene ntanda abo bene na bene, banabetu badi benda mulongo ku kitango kya distrike, batana kibumbo kya basola. Basola bebepangula’mba: “Banwe bene mwi bāni ne komwenda i kwepi?” Banabetu balondolola’mba: “Twi Batumoni ba Yehova, twenda ku kitango kya distrike.” Sola umo webatendela mpata, amba: “Banwe Batumoni ba Yehova kemutyinangapo kintu. Mwiendelei shenu, mukelongele kitango kyenu, kekudipo kikemulonga. Inoko yukai amba musa kutana basola bavulevule. Pomwenda’po, olokai’nka mu bukata bwa dishinda! Nansha shi mubamone bantu bavule bongwidile, banwe endai’tu’nka mu bukata bwa dishinda!” Nabo balongela monka, ne byobafikile ku kitango pambulwa kyebalongele. Bano banabetu bapadilwe mpalo mwanda balongele kintu kilombola amba i bantu bakwete bintu bikola na mutyika.
8 Netu tutanwanga na bikambija pala pala pamo bwa banabetu ba mu byaba bikwabo bya mu Afrika. Ino, kunena na bubine, tufwaninwe kwiula lwitabijo lwabo ne kusumininwa kutanwa ku bipimpo byonso bya kitango kya distrike. Shi kikulomba kusendulula myanda kampanda, wiubije mudi Yehova wa kukuludika, koku uyukile amba uketwesela pa bukomo botulonga bwa kukatanwa ku kitango kyonso kituntulu.
9 Angula Madyese: Twabilanga mpata Kinenwa kya Leza, mwanda tuyukile amba akyo kyo kya kwitutamija kufika ne ku lupandilo. (1 Pet. 2:2) Kutanwa kotukatanwa ku kitango kya distrike, kwivwana myanda inenwa’ko, bikapa umo ne umo muswelo wa kukomeja lwitabijo lwandi mu kine Kinenwa’ki ne kumona bukomo bwa kukomena bulwi bwitutamba Satana. Shi tulonge namino, tubalombola Yehova ne bantu bonso betutala amba tukwete byabinebine bintu bikola na mutyika mukatampe, ne amba ‘ketudipo bantu ba muswelo wa bajokela kunyuma . . . ino twi bantu ba muswelo wa badi na lwitabijo lwa kulama būmi bwa muya.’—Bah. 10:39; 12:16; Nk. 27:11.
10 Tukulupilei’nka mudi Yehova Leza wa kwitushitwila malolo a mūlu ne kwitupungulwila milungu ya madyese a ku mushipiditu. (Mal. 3:10) Witungile kitungo kya kukatanwa ku Kitango kya Distrike tamba ku ngalwilo kwa mpangiko mu dya Butano lubanga kutūla ne ku “Amena!” wa mu milombelo ya mfulo ya mu dya Yenga kyolwa. Bine kukabulwepo kusangala!