Mpangiko ya Kubungakana kwa Kipindi

Mu mafuku a mfulo a ino ntanda minunu mibole ino, i kya kamweno tulame bivwalwa byetu bya ku mushipiditu ne kukinga byonso bituyukanya bu bene Kidishitu. (Kus. 16:15) O mwanda i kyendele’mo mutwe wa mwanda wa mpangiko ya kubungakana kwetu kwa kipindi kwa mu mwaka wa mingilo wa 2006 unene amba: ‘Vwalai Bumuntu Bupya.’​—Kol. 3:10.

Difuku Dibajinji: Dishikulu dibajinji dya mapingu dinena amba “Tulombolei Bumuntu Bupya mu Miswelo Palapala,” dikesambila pa mvubu ya kutamija bumuntu bupya mu myanda palapala ya mu būmi bwetu. Le tutamijanga namani bumuntu bupya? Uno o mwanda ukesambila’po mashikulu abidi a mfulo mu difuku dibajinji, dimo dinena’mba, “Widingile Mwa Kulangulukila Senene” ne dikwabo amba “Bufundiji Bubumba Bumuntu Bwetu Bupya.”

Difuku dya Bubidi: Bumuntu bwetu bupya butala ne pa muswelo otwingidija ludimi lwetu, o mwanda dishikulu dya bubidi dya mapingu dinena amba “Tutamijei Ludimi lwa Bañeni.” “Lelo Wi Munekenye Yewa Umbi?” uno o mutwe wa mwanda wa dishikulu dya bantu bonso, ne dikalombola muswelo wa kudyumuka ku manwa andi. Mashikulu abidi a mfulo a kubungakana, “Wilame ku Biko bya Ino Ntanda” ne “Muntu Wetu wa Munda Ende Wikala Mupya Difuku ne Difuku,” i mashikulu aketukwasha twijibe ku mikadilo ne mwiendelejo ulwa na mashinda moloke a Leza ne twikale nyeke bemanije mu butōtyi botutōta Yehova.

Bine tutengele kukankamikwa mwanda wa tuvwale ne kulama bumuntu bupya!