Tamija Kusepelela Kulombwelwe mu Dishinda dya Mapepala
1. Tukokeja kwingidija namani dishinda dya mapepala mwanda wa kutamija kusepelela kwa bantu?
1 Bantu bavule botwitana nabo mu mwingilo basangelanga kupempulwa ne kwitabija mabuku etu na nsangaji ino beshisa kwitabija kifundwa kya Bible kya kitatyi ne kitatyi. Muswelo umo wa kutamija kusepelela kwabo i na kutūla’ko dishinda dya mapepala. Shi ubashila muntu mapepala, soneka dijina dya muntu ne adelese yandi, difuku dyowamupempula, manimelo owamushila, ne kisonekwa kyomwesambila’po, pamo ne kintu kyonso kyowamona bu kyamusangaja. Shi nimelo impya ya dipepala ibalupuka, tala i myanda’ka idi’mo ikasangaja boba badi mu dishinda dyobe dya mapepala, kadi kesambile pa ino myanda pokebapempula dikwabo. (1 Kod. 9:19-23) Mwenda mafuku, kekukabulwepo kintu kikasamuna kusepelela kwabo mu ano majulunale kikebatonona kukimba kuyukila’ko myanda mikwabo.
2. Mwanda waka bantu bafwaninwe kupelakana kukimba Yehova pa kitanwa, ne tukalonga bika bikwabo mwanda wa kwibakwasha?
2 Inoko tuyukile amba bantu bavule kebakekalapo bengidi ba Yehova shi betangila’tu enka mapepala bitupu abo bene. Byokilomba bantu bapelakane kukimba Yehova pa kitanwa, le tukalonga bika bikwabo mwanda wa kwibakwasha? (Zef. 2:2, 3; Kus. 14:6, 7) Tukokeja kutamija kusepelela kwabo na kwisambila nabo pa kisonekwa kisañune kala ponso potwibashila mapepala.
3. (a) Tukokeja kuteakanya namani mīsambo mivule ya kisonekwa kimo? (b) I myanda’ka mikatampe itele’ko bantu ba mu wenu mwanda mutyima?
3 Mīsambo ya Kisonekwa Kimo: Langulukila pa boba badi mu dishinda dyobe dya mapepala, uteakanye mīsambo mivule ya kisonekwa kimo ikwatañene na bisakibwa bya umo ne umo. (Fid. 2:4) Kimfwa, shi muntu wafwidilwe panopano muntu waswele, mu kujokela’mo kobe kuvule ubwanya kwisambila nandi pa byobya binena Bible pa mwikadile bafwe ne pa lukulupilo lwa lusangukilo. Myanda idi mu dibuku Comment raisonner mu mutwe wa mwanda unena amba “Mort” (Lufu) ne “Résurrection” (Lusangukilo) ikokeja kukukwasha uteakanye mīsambo ya kisonekwa kimo. Kupwa papo mīsambo mikwabo itala pa myanda ikwatañene nayo ikokeja kulonda’po, kimfwa muswelo ukapwa misongo, bununu, ne lufu. Kisakwa kine i kutana mwanda usangaja muntu ne kumulombola bityebitye byobya binena Bible pa mwine mwanda’wa.
4. Mwanda waka i kya kamweno kupāna kwivwanija potutanga Bisonekwa, ne tukapāna’ko muswelo’ka?
4 Pāna Kwivwanija: Nansha byobikalanga biyampe kwisamba mīsambo mīpi ne ipēla, ino bilomba kulonga bivule, ke’nkapo’tu kutanga kisonekwa kisañune kete. Satana i musabe meso a mutyima a bantu bakateja myanda miyampe. (2 Kod. 4:3, 4) Eyo, nansha ke boba bene bebidile kala Bible bafwaninwe kukwashibwa pa kumwivwanija. (Bil. 8:30, 31) Pa kino, witūdile’ko kitatyi kya kushintulula ne kwelekeja kisonekwa, monka molongolwelanga mwisambo wa ku Masomo a Mwingilo wa Kiteokratike. (Bil. 17:3) Longa bukomo bwa muntu amone kamweno kadi na Kinenwa kya Leza mu būmi bwandi.
5. Bupempudi mu dishinda dya mapepala bukokeja kwikala ke kifundwa kya Bible namani?
5 Shi muntu usangela byobya byaefunda, tandabula bityebitye mīsambo na kwela’mo bisonekwa bya Bible bibidi nansha bisatu mu bupempudi ne bupempudi. Kimba mikenga ya kumutweja mu boloshile Kisaka Leza nansha mu dibuku Buyuki. Mu uno muswelo, bupempudi mu dishinda dya mapepala bukafula ku kwikala ke kifundwa kya Bible.