Kampanye ka Kusapula Kivulukilo Kakashilula mu Mafuku 17 Kweji 3
1. Le i kampanye’ka kakashilula mu mafuku 17 Kweji 3?
1 Kivulukilo kya mwaka ne mwaka kitukwashanga tusapule lufu lwa Yesu. (1 Kod. 11:26) Ye mwanda tusakanga bantu batanwe’ko pamo netu ne kwimvwanija myanda itala kyabuntu kya buswe kya Yehova kya kikūlwa. (Yoa. 3:16) Uno mwaka kampanye ka kwita bantu bāye ku Kivulukilo kakashilula mu Dya Mposo mafuku 17 Kweji 3. Lelo wi mwiteakanye kumeso kwa kitatyi mwanda wa kukatanwa’ko?
2. Le i bika byotukokeja kunena potupāna tukanda twa lwito?
2 Byotukokeja Kunena: Ke biyampepo kwisamba bivule. Tubwanya padi kunena’mba: “Wakoma’po. Tubaiya kwimupa abe ne kisaka kyobe kano kakanda ka lwito ku masobo a mvubu mpata a pa mwaka akalongeka ntanda yonso mu mafuku 5 Kweji 4. Kukanenwa mwisambo wa mu Bible wa ku bitupu ukalombola kine kifikidije lufu lwa Yesu ne bine byalonga potwisamba pano. Kano kakanda kalombola kifuko ne kitatyi kine kyo ukanenwa muno mwetu.” Shi bibwanika pānai ne mapepala Dya Mposo ne Dya Yenga kitatyi kyomupāna tukanda twa lwito.
3. I muswelo’ka otukokeja kwita bantu bavule kutabuka?
3 Ita Bantu Bavule shi Bibwanika: Kitungo kyetu i kwita bantu bavule shi bibwanika. Nanshi uketa bomwifundanga nabo Bible, bojokela’mo, babutule, bakwenu ba ku mingilo, bakwenu ba ku masomo, balondakani ne bantu bakwabo bowiyukile nabo. Bakulumpe ba penu bakakwata’ko mpangiko ikemukwasha musambakanye mwaba wenu onso. Kampanye ketu ka mwaka ne mwaka ka kwita bantu ku Kivulukilo kalupulanga bipa. Kitatyi kyadi kinanga mwana-mukaji umo mu kifuko mwalongelwe Kivulukilo ku mwaka, tutu umo wamukweshe amone mwine wamwityile. Inoko mwana-mukaji wanene amba kadipo uyukile’mo muntu nansha umo ne kadi’mba watambwile kakanda ka lwito ku muntu umo wadi usapula ku njibo ne njibo kumeso kwa Kivulukilo.
4. I bika bikakulengeja usapule na bupyasakane kitatyi kya kampanye?
4 Kepabulwe padi mu boba batanwa ku Kivulukilo mukatanwa ne muntu owashidile kakanda ka lwito. Nansha shi muntu etabe nansha apele, bukomo bolonga bukapāna monka bukamoni. Tukanda twa lwito toabanya tukayukanya’mba Yesu pano i Mulopwe mukomo. Kusapula kosapula na bupyasakane kukakumwekeja ku bonso—bantu ba mu mwaba, banabenu basapudi, ne kupityidila, kudi Yehova—amba ulombolanga nakampata mutyima wa kufwija’ko pa kyabuntu kya kikūlwa.—Kol. 3:15.