Les Témoins de Jéhovah — la foi en action, 1re partie : la sortie des ténèbres
Mu Bible, mwinya wendelanga pamo na bubinebine, ino fukutu nayo yendelanga pamo na bubela. (Mit. 43:3; Is. 5:20) Satana wātwejeje fukutu mu ino ntanda kitatyi kyāongwele Eva, na kulonga namino wāponeje muzo wa muntu onso mu fukutu. (Kus. 12:9) Dishike dya video Les Témoins de Jéhovah — la foi en action, 1re partie : la sortie des ténèbres (Batumoni ba Yehova—Lwitabijo Lwingila, Kipindi 1: Kutamba mu fukutu) dilombola, na kulonda bitatyi, muswelo washilwile mwinya kutamba mu fukutu. (Is. 60:1, 2) Shi ubapu kutala ino video, le ubwanya kulondolola ku bino bipangujo?
(1) Le i muswelo’ka waāndabile fukutu mikatampe kupwa kwa lufu lwa batumibwa? (2) Tamba mu myaka ya 1100’s, i bika byakweshe bavule bajingulule amba mfundijo mivule ya bipwilo yadi ya bubela? (3) Ba Henry Grew ne George Storrs badi bāni? (4) I binkumenkume’ka byashintyile būmi bwa Charles Russell? (5) Le ba tutu Russell, shandi, ne balunda nandi batyetye badi balonga namani mu kabumbo kabo ka kifundwa kya Bible, ne badi baleta namani kyabo kya mfulo mungya Bisonekwa? (6) Kibumbo kya befundi ba Bible kyapwene namani na kibumbo kya Nelson Barbour, ino i kika kyalengeje tutu Russell atambe’mo? (7) I bika byalongekele mu Kweji 7, 1879 byadi bu kitatyi kipya kwa kitōkeji kya ku mushipiditu? (8) Tamba papo, kibalwa kya Befundi ba Bible, kyadi kyenda kivudila’ko, kyalongele bika pa kusambakanya myanda miyampe? (9) I bika byadi bitengele tamba kala Befundi ba Bible amba byo bisa kulongeka mu 1914? (10) Le i makambakano’ka atene Befundi ba Bible pa kupwa kufwa kwa Tutu Russell? (11) I bika byalongele Befundi ba Bible pa kupwa kukutululwa kwa Tutu Rutherford ne bengidi nandi? (12) Ino video yowatala ibakukankamika namani ufwije’ko Yehova pa bulongolodi bwandi? (13) Le ino video ibaningija namani kusumininwa kobe kwa kwendelela kusapula na bupyasakane kubanga bikoleja mpika? (14) I muswelo’ka otukengidija ino video mwanda wa kukwasha, babutule, befundi ba Bible ne bantu bakwabo?
Bine, bano Befundi babajinji ba Bible i betushīle kipyanwa kilēme kya ku mushipiditu! Mu ino ntanda idi mu fukutu ya ku mushipiditu, abo badi basedi bakankamane ne bapyasakane ba mwinya. Nanshi twiulei kimfwa kyabo ne kunangila “umbubāna bwa mwinya.”—Ef. 5:8.