Epukai Kulondalonda ‘Bintu bya Bitupu’
1 Dishinda dimo disambulwila’mo bantu myanda dyalelo i Entelenete. Eyo, kwisamba myanda nansha kwishinta milangwe imutala na ba mu kisaka ne na balunda kupityila ku kino kisanji shako kekubipilepo, inoko i ‘bintu’ka bya bitupu’ bibwanya kwenda pamo na mikanda ya ku Entelenete?—Nk. 12:11.
2 Bidyumu pa Mikanda ya ku Entelenete: Bamo bemonanga bu bapwane mpata na bulongolodi bwa Yehova pobatambulanga byobalangila bu myanda impya ibatuminwa mu mikanda ku Entelenete. Bikokeja kwikala padi i myanda mimweke, tumisapu twa myanda ipityile ku Betele, malapolo a bimpengele nansha a kupangwapangwa, nansha ke myanda ikidi mifibwe ikasapulwa ku Masomo a Mwingilo wa Bulopwe. Bamo beyumbilanga kutuma misapu ya uno muswelo, amba bekale babajinji ku kusokwela balunda nabo myanda.
3 Ayo nanshi i milangwe ne myanda minyengakanye, nansha myelelwe’mo mwepo yapita ne moikadile. Pakwabo mwadi mu kufwila kutyityija mwanda, bibafule ku kuleta mulangwe ungi. Bantu ba kiyumbye kya kusabasaba myanda, pavule bekalanga’tu bantu bampikwa nansha kuyuka bintu byonso mobikadile. (Nk. 29:20) Kyaba kimo, nansha shi i mwanda keudipo mwa kwitabijija’o, ino ushilanga bantu milangwe ya kusakasaka kuyuka. Myanda ya bilubo uno muswelo, ilubijañana, keyo kutyityija ‘mibotakanya,’ yakubulwa kiluji kiloeja lulamato lwa bwine Leza bwabine na bine.—1 Tem. 4:6, 7.
4 Shi ubatume myanda, kungya-meso’kwa ibaalamuka amba i ya bubela, nobe ubasela kiselwa kya kavutakanya ne tusua toibwanya kulenga. Pātambwile Davida musapu wāsapwilwe na muneneno-mpata amba bana bandi bonso i bepaibwe, twivwana amba “wasana ne bivwalwa byandi” pa mwanda wa kujingwa mutyima. Ino kunena na bubine, i wandi mwana umo kete wāfwile. Eyo, wādi mwanda wa bulanda shao, ino kokwa kunena na muneneno-mpata kwāsanshije Davida kutabuka. (2 Sam. 13:30-33) Bine, ketufwaninwepo kulonga kintu nansha kimo kibwanya kulubija banabetu nansha kwibazozeja.
5 Mukola Utūdilwe’ko na Leza: Yuka amba mukola wa kwivwanina’ko myanda obatūdile’ko kudi Tata wetu wa mūlu i “umpika wabinebine ne wamanwa.” Uno “umpika” ye mwinē kiselwa kya kujingulula i myanda’ka imo ya kuleta ku ba mu kipango kya lwitabijo, kadi pa “kitatyi kifwaninwe.” Bino bidibwa bya ku mushipiditu bitupebwanga enka kupityila ku bulongolodi bwa kiteokratike. Tufwaninwe kutengela kutambwila nyeke myanda ikulupilwa ku mukola obatūdile’ko kudi Leza, ke ku kikongepo kya bengidi batuma misapu ku Entelenete.—Mat. 24:45, NW.
6 Mateba a Web ku Entelenete: Diteba dyetu dya Web ku Entelenete i dino: www.watchtower.org. Dino diteba dyo adyo ditūdilwanga’mo bantu myanda. Kebidipo na mvubu kumona muntu kampanda, komite kankenge nansha kipwilo kansangwa kilongolola dikēla mu Web dya myanda itala Batumoni ba Yehova. Bamo batumanga myanda idi mu mabuku etu ne bisonekwa byonso ne bitabo kwa kunyemena’ko byonso bituntulu, batuma’nka ne makopi a myanda ya kitango, amba i kyabuntu. Kino kibidiji kya kutentula ne kwabanya myanda ya mu mabuku a Batumoni ba Yehova mu makompyuta, kikale na bukwashi, kekikele nabo, i kujilula bijila bya kyepelo kipelwe’nka benē mabuku kete. Nansha shi bamo bamonanga amba kuno i kukwasha banabetu, ke biyampepo, mwanda kebapelwe’byopo lupusa, i kibidiji kifwaninwe kuleka.
7 Wivwane tudi na butyibi buyampe ne ñeni mibwane mu bintu bitala kwisambulwila myanda ku makompyuta, tukatadija shi bintu byotudinga mu ñeni yetu i “bintu bilēme kadi bisangaja bya mvubu.”—Nk. 24:4, NW.