Mwa Kutamijija​—Buswe bwa Kusanswa Leza ne Mukwetu

Nansha bene Kidishitu byokebakidipo munshi mwa Mukanda wa Bijila wa Mosesa, inoko ino mbila ibidi mitabuke bukatampe ya mu bino Bijila ya kusanswa Leza ne mukwetu ikilombola mu kīpi bine bisaka Yehova kotudi. (Mat 22:37-39) Buno buswe ketubutulwangapo nabo. Bulombanga kwibutamija. Muswelo’ka? Muswelo umo bidi wa mvubu i kutanga Bible difuku ne difuku. Potubandaula ngikadila palapala ya bumuntu bwa Leza idi mu Bisonekwa, tubandilanga “buya bwa Yehova.” (Ñi 27:4) Ku mfulo, buswe botumuswele bukatama kadi tukekala na mulangilo pamo na wandi. Kino kiketulengeja tulame mbila ya Leza, ne yoya ya kwikala na buswe bwa kwipānina bakwetu. (Yoa 13:34, 35; 1Yo 5:3) Tala myanda isatu ikokeja kulengeja butangi bwa Bible bwikale busangaja:

• Ingidija mifwatakanyo ne byumvwanino byobe. Fwatakanya bwa abe utenwe’ko. Le i bika byowamona, byowateja ne byowalula? Le i mwiivwanino’ka udi padi na boba besambilwa’po?

  

• Shinta manwa obe. Tala byokokeja kulonga: Tanga na diwi ditunduke, nansha kuteja mawi makwatwe koku ulonda mu Bible obe. Tanga myanda ya muntu kampanda wa mu Bible nansha mwanda kampanda pa kyaba kya kutanga mashapita moelondela. Kimfwa, ingidija kipindi 4 nansha kipindi 16 mu Kabuku Ketukwasha Twifunde Kinenwa kya Leza pa kutanga myanda ya Yesu. Tanga shapita yense mutuntulu uselelwe’mo kisonekwa kya difuku. Tanga mikanda ya mu Bible mungya bitatyi byoyālembelwe.

  

• Tanga mwanda wa kwivwanija. I kipite buya kutanga nansha shapita umo ku difuku, na kulangulukila’po ne kumwivwanija pa kyaba kya kutanga mashapita mavule mwanda’tu wa kwilundikila buyuki. Bandaula myanda ya kūlu ne kunshi. Jinguluja kamwanda ne kamwanda. Ingidija tulata ne bisonekwa bya kunyemena’ko. Kimba mwanda okwivwanijepo. Shi bibwanika, kitatyi kya kulanguluka kikale kya bula bumo na kyowatañanga.