Kwabanya Tukanda twa Lwito lwa Kivulukilo Kukashilula mu Mafuku 2 Kweji 4

1. I kitatyi’ka kyotukabanya tukanda twa lwito lwa Kivulukilo uno mwaka, ne kano kampanye ka mwaka ne mwaka kadi na mvubu’ka?

¹ Tamba mu mafuku 2 Kweji 4 kutūla ku mafuku 17 Kweji 4, tukabanya tukanda twa lwito lwa mwanda wa mvubu mpata mu uno mwaka—Kivulukilo kya lufu lwa Kidishitu. Pa kala, bantu bavule bādi basangela, bādi betaba ku kano kampanye ka mwaka ne mwaka. Kimfwa, mu difuku dya Kivulukilo, mwana mukaji umo waityile ku bilo ya musambo ne kunena’mba: “Nekifika’tu ku njibo, natana kakanda ka lwito munshi mwa mulango. Pano nkimba kwenda’ko, ino nkiyukilepo kitatyi.” Tutu wamulombola pene pasonekelwe kitatyi ku kakanda ka lwito. Ku mfulo uno mwana mukaji wamulaya amba, “nsa kwenda ku kyenu kinkumenkume kyolwa!”

2. Le i bika byotukanena pa kupāna kakanda ka lwito?

² Muswelo Otukalonga’ko: Byotudi na kitatyi kityetye kya kusambakanya mwaba, pa kino i biyampe kwisamba mu kīpi. Tukokeja kunena’mba: “Tubaimuna. Tukimba kukupa abe ne kyobe kisaka kano kakanda ka lwito lwa mvubu mpata lwa Kivulukilo kya mwaka ne mwaka kisa kulongwa ntanda yonso mu Dya Yenga, mafuku 17 Kweji 4. [Tambika mwine njibo kakanda ka lwito.] Dino i difuku dikavulukwa lufu lwa Yesu. Kukanenwa mwisambo wimanine pa Bible wa kwivwana ku bitupu, ushintulula muswelo otukokeja kumwena mu kikūlwa kya Kidishitu. Kano kakanda ka lwito kalombola adelese ne kitatyi kikalongwa kuno kupwila mu kyetu kibundi.”

3. Lelo i muswelo’ka otubwanya kwita bantu bavule?

³ Shi kipwilo kyenu kidi na mwaba mukatampe, bakulumpe bakokeja kwimulombola kushila boba kebatanwapo ku mobo tukanda twa lwito pantu kepamonwe na bapityeshinda. Ta mutyima kwita boba bomwisambanga nabo mu kujokela’mo kupya, babutule, bomwingilanga nabo, bomufundanga nabo, ne bakwabo bomwiyukile nabo. Shi bikokejika, mukapāna ne mapepala kitatyi kyomwabanya tukanda twa lwito. Le ubulwepo kwingila bu pania mukwashi mu Kweji 4 ne kusapula bininge mu kano kampanye kasangaja?

4. Mwanda waka tusakanga bantu basangela batanwe ku Kivulukilo?

⁴ Buno shabo bo bukamoni bukatampe bukatambula bantu basangela bakatanwa’ko! Bakemvwanija buswe bukatampe bwa Yehova bwa kuleta kikūlwa. (Yoa. 3:16) Bakayuka muswelo ukamwena muzo wa muntu mu Bulopwe bwa Leza. (Is. 65:21-23) Pa kusaka kuyuka bivule bakanena batumoni batenwe’ko befunde nabo Bible. Tulombelanga amba bantu bavule ba mityima myoloke betabe ku kano kampanye ne kutanwa netu ku Kivulukilo!