Malondololo ku Bipangujo Byenu

◼ Lelo i byaka’ka bidi mu kwisamba na muntu oketuyukilepo ku Entelenete?

Mateba a Entelenete mavule i mapungilwe mwanda wa kukwasha bantu betane ne kwisambila pamo. Mateba amo mu ano alombanga bantu beyukanye, i bāni ne basaka bika, pakwabo balomba ne mafoto abo ne myanda mikwabo ibatala. Muntu weyukanya uno muswelo nabya ukekala na balunda bavule. Bine, ano mateba i matumbe mu bankasampe, kadi bankasampe bamo mu kipwilo bengidijanga’o mwanda wa kwisambulwila mawi na bantu bakwabo betela bu Batumoni ba Yehova.

Muntu otwitana nandi kupityila ku Entelenete ubwanya kwitongola na kufya myanda imutala, būmi bwandi bwa ku mushipiditu, ne masakila andi. (Mit. 26:4) Muntu witela bu Kamoni wa Yehova ukokeja kwikala padi wampikwa kwitabija, mupangwe, nansha kapondo kakimba wa kongola. (Ngat. 2:4) Mungya malapolo, bantu bavule bona banuke na buladi basokolanga bana mu ano mateba.

Nansha shi tusumininwe amba boba botwisamba nabo i bantu batendelwa mu kipwilo, ino mīsambo ya ku Entelenete keyo kwalamuka lubilo lonka ke myanda ya kubulwa kufwaninwa. Mwanda bantu bekalanga na kimpwa-moyo na bantu bokebemwenepo nabo meso. Kadi bakokeja kuboya uno mukenga wa mīsambo bu pafyame pobabwanya kunena bintu kebikokejapo kuyukwa na bakwabo, kimfwa bambutwile ne bakulumpe pa kipwilo. I kya bulanda mwanda bankasampe bavule ba mu bipango bya Bene Kidishitu ke bapye mu dino dikinga ne kuponena mu mīsambo mibole. (Ef. 5:3, 4; Kol. 3:8) Bakwabo ke bafike ne kwitumina mafoto abo alangula masenda a busekese, majina a kitonko, ne minjiki ya bifwatulo bya buladi bwa patōkelela mu maadelese abo a kompyuta.

Pa bino byonso, bambutwile bafwaninwe kutadija bilonga bana ku kompyuta. (Nk. 29:15) Kikalanga kyaka shi tubaite mweni oketuyukilepo mu yetu njibo nansha kumuleka kasuku pamo na betu bana. Mo monka i kyaka kotudi ne ku betu bana kusamba kipwano na beni pa Entelenete, nansha shi bano beni betela bu Batumoni ba Yehova.​—Nk. 22:3.