Mukanda wa Musambo

Basapudi ba Bulopwe Baswedibwe:

“Leza mwine watamija’yo.” (1 Kod. 3:6) Bine, i nsangaji mikatampe’po kashā pa kumona kutama kwamweka mu budimi mu matanda onso abidi atelwa bu Congo! Mu mwaka wa mingilo wa 2003, i kushilulwe bifundwa bya Bible bipya 100 000 ne musubu. Kino i kintu kya kutendelwa.

Yehova weselanga mwingilo mu budimi bwetu bwa ndimi mishileshile. Pa kusaka’mba kwikale kulupulwa kukatampe kwa mabuku mu ndimi imoimo ya mu wetu mwaba, panenwa pano Kitango Kyendeji i kikwate butyibi bwa kushitula mabilo abidi a bwalamuni. Bilo imo idi mu Lubumbashi, mu Katanga, R.D.C., pa mwanda wa bisumpi bya bwalamuni bwa Kiluba ne Kikarunda, ne bilo mikwabo nayo idi mu Mbuji-Mayi, mu Kasaï oriental, R.D.C., pa mwanda wa bisumpi bya Kitetela ne Tshiluba. Ano mabilo a Bwalamuni engila pamo bu misapa ya Betele. Kitundulwilo kine i mwanda wa kukwasha balamuni bekale bevwana kitatyi kyonso ndimi yobalamwina’mo ne kulondeja kwalamuka konso kwayo.

Kadi pa kusaka amba mabuku avudijibwe mu budimi pa mwanda wa kwilundila’ko kwa mu ntanda yonso, bilo ya Bitampilo ya ku Feleme ya Sosiete Watchtower, pabwipi na Wallkill, mu New York, pano i mibaijibwe. Kwendelela kuyampe ko kubalengeja kulundila’ko kwa mametele 140 momu na momu. Bine, i bukata bufikila pa Mobo a Bulopwe 30 menzankane! I kuteakanibwe mashini a bitampilo abidi makatampe asa kushimikwa ku ngalwilo kwa mwaka wa 2004. Mashini ne mashini adi na bukomo bwa kulupula mapepala 25 ku sekonde umo. Kadi mashini a kulunga nao mabuku ne bingidilwa bya kwiatuma nabyo bisa kushimikwa monka mu mwaka wa 2004. Kino kikalengeja kulupula mabuku mavule na bantu batyetye kete.

Pano po twashilula mwaka mupya wa mingilo wa 2004, tulombela pamo nenu amba Yehova mwine ‘endelele kutamija’yo.’

Banabenu,

Bilo ya Musambo wa Congo (Kinshasa)