MWA KUPWILA MUSHIKWA

1 | Leka Kwikala na Mboloji

Bifundija Bible:

“Leza kadipo na mboloji, ino mu mizo yonso yewa [ense] umutyina ne ulonga byoloke ye witabijibwa nandi.”—BILONGWA 10:34, 35.

Mobishintulwila:

Yehovaa Leza ketumonengapo bu ba mvubu pa mwanda wa muzo wetu, musaka wetu, lukoba lwetu, nansha bibidiji byetu. Ino utanga mutyima ku kintu kya mvubu—ko kunena’mba mwine motwikadile munda. Muntu bitupu “umonanga byobya bimweka na meso, ino Yehova aye umonanga mu mutyima.”—1 Samwele 16:7.

Byobwanya Kulonga:

Nansha byoketubwanyapo kuyuka bidi mu mityima ya bantu, tukokeja kulonga bukomo bwa kwiula Leza ne kumona bakwetu pampikwa mboloji. Ketwakimonai bantu mu kikonge, ino twibamonei wa pandi wa pandi. Shi ubamone amba udi na milangwe mibi pa bakwenu—padi bantu ba lukoba lungi nansha muzo ungi, lomba Leza akukwashe uleke kwikala na milangwe mibi pobadi. (Ñimbo ya Mitōto 139:23, 24) Shi ulombe Yehova pampikwa budimbidimbi amba akupe bukomo bwa kuleka mboloji, ubwanya kukulupila’mba usa kukwivwana ne kukukwasha.—1 Petelo 3:12.

a Yehova i dijina dya Leza dya bunka.—Ñimbo ya Mitōto 83:18.

“Ponso ponadi netana na muzungu, kebyadipo bipita biyampe . . . Nabadilwe mu kisaka kya ntanda yonso kya bana na bana.”—TITUS

Mwanda Mumweke—TITUS

Wanekenye Mushikwa

Titus wakatwelele mu kisumpi kya bantomboki badi balwa na bijila bibi bya kwisañuna kwa nkoba. Unena’mba: “Twadi twenda mu vile ku bifuko kobadi bapeleja bantu bafīta kufika, kimfwa ku mahotela ne ku mabala, mwanda’tu wa kukolomona ñuma.” Titus unena’mba twadi tulonga nabya pa mwanda wa mushikwa, kadi ubweja’ko amba: “Shi tubashilula kwipotomeja na muntu, ekale mwana-mulume nansha mwana-mukaji, ami ye wadi ubadikila kwela kikoni.”

Titus waanjile kushinta kitatyi kyaashilwile kwifunda Bible na Batumoni ba Yehova. Paatangile Bible, wamukweshe ashinte. Mulao wa mu mafuku a kumeso utala ino ntanda wamusangeje bininge wa amba, “lufu kelukekala’kopo dikwabo, nansha madilo nansha miyoa nansha misanshi mine keikekala’kopo monka.”—Kusokwelwa 21:3, 4.

Dibajinji, Titus wadi wikonda bininge pa kuleka kushikwa bantu mu mutyima wandi. Unena’mba, “byadi bikomo bininge kushinta mulangilo wami ne bilongwa byami.” Ino bintu byamukweshe i byobya byaefundile mu Bilongwa 10:34, 35, bine bilombola’mba Leza kadipo na mboloji.

Le byafudile kwepi? Titus ushintulula’mba: “Nafudile ku kuyuka’mba Batumoni ba Yehova badi mu mutōtelo wa bine ponamwene amba, besenswe pampikwa kubanga musaka nansha lukoba lwabo. Kumeso kwa ami kubatyijibwa, Kamoni umo muzungu waungityile nkadye bya kudya kwandi. Namwene’nka bwa kilotwa. Mwanda ponso ponadi netana na muzungu, kebyadipo bipita biyampe, ino pano nadi nenwe kukadya ku yandi njibo. Nabadilwe mu kisaka kya ntanda yonso kya bana na bana.”