Les Témoins de Jéhovah — La foi en action, 2e partie : Que brille la lumière !
Batutu Rutherford ne bapwani nandi pa kupwa kukutululwa mu 1919, mwingilo mukatampe wadi utengele Befundi ba Bible. Monka mokilombwedilwe mu dishike dya video Batumoni ba Yehova—Lwitabijo Lwingila, Kipindi 2: Mwinya Uteme, Befundi ba Bible badi ba kulwibwa na bantu bavule, kwimvwanija kwabo kwa Bisonekwa kwadi kwa kwenda kutamina’ko, ne lwitabijo lwabo nalo lwenda lukomena’ko. (Nk. 4:18; Mal. 3:1-3; Yoa. 15:20) Pa kupwa kutala uno video, le ubwanya kulondolola bino bipangujo?
(1) I miswelo’ka imoimo yaingidije Befundi ba Bible mwanda wa kusalaja myanda miyampe? (2) Le i bika byalongekele ku bitango bikatampe bya mu 1931 ne mu 1935? (3) I mwanda’ka wa pa bula walombwelwe mu Kiteba kya Mulami kya difuku 1 Kweji 11, 1939? (4) Lombola byalongekele ku Madison Square Garden kitatyi kyadi kilonga Tutu Rutherford dishikulu dyandi dinena amba, “Buludiki ne Ndoe.” (5) I mwanda’ka utulumukwa wanene Tutu Knorr mu dishikulu dyandi dinena’mba, “Ino ndoe—Le ikeja?” (6) I mpangiko’ka yakwete Batumoni ba Yehova mu 1942, mwanda wa kutandabula mwingilo wa busapudi? (7) Tela bulwi bwalwilwe mu bidye mu États-Unis, Kanada, ne mu Grèce. (8) Masomo a Ngileade akweshe namani mu kutandabula mwingilo wa busapudi? (9) I mwingilo’ka mukatampe washilwilwe mu 1946, ne mwanda waka? (10) I bika byalongele bityebitye Batumoni ba Yehova mwanda wa kusaka’mba būmi bwabo bukwatañane na misoñanya ya mu Bible? (11) Shintulula bujadiki bumobumo bwalongelwe mu myaka ya 1970 amba bulongolodi bwendejibwe mungya kimfwa kya mu Bible. (12) Ino video ibakukwasha namani wimvwanije amba bine buno i bulongolodi bwa Yehova, ne amba aye ye wendeja’bo? (13) Le ibakomeja namani kusumininwa kobe amba wendelele kusapula na bupyasakane nansha shi kudi bijika? (14) I muswelo’ka otukokeja kwingidija ino video mwanda wa kukwasha babutule betu, befundi ba Bible ne bantu bakwabo?
Difuku dyonso dipita dibwejanga’ko mānga ya Batumoni ba Yehova. Le byobya bilongelwe bilombola namani bukomo bwetu mu mwingilo? Monka mwaingidile banabetu mafuku kunyuma, netu tupyasakanei nyeke amba ‘mwinya wetu uteme’!—2 Kod. 4:6.