Tulumbululei Manwa Etu mu Mwingilo​—Na Kusapula bininge mu Dishinda dya Mapepala.

Kyokwikadile na Mvubu: Kudi bantu bavule batañanga mapepala etu ino kusaka kwifunda netu Bible mpika. Padi balamete ku mutōtelo wabo, nansha kadi padi bamwene’mba kebadipo na kitatyi kya kwifunda. Inoko, byobatanga mapepala etu kitatyi ne kitatyi, babwanya kwabila kuyuka Kinenwa kya Leza. (1 Pet. 2:2) Kishinte kampanda kibwanya kwibatenga ku mutyima, nansha padi ngikadilo yabo ibwanya kushinta. Kwibapempula kyaba ne kyaba kukebakwasha betwibidile kadi kuketukwasha twifunde kuyuka byobasenswe ne byobatele’ko mutyima. Penepa, tukabwanya kushilula nabo kifundwa kya Bible.

Mwa Kulongela:

• Kweji ne kweji, witūdile’ko kitatyi kya kukebapa mapepala mapya, Kiteba kya Mulami ne Réveillez-vous! Kyaba kimo mu kweji, ukokeja kukebapempula mwanda wa kulangula kyaka kyabo pa mwanda umo wa mu dipepala dyowashile, nansha kwibapa dibuku dya kupāna mu kweji’wa. Kokelwa kulemba.—Tala Mwingilo Wetu wa Bulopwe wa Kweji 1, 2014, paje 3. 

• Teakanya kujokela’mo kupya . Pa kyaba kya kumushila muntu mapepala bitupu, wisambe nandi, kadi tompa kupwana nandi kufika ne byolangula kusangela kwandi.

• Jingulula mikenga ya kushilula kifundwa. Shi mu dishinda dyobe muntu wakwipangula binena Bible pa mwanda kampanda, muletele dibuku didi’mo kilondololwa, mwisambile’po. Pa kwenda, mwipangule kipangujo kikwatañene na mwanda, kya kwisambila’po difuku dikwabo. Shi mwisambanga kyaba kivule kupyityila ku Bible nansha ku mabuku etu a kwifunda, nabya i kifundwa kya Bible kyoendeja. Le wapele muntu boloshile Myanda Miyampe ne kushilula nandi kifundwa mu kīpi? Le wamulombwele video Mwanda Waka Twifunde Bible? ne I Bika Biloñwanga mu Kifundwa kya Bible? Nansha shi muntu kaitabijepo kifundwa mafuku mapite, padi ngikadila yandi ikokeja kushinta. Le ke biyampepo kutompa monka?

Tompa Kulonga Namino Uno Kweji:

• Lemba majina a boba badi mu dishinda dyobe dya mapepala. Wibape mapepala a panopano ne kwibalaa amba usa kwibaselela makwabo alonda’ko.