Myanda Miyampe Pano Keidi Ne Pa Internet

Mu ano mafuku aendelela busendwe kumeso, bantu bamobamo basakanga kuyukila myanda mivule ku bisangu bya misapu, kimfwa Internet. O mwanda Sosiete watūdila’ko bano bantu bengidija Internet myanda imoimo itala pa nkulupilo ne mingilo ya Batumoni ba Yehova.

Adelese ya dyetu diteba dya Web ku Internet i ino http://www. watchtower.org. Dino diteba dilombola matrakte, mikanda, ne bishinte bya Kiteba kya Mulami ne Amkeni! bitongelwe, bya mu Angele, Falanse, Kishinwa (kipēlejibwe), Kialema, Kilushi, Kiespanyola, ne ndimi mikwabo mikwabo. Mabuku amwenwa pa dino diteba dya Web i adi kala mu bipwilo byonso, ne kadi apānwanga mu mwingilo wetu. Kitūdīlwe’ko dino diteba dya Web ke kulupulapo bintu bipya, ehe, ino i kuyukija myanda ku bantu bengidija bisangu bya misapu. Ke biyampepo kwipa lupusa abe mwine lwa kushilula kulemba mapaje mu Internet atala pa Batumoni ba Yehova, pa mingilo yabo, nansha pa nkulupilo yabo. Dino diteba dyotutelelwa i dilombole patōkelela myanda mipotoloke ikokeja kwimwena muntu ye-yense utadila’po.

Nansha dino dyetu diteba byokedipungīlwe kutambula misapu ya bisangu bitwa bu (E-mail), inoko didi na mulongo wa maadelese a misambo yetu kujokoloka ntanda yonso. Mu uno muswelo, bantu bakokeja kutuma mikanda ku imo ya mu ano maadelese shi basaka kutambwila’ko myanda mikwabo nansha bukwashi bwa pa bula ku Batumoni ba mu kyabo kibundi. Ketwakikakai kuyukija adelese yetu ya Internet idi kungala’i ku muntu yense usaka kwifunda bubinebine bwa Bible kupityila ku kino kingidilwa.