Bitango​—Kitatyi kya Kusangala!

¹ Bitango bya Batumoni ba Yehova i bitatyi bya nsangaji mikatampe. Pano ke myaka katwa ne bya pangala, kuno kubungakana kutantyija’nka kutantyija bulongolodi bwetu. Twashilwile batyetye, ino tubemwena madyese makatampe esela Yehova mwingilo otwingila kujokoloka ntanda yonso. Ku kitango kyetu kibajinji kya mu kino kyetu kitatyi, kyālongelwe mu mwaka wa 1893 mu kibundi kya Chicago mu Illinois, kwātenwe bantu 360, ino kwābatyijibwa bantu 70, bālombola patōka kwipāna kobepēne kudi Yehova. Mwaka wapityile’u, ku bitango bya distrike “Balongi ba Kinenwa kya Leza” kwatenwe bantu 9 454 055, ino kwabatyijibwe bantu 129 367 kujokoloka ntanda yonso. Bine i nsulo ya nsangaji yabinebine!

² Nansha ke mu myaka isekunwinwe mu Bible, ne dyalelo, kukongakana kwa bantu ba Leza i mikenga mikatampe ya kutambula bufundiji butamba kudi Yehova. Mu kitatyi kya ba Ezela ne Nehemia, bantu bādi bateleka butangi bwa mukanda wa bijila “kushilwila lubanga bwē, kutūla ne dyuba mu mitwe.” (Neh. 8:​2, 3) Bantu bāikele na “nsangaji mikatampe mine” mwanda wa kwivwanija kobāivwanije biyampe Bijila mu kine kyaba’kya. (Neh. 8:​8, 12) Netu tusangalanga pa kuyuka amba bitango bitupanga mukenga mulumbuluke wa kutambula bufundiji buyampe ne byakudya bya ku mushipiditu bitupa Yehova pa “kitatyi kifwaninwe” kupityila kudi “umpika wabinebine ne wamanwa.” (Mat. 24:​45, NW) Yesu wānene amba muntu ufwaninwe kumwena būmi “mu myanda yonso ītamba mu kyakanwa kya Mwine Leza,” kino kilombola amba bitango bidi na mvubu mu būmi bwetu bwa ku mushipiditu.​—⁠Mat. 4:⁠4.

³ Kutanwa’ko Kudi na Kafwila-Midimo: Umo ne umo motudi ufwaninwe kwitūdila’ko kitungo kya kukatanwa uno mwaka ku Kitango kya Distrike “Bafundiji ba Kinenwa kya Leza” kyonso kituntulu. Tufwaninwe kukwata mpangiko ya kufika’ko difuku ne difuku kumeso kwa kitatyi kutūla ne ku kwitabija pamo na betabija “Amena!” ku milombelo ya mfulo. Pa kufikila pa kino kitungo, tufwaninwe kusendulula mpangiko yetu. Eyo, kupebwa konje ku kaji mwa kukataninwa ku kitango kubwanya kwituletela makambakano kampanda. Ino tufwaninwe kusumininwa byabinebine, ketwakilangai amba kupebwa konje kukeila ako kwine. Shi tukimba kwa kukafikila nansha lupeto lwa kufutyila lwendo, tufwaninwe kwalwila’ko kwiteakanya. Bukomo bo-bonso botukalonga budi na kafwila-midimo!

⁴ Bantu ba Yehova kebapikulangapo madyese obeselwa ku kitango na kudingakanya’o na mukōlo obalupula pa kukatanwa’ko. Teja bifwa bimo bya banabetu bāikele kutyipa amba’nka kukatanwa ku Kitango kya Matanda kya Batumoni ba Yehova kyādi na mutwe wa mwanda unena amba Kiswa-Mutyima kya Leza, kyālongelwe mu kibundi kya New York mu mwaka wa 1958. Tutu umo wāimikile mingilo yandi ya kūbakila ba mobo mu bula bwa mayenga abidi mwanda wa kukakwasha ku mingilo ya kitango ne kukatanwa’ko. Tutu umo wa mu Bisanga bya Virjini wāpotolweje kipeta kya budimi mwanda wa kisaka kyandi kyonso kya bantu basamba kikatanwe ku kitango. Ba mulume ne mukaji bansongwanzele bāpotolweje abo matolo mwanda wa bakatanwe ku kitango na babo bana bonso basatu, kushilwila ku wa mweji ibidi kutūla ne ku wa myaka isamba-ibidi. Banabetu ba munda mumo ba mu Kaliforni bālombwelwe amba shi bajikilwe ku twaji twabo, pa kujoka bakajimija’to. Ino kino kekyēbakankejepo kukatanwa ku kino kitango kikivulukwa ne dyalelo.

⁵ Yehova Witupalanga Mpalo pa Bukomo Botulonga: Yehova umonanga ne kwesela bukomo bulonga bantu bandi. (Bah. 6:10) Kifwa ku Kitango Kwilundila’ko kwa Kiteokratike, kya mu mwaka wa 1950, bonso bātenwe ku kino kitango bēivwanine kishinte kya kamfula-nkonko kinena’mba “Ngikadilo Impya ya Bintu.” Kwine’kwa tutu Frederick Franz wāsangaja ne kujinya mityima ya bantu bonso pa kwipangula’mba: “Lelo kino kitango kitambile mu matanda pala pala kibulwe’po kusangala pa kuyuka amba, kino kyolwa’ki, umbukata mwetu mudi banabetu bakekala bamfumu ba ntanda impya?” Pano ke papite myaka 50 ne musubu, ino tukisangela nyeke umo mwimvwanino mutōkejibwe wa Mitōto 45:⁠16.

⁶ Tutu umo mutwe wa kisaka walombwele mutyima wa kufwija’ko pa kupwa kutanwa ku kitango kya distrike kya mwaka wapityile’u, amba: “Banwe banabetu, bine kino kitango kyadi kintu kya kupandija būmi bwa bantu mu muswelo okemukokejapo nansha kulanga kwine. Kisaka kyami kyavilukīle mu kizungu mwanda wa kukimba’mo kaji, ino twashilula kutangala ku mushipiditu. . . . Twafula’nka ne ku kusūla biselwa byetu bya ku mushipiditu. Kadi twaleka ne kutanwa ku kupwila ne kutambila pamo mu busapudi kwine. . . . Ino kino kitango kibetupe bukomo monka, pano ketwitungilanga monka bitungo bya ku mushipiditu ne kwiteakanya mwa kufikila’po.”

⁷ Yehova witutekelanga byakudya bya ku mushipiditu byotusaka. Ku bitango ko kwaalanga meza mayule bidibwa bā. Kukwata kotukwete ino mpangiko na mutyika kuketufikija ku kunena byānene Konilusa kitatyi kyobamupempwile kudi mutumibwa Petelo, amba: “Bātwe bonso tudi ponka pano [k]u meso a mwine Leza, ke tukwivwana bintu byonso byo walaībwa kudi Mfumwetu.” (Bil. 10:33) Bine, twitungilei’ko kitungo kya kukatanwa ‘ku meso a Leza’ ku bipimpo byonso bya ku Kitango kya Distrike “Bafundiji ba Kinenwa kya Leza” kikalongwa uno mwaka, ne kukasangala’ko!