Malondololo Ku Bipangujo Byenu

◼ Lelo basapudi bafwaninwe kwingidija Entelenete pa kusapwila ne kwifunda na bēni bashikatanga mu ntanda ingi?

Basapudi bamo bengidijanga Entelenete pa kusokola bifundwa bya Bible mu matanda mukankajibwe mwingilo wetu nansha momwa mudi basapudi batyetye. Kyaba kimo kulupukanga bipa biyampe. Inoko, kudi byaka shi basapudi betumina misapu ya ku Entelenete nansha kwishinta milangwe na bēni mu bikwe bya mīsambo. (Tala Mwingilo Wetu wa Bulopwe wa Kweji 7, 2007 p. 3.) Nansha kikimbwa i kufikila bantu ba mityima miyampe na musapu wa Bulopwe, ino mīsambo ikokeja kutwala tutu nansha kaka ku kupwana na babi, kubadila’mo ne batupondo. (1 Ko. 1:19-25; Kol. 2:8) Ne kadi, mu matanda mukankajibwe mwingilo wa Bulopwe nansha moupelejibwe, kwitumina mikanda kukokeja kusantaulwa na balupusa. Ne ino mikanda ikokeja kutūla batutu ne bakaka ba mu ntanda’ya mu kyaka. O mwanda, basapudi kebafwaninwepo kukimba bantu ba ntanda ingi pa Entelenete ba kwisamba nabo myanda miyampe.

Shi tubasapwila bya kiponka na ponka mweni utambile mu ntanda ingi, ketufwaninwepo kutamija kusangela kwandi aye papo ke mujokele kwabo, poso shi musambo uletele’po bulombodi bwishile. I biyampe tumulombole mwa kwingidijija jw.org mwa kuyukila’ko myanda mivule nansha mwa kutumina mikanda ku bilo ya musambo wa mwabo. Kadi tubwanya kumukankamika ende ku Njibo ya Bulopwe idi kubwipi na kwabo. Shako, Mobo a Bulopwe keadipo mu matanda amoamo. Shi aye usaka kupempulwa na Batumoni ba mu wabo mwaba, tufwaninwe kudinga fomu Veuillez suivre l’intérêt (S-43) ne kupa’ye mulembi, nandi ukatuma’ye kupityila ku jw.org. Bilo ya musambo itala mwingilo wa mu ntanda mudi muntu usangedile musapu ye uyukile ngikadilo ya mwabo kadi ye udi na mukenga muyampe wa kumukwasha ku mushipiditu. Tala Mwingilo Wetu wa Bulopwe wa Kweji 6, 2014, p. 7, ne Mwingilo Wetu wa Bulopwe wa Kweji 11, 2011 p. 2.

Shi muntu otusapwilanga wavilukila mu ntanda mikwabo nansha shi twifundanga na muntu udi mu ntanda ingi otweyukile nandi ku Entelenete, nabya tufwaninwe kulonda buludiki bwaletwa kūlu’bu. Inoko, tukokeja kwendelela kutamija kusangela kwandi kufika’nka ne byaketana na basapudi ba mu mwine mwaba’wa. Ino shi muntu’wa udi mu ntanda mukankajibwe mwingilo wetu nansha moupelejibwe, i kipite buya kudyumuka potwisamba nandi myanda ya mu Bible kupityila ku mukanda, ku telefone, nansha ku Entelenete.—Mat. 10:16