Kwasha Befundi ba Bible Bekale Basapudi ba Myanda Miyampe ya Bulopwe
1 Mwingilo wāpelwe bana ba bwanga na Yesu utelelwe mu Mateo 28:19, 20 wādi mwingilo mukatampe mpata. Bana ba bwanga ba Kidishitu bālombwelwe kulonga bana ba bwanga, amba nabo bakengile uno mwingilo umo onka wa kulonga bana ba bwanga. Kyalwilo kya busapudi bwa mfulo bwa myanda miyampe ya Bulopwe bwa Leza ntanda yonso kyaādilwe mu kitatyi kya pa bula kya mu ano mafuku a mfulo otudi’mo.—Mat. 24:14.
2 Befundi ba Bible bakokeja kwikala betu bana nansha bantu bakwabo basaka kwifunda netu Bible. Tusakanga na bubine kukwasha bonso bano betabije kiselwa kya kukwasha bantu bakwabo nabo bekale bana ba bwanga ba Yesu Kidishitu.—Luka 6:40.
3 Wibateakanye Bekale Basapula Bukamoni: Kankamika boba bowifunda nabo basapwile bantu bakwabo bintu byobefunda. Wibasekunwine myanda ikankamika yomwene mu mwingilo obe wa budimi. Fundija bobe bana tamba bakidi banuke kutambila mu mwingilo ulupula bipa na kwingila mungya bwino bwabo. (Mit. 148:12, 13) Lombola mu binenwa ne na kimfwa amba usangedile mwingilo.—1 Tem. 1:12.
4 Yehova wingidijanga enka boba betabija misoñanya yandi myoloke ne kwiilonda. Bine, basapudi bapya kebayukilepo bivule pamo bwa bengidi ba Bulopwe ba bwino, bepāne, ne babatyijibwe, ino bapya bafwaninwe kwitabija bufundiji bwa kyalwilo bwa mu Bible ne kubwanya kushintulula’bo. (Tala dibuku Balongololwe, p. 79-82.) Bafwaninwe kwisansanya na “Babiloni Mukatakata” ne myanda yonso ya politike, kadi bafwaninwe kutanwa kitatyi ne kitatyi ku kupwila kwa pa kipwilo.—Kus. 18:2, 4; Yoa. 17:16; Bah. 10:24, 25.
5 Shi ubamone amba yewa owifunda nandi Bible wabwanya bisakibwa bya kwikala musapudi wakubulwa kubatyijibwa, nabya yukija’mo mutadi mwimaniji. Nandi ukakwata’ko mpangiko mwanda wa bakulumpe babidi betane ne abe ne mwifundi nobe wa Bible pamo mwa kuyukila shi bine wabwanya bisakibwa bya kwikala musapudi wakubulwa kubatyijibwa ubwanya kusapula myanda miyampe ya Bulopwe pamo na kipwilo. Papo ukekala kadi na dyese dya kwiija bininge mwifundi obe wa Bible na kutambila nandi mu mwingilo wa budimi.