Malondololo ku Bipangujo Byenu

◼ Le i ani ufwaninwe kulombela ku kupwila?

Milombelo ya mu kipwilo i kipindi kya mvubu mikatampe mpata mu butōtyi bwetu. Kwimanina bakwabo ku meso a Yehova i madyese malēme, ino kadi i kiselwa kilēma. Milombelo byoidi na mvubu mikatampe, bakulumpe bafwaninwe kutadija biyampe kitatyi kyobatyiba mbila ya kuyuka i tutu’ka mubwanye bisakibwa ukokeja kulombela ku kupwila. Banabetu babatyijibwe ba kwimanina kipwilo mu milombelo bafwaninwe kwikala bene Kidishitu bengidi bapye, bayukilwe bu bifwa biyampe, balēmekibwe mu kipwilo. Milombelo yabo ya kalēmo ne bulēme ifwaninwe kulombola patōka kipwano kyabo kilumbuluke na Yehova Leza. Mutwe wa mwanda unena amba “Kulombela ku Meso a Bantu na Mutyima wa Kwityepeja” wālupwilwe mu Kiteba kya Mulami kya 15 Kweji 5, 1986 (Falanse) ulombola patōka misoñanya mikatampe ibwanya kukwasha boba bemaninanga kipwilo mu milombelo ku meso a bantu bonso.

Bakulumpe kebafwaninwepo kupa tutu udi na mwikadilo walakanwa nansha wa kapēlepēle kulombela milombelo. Tutu wa manye nansha usenswe kwitatula mu milombelo kafwaninwepo kutongwa. (1 Tim. 2:⁠8) Tutu nkasampe nandi monka na monka, nansha ke mubatyijibwe, bakulumpe bakatala shi ke mufikile pa ditabula dya muntu mupye ku mushipiditu, ubwanya kwimanina kipwilo mu milombelo.​—⁠Bilongwa 16:​1, 2.

Kyaba kimo, ku kupwila kwa kwenda mu mingilo ya budimi, shi kekudipo tutu mubwanye bisakibwa wa kwimanina kisumpi, kaka mubatyijibwe ukokeja kulombela. Ino ufwaninwe kwipūta ku mutwe na kīpūtwa kyendele’mo. Shi i bimweke amba kekudipo tutu mubwanye bisakibwa usa kwiya ku kupwila kwa kwenda mu mingilo, bakulumpe bafwaninwe kutonga kaka mubwanye bisakibwa wa kwikutangidila.

Mungya kibidiji, mwimaniji wa Kupwila kwa Bantu Bonso ye ulombelanga milombelo ya ñanjilo. Ino ku kupwila kukwabo kwa pa kipwilo, shi kudi batutu bavule babwenye bisakibwa, tutu ungi ubwanya kutongwa kulombela milombelo, kebidipo amba mwanda’po ye ushitula kupwila, nansha amba ye upelwe kipindi kya mfulo. Mu bino byonso, tutu wa kulombela ku kupwila kwa pa kipwilo ufwaninwe kuyukijibwa kumeso kwa kitatyi, mwa kulangulukila’ye pa bintu byakanena. Namino, ubwanya kulombela milombelo mishimate, itamba ku mutyima, kadi mikwatañane na kwine kupwila’kwa.

Milombelo ya uno muswelo keifwaninwepo kwikala milampe. Kitatyi kilombela tutu milombelo ku meso a bantu, shi wimene bwimwa, ulombela’yo na diwi ditunduke, unena bintu bitelekwa senene, ukemvwanikwa biyampe. Kino kikapa bonso bongwidile muswelo wa kwivwanika milombelo biyampe, nabo mwa kwitabijija na mutyima umo amba “Amena”!​—⁠1 Bil. 16:36; 1 Kod. 14:⁠16.