Dishinda dya Mapepala—Dikwashanga pa Kushilula Bifundwa bya Bible
1. Mwanda waka bulongolodi bwa Yehova bukankamikanga nyeke basapudi baloeje mu dishinda dyabo dya mapepala?
1 Bantu bavule kebekalangapo na mutyima wa kwifunda netu Bible, inoko basangelanga kutanga mapepala etu. O mwanda bulongolodi bwa Yehova bukankamikanga nyeke basapudi baloeje mu dishinda dyabo dya kwabanya mapepala. Bantu po batanga mapepala etu kitatyi ne kitatyi, babwejanga’ko kwabila kwabo kwa Kinenwa kya Leza. (1 Pe. 2:2) Kadi bintu byobatanga bibwanya kwibakoka betabije kifundwa kya Bible.
2. Le i muswelo’ka wa kusonshila kusangela kwa boba botutana mu dishinda dyetu dya mapepala?
2 ‘Sangila’ Nkunwa ya Bubinebine: Pa kyaba kya kushīla muntu mapepala bitupu, mutweje mu mīsambo, kadi tompa kupwana nandi. Kino kikakukwasha ujingulule ngikadilo yandi, bimusangaja, ne nkulupilo yandi, bine bikakukwasha wisambe bya ñeni. (Nki. 16:23) Witeakanye pa kukapempula muntu ne muntu. Shi bikokejika, lombola mwanda mukatampe mu kīpi, Kisonekwa kidi mu dipepala, ne kusangila nkunwa yonso ya bubinebine mu mutyima wandi. (1 Ko. 3:6) Lemba difuku dyonso dyomwimwene, mabuku oshile, mitwe ya myanda ne Bisonekwa byomwisambile’po.
3. Le i misunsa inga yotufwaninwe kujokela boba badi mu dishinda dyetu dya mapepala?
3 Le Tukajokela’mo Misunsa Inga? Ufwaninwe kujoka musunsa umo ku kweji mwanda wa kupāna mapepala a panopano ku boba badi mu dishinda dyobe dya mapepala. Ino pakwabo, ukokeja kupempula bamobamo misunsa mivule, kukwatañana na ngikadilo yobe nansha mungya kusangela kwa muntu ne muntu. Kimfwa, ukokeja kujokela muntu kupwa kwa yenga umo nansha abidi pa kupwa kumushila mapepala, ne kunena amba, “Napityila kuno bityetye mwanda wa kukulombola mulangwe umo udi mu mapepala onakushidile.” Kino kikokeja kupa muntu mutyima wa kutanga kishinte kampanda. Shi ke mutange’kyo kala, ubwanya kumwipangula mulangwe wadi nao pa kishinte’kya ne kwisambila’po bityetye. Nansha kadi, shi muntu usangelanga kutanga mabuku etu, ukokeja kujoka ne kumupa trakte, boloshile, nansha dibuku dya kupāna mu mwine kweji’wa.
4. Le i bika biketukwasha kitatyi ne kitatyi pa kuyuka shi boba badi mu dishinda dyetu dya mapepala basangedile kwifunda Bible?
4 Kokilaija enka muntu akulombe kwifunda nandi. Abe ye wa kushilula. Shi nansha wadi upelanga kwifunda Bible mafuku kunyuma, ukokeja kwisambila kitatyi ne kitatyi pa kishinte kya mu Kiteba kya Mulami kinena amba, “Malondololo ku Bipangujo Bimanine pa Bible” shi usangedile mīsambo. Padi ubwanya kushilula nandi kifundwa kya pa kibelo. Inoko, shi i bikomo kushilula kifundwa, ubwanya kwendelela na kumuletela mapepala mwanda wa kutamija kusangela kwandi.