Tukanda twa Lwito lwa ku Kivulukilo twa Kwabanya Ntanda Yonso!
1. Le i kampanye’ka ka pa bula kateakanibwe kulongwa kumeso kwa Kivulukilo?
1 “Mukaloñanga enka namino pa kumvuluka.” (Luka 22:19) Pa kukōkela ku uno musoñanya wa Yesu, batōtyi ba Yehova bakebunga pamo na boba basangela musapu mu mafuku 30 Kweji 3, 2010 mwanda wa kuvuluka lufu lwa Yesu. Pa kino, tukanda twa lwito twa pa bula twa ku kivulukilo tukabanibwa ntanda yonso kushilwila mu mafuku 13 kutūla ku 30 Kweji 3.
2. I muswelo’ka otukapāna tukanda twa lwito?
2 Mwa Kwabenya’to: I biyampe kupa mwine njibo kakanda ka lwito ku makasa mu muswelo wabwanya kumona kifwatulo kidi pangala, kupwa nena amba: “Mu mafuku 30 Kweji 3 kyolwa, midiyo ne midiyo ya bantu kujokoloka ntanda yonso ikabungakana mwanda wa kuvuluka lufu lwa Yesu. Naiya kwimupa luno lwito pamo ne ba mu kisaka kyenu mwiye nenu kutanwa’ko. Mukokeja kwiya’ko ne balunda nenu bene. Tala nsaa ne kifuko kikalongelwa’po kivulukilo.” Mungya ngikadilo, ukokeja padi kutonga kutanga Luka 22:19 mu Bible ne kwisambila pa uno musoñanya udi mu Kisonekwa. Inoko, kokilwa amba tudi na kitatyi kityetye kya kusambakanya mwaba, pa kino i biyampe kwisamba mu kīpi.
3. Le i bāni botukokeja kwita?
3 Shi kipwilo kyenu kidi na mwaba mukatampe, bakulumpe bakokeja kwimulombola kushila boba kebatanwapo ku mobo tukanda twa lwito mu bupempudi bwenu bubajinji. Shi bikokejika, mukapāna ne mapepala kitatyi kyomwabanya tukanda twa lwito. Ta mutyima kwita boba bomwisambanga nabo mu kujokela’mo kupya, befundi ba Bible, bomwingilanga nabo, bomufundanga nabo, babutule, balondakani nobe, ne bakwabo bomwiyukile nabo.
4. Lelo mutyima wa kufwija’ko Yehova pangala pa buswe bwandi bwa kwitupa kikūlwa uketutonona tulonge bika?
4 Witeakanye Mwa Kwingidila ne pa Mfulo: Kitatyi kya Kivulukilo i kyaba kilumbuluke kya kutandabula mwingilo wetu. Le ubulwe’po kupanga senene mingilo yobe mwa kwingidila bu pania mukwashi? Lelo udi na bana nansha bomwifundanga nabo Bible bendelela biyampe ku mushipiditu? Shi i amo, kanene bakulumpe bebabandaule mwa kuyukila shi bano bapya i babwanye bisakibwa bya kwikala basapudi bampikwa kubatyijibwa mwa kwilungila mu kano kampanye ka pa bula. Mutyima wa kufwija’ko Yehova mwanda wa kwitūpa kikūlwa uketutonona tutanwe ku Kivulukilo, ne kwita bantu bavule amba tubungakane nabo pamo.—Yoa. 3:16.