MWA KUPWILA MUSHIKWA

4 | Nekenya Mushikwa Na Bukwashi Bwa Leza

Bifundija Bible:

“Kipa kya mushipiditu i buswe, nsangaji, ndoe, kitūkijetyima, kanye, buyampe, lwitabijo, kutalala, kwīfula.”—BENE NGALATEA 5:22, 23.

Mobishintulwila:

Bibwanika kuleka mushikwa na bukwashi bwa Leza. Mushipiditu wandi ujila ubwanya kwitukwasha twikale na ngikadila, yoketwadipo ba kwikala nayo na bukomo bwa batwe bene. O mwanda pa kyaba kya kulonga bukomo bwa kupwa mushikwa na bukomo bwa batwe bene, i biyampe tukulupile mu bukwashi bwitukwasha Leza. Shi tulonge namino, tukeivwana na mwēivwanine mutumibwa Polo wālembele amba: “Mu byonsololo ngidi na bukomo kupityila kudi yewa unkomeja.” (Bene Fidipai 4:13) Kadi tukabwanya kunena’mba: “Bukwashi bwami butambanga kudi Yehova.”—Ñimbo ya Mitōto 121:2.

Byobwanya Kulonga:

“Yehova wangalamwine naleka bya lūma nkendi muntu uleta ndoe.”—WALDO

Lomba Yehova pampikwa budimbidimbi akupe mushipiditu ujila. (Luka 11:13) Mulombe akukwashe umwekeje ngikadila miyampe mu bobe būmi. Wifunde byobya binena Bible pa ngikadila ibwanya kukukwasha uleke mushikwa, kimfwa buswe, ndoe, kitūkijetyima ne kwīfula. Kimba muswelo wa kwikala na ino ngikadila mu būmi bobe. Kadi pwana na bantu balonga bukomo bwa kwikala na ino ngikadila. Bano balunda babwanya ‘kukutonwena ku buswe ne ku mingilo milumbuluke.’—Bahebelu 10:24; kunshi kwa dyani.

Mwanda Mumweke—WALDO

Wanekenye Mushikwa Mubimubi

Waldo watamīne mu būmi butyani bwamulengeje ekale na mushikwa. Unena’mba: “Nadi nekupila kyaba ne kyaba mu bipito na bantu batoma bitomibwa bikolwañana . . . Difuku dimo, katūtwa-bila umo kinkwa nami wakanena muntu utumbīle kukupijana angipaye, ino nalonga bukomo bwa kunyema mutapwe bilonda.”

Waldo kasangelepo pashilwile wandi mukaji kwifunda Bible na Batumoni ba Yehova. Unena’mba: “Nadi nshikilwe Batumoni, kadi nadi nebatuka kyaba kivule. Ino abo badi balonga bintu’nka mu ndoe.”

Mwenda mafuku Waldo nandi washilula kwifunda Bible. Unena’mba: “Kebyadipo bipēla kwingidija byonadi nefunda. Nadi nanga’mba nkikabwanyapo kwibeja ku ngikadilo yami ya bukalabale.” Ino wefunda kintu kimo mu Bible kyamulengeje ashinte bininge.

Waldo unena’mba: “Difuku dimo, Alejandro wadi umfundija, waunena kutanga Bene Ngalatea 5:22, 23. . . . Alejandro washintulula’mba nkikatamijapo ino ngikadila na bukomo bwa ami mwine, ino i na bukomo bwa mushipiditu ujila wa Leza. Buno bubinebine bwashinta mumweno wami!”

Waldo pa kukulupila mu bukwashi bwa Leza, walekele lekē mushikwa mu būmi bwandi. Unena’mba: “Babutule ne balunda nami ba kala kebabwanyapo kwivwanija muswelo onashintyile.” Kadi ubweja’ko amba: “Yehova wangalamwine naleka bya lūma nkendi muntu uleta ndoe.”