Difuku dya pa Bula dya Kukimba Bifundwa bya Bible
1 Tamba mu Kweji 1, kipwilo ne kipwilo kikatonga difuku dimo mu kweji ku mfulo kwa yenga, padi i yenga umbajinji, dya kukimba bifundwa bya Bible. Mukokeja kutonga mungya ngikadilo ya kwenu, Dya Mposo nansha Dya Yenga. Mu dine difuku’dya, shi mwinē njibo wapele kwifunda Bible, musapudi ukokeja kumupa kitabo Bifundija Bible nansha mapepala a panopano. Bakulumpe ne bengidi ba mingilo bakalonga bukomo bwa kutambila mu uno mwingilo ne kukwasha basapudi bashilule bifundwa bya Bible.
2 Komite wa Mingilo wa pa Kipwilo ye ukatonga i difuku’ka dya ku mfulo kwa yenga dya kukimba bifundwa bya Bible. I biyampe kuvuluja basapudi kitatyi ne kitatyi mwanda wa kulonga bukomo bwa kushilula bifundwa mu busapudi bwa ku njibo ne njibo ne pobalonga kujokela’mo kupya ku bantu basangedile musapu.
3 Mwa Kwilongolwela: Tukatana madingi a mwa kushilwila bifundwa bya Bible mu dyani dya ntentekelo dya Mwingilo Wetu wa Bulopwe wa Kweji 1, 2006 ne mu kabuku Muswelo wa Kushilula ne Kwendeleja Misambo Itala pa Bible pa paje 5. Bamo babwanya kwingidija trakte, kimfwa Lelo Usaka Kuyuka Bubinebine? Kadi Mwingilo Wetu wa Bulopwe wa Kweji 8, 2007 pa paje 3 upāna madingi a mwa kushilwila bifundwa bya Bible pojoka kutala muntu waitabije mapepala. Bakulumpe ne bengidi ba mingilo bo bakendeja kupwila kwa kwenda mu busapudi mu minite 10 ku 15, bakesambila nansha kulongeja kya kumwena’ko kimo nansha bibidi bya mwa kushilwila bifundwa bya Bible.
4 Bine, ke bonsopo baketabija kifundwa kya Bible ne bakendelela kwifunda netu umbula bwa kitatyi kampanda. Ino kino kekifwaninwepo kwitukankaja kukimba bifundwa, mwanda Yehova ye ukokelanga bantu badi bwa mikōko ku bulongolodi bwandi. (Yoa. 6:44) Kiselwa kyetu i kukuna nkunwa ya bubinebine ne kusekwila yoya yamena ne kusangila’yo mema, ko kunena’mba kwifunda na bantu ba mityima myoloke. Shi tulonge namino, tubavuija kiselwa kyetu kya bu ba kwingila mingilo pamo na Leza.—1 Kod. 3:9.