Malondololo ku Bipangujo Byenu

◼ I ani ufwaninwe kudinga kakanda ka kulombela’po mabuku (coupons) nansha kwialombela ku Entelenete?

Divule dine mabuku etu adi na kakanda kadiñwanga ne kutumwa ku bilo ya musambo mwanda wa kulomba mabuku nansha kupempulwa na Batumoni ba Yehova. Kadi diteba dyetu dya Entelenete dya www.watchtower.org dikokeja kwingidijibwa mwanda wa kulomba kifundwa kya Bible. Ino mpangiko i mikwashe bavule befunde bubinebine. Inoko, kumwekanga makambakano shi basapudi bengidija bino bingidilwa mwanda wa kulombela babutule babo nansha bantu bakwabo bukwashi bwa ku mushipiditu.

Bantu bamo batuminwa mabuku na bilo ya musambo okebelombelepo batompolanga, bamonanga amba bulongolodi bwetu wibalondalondanga, ne i bwibalembe ku mukanda wa bantu bobatuminanga mabuku kitatyi ne kitatyi. Basapudi batuminwe kukapempula muntu umo kalombelepo kupempulwa, batene makambakano kitatyi kyāfityilwe uno muntu. O mwanda, bantu balomba kupityila ku diteba dyetu dya Entelenete nansha ku kakakanda ka kulombela’po mabuku, bafwaninwe kwikala bantu basangedile abo bene, ke basapudipo bakulombela bakwabo. Pavule pene, shi tubayuka amba musapudi i mulombele muntu kampanda, mabuku’a keakatumwepo.

Penepa, i muswe’ka otubwanya kukwasha ku mushipiditu mubutule nansha otwiyukile nandi? Shi usaka atambule mabuku, ubulwe’po kumutumina’o abe mwine bu kyabuntu? Shi walombwele kusangela ne usaka kupempulwa na batumoni ba Yehova, ino abe kuyukilepo mwa kwimwena na bakulumpe ba pa kipwilo kya pa kifuko’kya, ukatuma fomu Veuillez suivre l’intérêt (S-43) kudi mulembi wa pa kyenu kipwilo, mwine ukamubandaula ne kutuma’ye ku bilo ya musambo. Inoko, shi muntu usangedile udi mu kifungo, kaso nansha lupitalo, kufwaninwepo kulembela bilo ya musambo pa kyandi kyaba. Ino ubwanya kumukankamika esambe na banabetu bapempulanga ano mobo nansha kulembela bilo ya musambo aye mwine.