Unis grâce à l’enseignement divin—Bande Ulombola Bumo bwa bu Bana na Bana Bwabine
Mutadi umo wa kipindi wakatenwe ku kifundwa kyobadi bendeja mwana-mukaji umo wadi kashilwile kutanwa ku kupwila kwa pa kipwilo. Wamwita kutala bande wa video Unis grâce à l’enseignement divin. Enka mu mwine yenga’o, uno lolo wakatanwa ku kupwila, ku mfulo wanena amba nasangala bininge pa kutanwa’ko. I kika kyalengeje uno bande alupule bipa bukidibukidi namino? Kintu kyatengele bininge uno lolo i kumona kwaamwene bumo bwetu bulēme bwa bu bana na bana bwingila mu ino ntanda miyule bukalabale ne mushikwa.—Yoa. 13:35.
Tala uno bande wa video wimwene nobe ndoe ne buswe bidi na Batumoni ba Yehova kujokoloka ntanda yonso. Kupwa languluka pa bino bipangujo:
(1) I kika kinenenwa amba “Bufundiji bwa Leza” wadi mutwe wa mwanda mufike’po ku bitango byalongelwe mu 1993-1994?—Mika 4:2.
(2) Lelo bubinebine bwa mu Bible i bwalamune namani būmi bwa bisaka bimo? Lelo i bwalamune ne būmi bwa kisaka kyobe namani?
(3) Mwanda waka kufundijibwa na Yehova kudi na mvubu?—Mit. 143:10.
(4) I makambakano’ka atananga banabetu pa kuteakanya bitango bikatampe bya matanda?
(5) Lelo umonanga namani kufikidila kwa Mitōto 133:1 ne Mateo 5:3 ku bitango bya bwine Kidishitu byotanwanga’ko?
(6) I kintu’ka kimwekelele kilombola amba bufundiji bwa Leza budi na bukomo?—Kus. 7:9.
(7) Le i kibalwa’ka kya bene Kidishitu babine babatyijibwe kipukwi kupita myaka yonso?
(8) I binenwa’ka byānene ba Mika, Petelo, ne Yesu bifikidilanga umbukata mwa Batumoni ba Yehova?
(9) I kika kikukulupija amba kisaka kya bantu badi na būmi bwa nsangaji, bekutyile umbumo kidi’ko binebine, ke kilotwapo?
(10) Le i bāni bosa kutadija uno bande wa video ne mwanda waka?
Kaka umo watadile uno bande wa video, kupwa wanena biyampe mu kīpi amba: “Uno bande wa video ukankwasha mpata, mwanda nkashala nyeke mvuluka amba bene Kidishitu bavule batutu ne bakaka kujokoloka ntanda yonso mu kino kitatyi bengidilanga Yehova na dikōkeji. . . . Bine, buno bumo bwa bu bana na bana bwetu i kya bulēme kikatampe!”—Ef. 4:3.