Bidibwa bya ku Mushipiditu pa Kitatyi Kifwaninwe
1. I muswelo’ka ufikidila Ezekyele 36:29 dyalelo?
1 “Nkētanga ñano, nkavudija’yo, ne kuletapo kipupo kya nzala po mudi mpika,” e mwanenena Mulopwe, Mfumwetu Yehova. (Ezek. 36:29) Dyalelo, bino binenwa bya bupolofeto bitala pa bantu ba Leza. Mu muneneno wa kyelekejo, Yehova umenejejanga bantu bandi ñano mivule ipāna būmi. Bidibwa bya ku mushipiditu byotupebwa pa kitatyi kifwaninwe ku bitango byetu bya distrike bilombola kino patōka.
2. I muswelo’ka wingidija Yehova bitango bya distrike mwanda wa kwitupa bidibwa pa kitatyi kifwaninwe?
2 Ku kitango kyālongelwe mu Ohio, Columbus, mu 1931, Yehova wāludikile bengidi bandi betabije dino dijina dipya—Batumoni ba Yehova. (Is. 43:10-12) Mu 1935 kibumbo kikatampe kya mu Kusokwelwa 7:9-17 kyāyukibwa patōkelela. Mu 1942, Tutu Knorr wānena dishikulu dinena’mba: “Ndoe—Lelo I ya Endaenda?” Dishikulu’di dyāletele bukomo ku mwingilo onso wa busapudi ne kufikija ku kubunda Masomo a Bible a Ngileade a Sosiete Watchtower. Nansha bivulukwa’nka bitango bimobimo, ino kimo ne kimo i mesa a bidibwa bileta bumeni ku mushipiditu bipānwa pa kitatyi kifwaninwe.—Mit. 23:5; Mat. 24:45, NW.
3. I bika byotufwaninwe kulonga pa kumwena mu ano masobo a ku mushipiditu ku kitango kyetu kya distrike?
3 Lelo Udyanga’byo Senene? Tukokeja kwikala bajokolokwe na bidibwa, ino kudya’byo senene mpika, mwanda ketulongapo bukomo bwa kwibidya. (Nk. 26:15) Ye mobikadile ne ku mushipiditu kwine. Ku bitango bimobimo, bimwekanga’mba bavule baswele kunangakana nansha kwisamba na bakwabo kitatyi kipita mpangiko. Nansha mīsambo yūbaka byoidi nayo na mvubu ku kitango, ino i biyampe ikale’ko kumeso ne kupwa kwa kipimpo ne kipimpo. (Mus. 3:1, 7) Mwanda shi ketushiketepo ne kuta mutyima na katentekeji, tukajimija myanda ya mvubu. Batadi ba mingilo ya kitango ne banabetu badi na bipindi basakilwanga kyaba kimo kwisambila pa myanda ya kitango kitatyi kipityijibwa mpangiko. Ino nansha namino, nabo bafwaninwe kuleta kimfwa na kwivwana mpangiko na katentekeji. Bine, kekwakekala nansha umo ubulwa kipindi kya bidibwa bya ku mushipiditu bitupebwa.—1 Kod. 10:12; Fid. 2:12.
4. I muswelo’ka otubwanya kwikala na mutyima wa kufwija’ko pa bidibwa bileta bumeni bitupa Yehova?
4 Bine, tusangelanga bubinebine bwa ku mushipiditu bupāna Yehova mwanda i bwishile na mfundijo ya bubela myumu tē ya Bipwilo bya Kine Kidishitu! (Is. 65:13, 14) Muswelo umo wa batwe ‘kwikala na mityima ya kufwija’ko’ i kumona kitango bu mukenga wa kufundijibwa na Yehova. (Kol. 3:15) Pa kyaba kya kutala’nka tutu unena dishikulu, abe mona musapu’wa bu utamba kudi ‘Mufundiji wetu Mukatakata.’ (Is. 30:20, 21; 54:13) Teja na katentekeji. Lemba myanda ya mvubu mu kīpi. Pituluka mu myanda mikatampe kyolwa ne kyolwa. Ingidija byowifunda.
5. I bubinga’ka botufwaninwe kusangela bitango bya distrike?
5 Bine, kitango kyo-kyonso kilongwa kumeso kwa Amakedona kwiya, nansha shi kilongelwe mu komponi ya balefije, shi mu ntanda mulwibwa divita, nansha mu kifuko kya ndoe, i bushindañani padi Satana! Byotudi kisaka kikute umbumo, tusanswei ino mikenga ya kwibungila pamo ku bitango bya distrike. (Ezek. 36:38) Tudi na kikulupiji kya’mba Yehova uketupa kadi dikwabo na buswe “bidibwa mwendela kitungo.”—Luka 12:42.
[Kapango pa paje 4]
Fwija’ko pangala pa Mesa a Yehova
◼ Teja na katentekeji
◼ Lemba myanda ya mvubu
◼ Pituluka mu myanda mikatampe ya mpangiko kyolwa ne kyolwa
◼ Ingidija byobya byowifunda