Mwa Kwikadila na Ndoe Nansha Byokudi Mavita ne Bya Lūma
Gary waingile mu busola mafuku ku nyuma unena amba, “Ponadi nkyefundile Bible nkyadipo ndyukile mwanda waka ntanda i miyule bukalabale, bukondame ne tuvutakanya. Inoko pano, kendi na ndoe ya mutyima. Ndyukile amba Yehova usa kwalamuna ntanda ikale ke kifuko kya mutyima-ntenke.”
Gary kadipo bunka. Tala Bible moyakwashishe bantu bakwabo.
BIBLE UNENA AMBA: “Abe Yehova, wi muyampe kadi kwijepo kulekela.”—Ñimbo ya Mitōto 86:5.
BINO BINENWA MOBYAKWASHISHE BANTU: “Kino kisonekwa kyankulupije amba Yehova i wa lusa. Ndyukile amba usakanga kundekela bubi bonso bonalongele mafuku ku nyuma ponadi ndwa mavita.”—Wilmar, wa mu Kolombi.
BIBLE UNENA AMBA: “Napange madiulu mapya ne ntanda mipya; kadi bintu bya kala kebikavulukwapo, nansha kwiya’byo ku mutyima kwine mpika.”—Isaya 65:17.
BINO BINENWA MOBYAKWASHISHE BANTU: “Byonapityile’mo ponadi mu mwingilo wa busola i bilengeje ñeni yami ileke kushikata pamo kadi nzumbije mutyima. Ino kino kisonekwa kyaunkulupije amba panopano ponka Yehova usa kutalula moyo mu ñeni yami ne kunkwasha ndeke kulangulukila pa bintu bilenga moyo. Kebikekalapo mu mutyima ne mu ñeni yami. Bine kino, i kyabuntu kiyampe’po kasha!”—Zafirah, wa mu États-Unis.
BIBLE UNENA AMBA: “Mu mafuku andi, moloke ukamonanga biyampe, kadi ndoe ikavula kufika ne bijimina kweji.”—Ñimbo ya Mitōto 72:7.
BINO BINENWA MOBYAKWASHISHE BANTU: “Divule dine nangulukilanga pa bino binenwa. Panopano ponka mavita ne bintu bibi bilupukanga’ko bisa kutalulwa’ko. Kadi ketukazumbijapo mutyima pa bibwanya kufikila baswe betu.”—Oleksandra, wa mu Ikrene.
BIBLE UNENA AMBA: “Bafwe bobe bakekala bōmi. . . . Langukai mwele nsadi ya tusepo, banwe bekele mu luvumbi!”—Isaya 26:19.
BINO BINENWA MOBYAKWASHISHE BANTU: “Bantu bavule ba mu kyetu kisaka baipailwe mu divita dya Batutsi. Inoko kino kisonekwa kyankulupije amba nkebamona monka. Ntengēle na kipyupyu kwivwana mawi abo a nsangaji pobakasangulwa!”—Marie, wa mu Rwanda.
BIBLE UNENA AMBA: “Kubashala kakitatyi katyetye’tu, babi kebakekala’kopo monka . . . ino betyepeje bakapyananga ntanda, kadi bakaloelelwanga bininge mu bungibungi bwa ndoe.”—Ñimbo ya Mitōto 37:10, 11.
BINO BINENWA MOBYAKWASHISHE BANTU: “Nansha divita byodyapwile, inoko bukondame ne bantu babi bikidi’ko. Ano mavese ampanga bukomo. Yehova umwene bintu byonso kadi wivwanije ngikadilo yondi’mo. I mulaye amba panopano ponka masusu onso asa kupwa kadi nsa kwibīlwa.”—Daler, wa mu Tajikista.
Bantu batelelwe mu dino dipepala babadilwa mu midiyo ya Batumoni ba Yehova, bene bakwashibwe na Bible batane ndoe. Befundile mwa kulekela mboloji ya lukoba, ya muzo, ya tubila, ne mushikwa. (Bene Efisesa 4:31, 32) Batumoni ba Yehova kebekujangapo mu myanda ya politike kadi bapelanga kukwatakanya bya lūma.—Yoano 18:36.
Batumoni ba Yehova bakwashibwanga na kisaka kyabo kya buswe kya bu bana na bana kya ntanda yonso. (Yoano 13:35) Oleksandra otwatelanga kala, banyemēne mu ntanda ingi na kaka wandi pa mwanda wa divita, unena amba: “Potwafikile’tu dya ku mukalo, bukidi bonka twamona Batumoni ba Yehova ba kotwanyemēne. Badi’ko mwanda wa kwitutundaila. Muswelo obetukwatakenye wetukweshe twibidile būmi bwa mu ntanda ingi motwadi bu balefije.”
Tukwita na kyanga wanze kutanwa ku kupwila kwine kotwifundanga musapu wa ndoe wa mu Bible, ne muswelo wa kwiwingidija. Enda pa jw.org mwanda wa utane kifuko kidi kubwipi na koshikatanga, nansha kulomba wifunde Bible ku bitupu na Kamoni wa Yehova umo mu dibuku Ikala Mūmi Nyeke!