Muswelo Witukwashanga Yehova Tūminine

1. Mwanda waka bitulomba kūminina, ne i ani uketukwasha tūminine? (1 Petelo 5:10)

BANTU ba Yehova basakilwa kūminina mu ano mafuku a mfulo makomo. Kudi bamo bekonda na misongo ya zenzeka. Bakwabo nabo bekonda na misanshi ya kujimija baswe babo. Bangi nabo bekonda na kulwibwa mu kisaka nansha na ba lupusa. (Mat. 10:​18, 36, 37) Kulupila’mba nansha shi wikondanga na makambakano’ka, Yehova ubwanya kukukwasha wiominine.—Tanga 1 Petelo 5:10.

2. Le bukomo bwetu bwa kūminina butambanga kwepi?

² Kūminina i bukomo budi na muntu bwa kushimatyija, ne kulama lukulupilo kitatyi kyatanwa na bijika, kupangwapangwa, ne matompo. Bukomo botudi nabo bwa kūminina, kebutambengapo kotudi batwe bene, ino butambanga kudi Yehova mwine witupanga “bukomo butabukile bwikalanga na bantu.” (2 Ko. 4:7) Mu kino kishinte, tusa kwisambila pa bintu biná bitūdile’ko Yehova bine bibwanya kwitukwasha tūminine. Kadi tusa kumona ne muswelo otubwanya kumwena mu bino bintu byonso.

MILOMBELO

3. Mwanda waka tubwanya kunena’mba milombelo i kingelengele?

³ Yehova i mwitulongele kintu kya kutendelwa kibwanya kwitukwasha tūminine. I mulengeje bikale bipēla kwisamba nandi nansha byotudi bantu ba bubi. (Bah. 4:16) Langulukila pa kino: Tubwanya kulombela kudi Yehova kitatyi kyo-kyonso ne mu myanda yo-yonso. Ubwanya kwitwivwana mu ludimi lo-lonso, mu kifuko kyo-kyonso, enka ne potudi kwa bunka bwetu nansha mu kifungo. (Yona 2:​1, 2; Bil. 16:​25, 26) Shi tubazumbija mutyima’mba ketubwanyapo kusokola bishima bya kunena mwanda wa kulombola milangwe yetu, tuvulukei amba Yehova udi na bukomo bwa kwivwanija byotukimba kunena. (Loma 8:​26, 27) Bine, milombelo i kingelengele!

4. Mwanda waka tubwanya kunena’mba milombelo yotulomba’mba tūminine i mikwatañane na kiswa-mutyima kya Yehova?

⁴ Yehova witukulupija mu Kinenwa kyandi amba “shi tumulombe kintu kyonso, shi kika shi kika, mwendele kiswa-mutyima kyandi, witwivwananga.” (1 Yo. 5:14) Le tubwanya kulomba Yehova etukwashe tūminine? En-en! Mwanda kulonga namino i kukwatañane na kiswa-mutyima kyandi. Mwanda waka tubanena namino? Mwanda shi tūminina matompo, tupanga Yehova mukenga wa kulondolola yewa umukolomona, ke Satana Dyabola kadi. (Nki. 27:11) O mwanda Bible unena padi Yehova amba, usakanga “kulombola bukomo bwandi pangala pa boba badi na mutyima mubwane kwadi.” (2 Bi. 16:9) Nanshi tukulupilei amba Yehova udi na bukomo ne mutyima wa kwitukwasha tūminine.—Isa. 30:18; 41:10; Luka 11:13.

5. Le milombelo ibwanya namani kwitupa ndoe ya mutyima? (Isaya 26:3)

⁵ Bible unena’mba kitatyi kyotulombela na kininga pa mwanda witutala, “ndoe ya Leza itabukile ñeni yonso ikalama mityima [yetu] ne mifwatakanyo [yetu].” (Fid. 4:7) Le kino kishintulula namani? Bantu kebatōtangapo Yehova bekondanga na makambakano, kadi babwanya kwingidija manwa palapala mwanda wa bekale na ndoe ya mutyima. Kimfwa, bamo bengidijanga manwa a kutalula milangwe mwanda wa belwe byonso, kubadila’mo ne makambakano abo mene. Inoko kutalula milangwe namino i kyaka ku mushipiditu. (Dingakanya na Mateo 12:​43-45.) Ino ndoe itupanga Yehova, i ya peulu bininge kupita ndoe yo-yonso ibwanya kukimba muntu na kwingidija manwa a kwitalula milangwe. Shi tulombela kudi Yehova, tulombolanga’mba tukulupile mwadi, kadi nandi uketupa “ndoe ya endaenda.” (Tanga Isaya 26:3.) Muswelo umo bidi uloñanga Yehova namino i na kwitukwasha tuvuluke bubine botwefundile mu Kinenwa kyandi. Buno bubine butalajanga ñeni ne mityima yetu, mwanda tuyukile amba Yehova witukwatakanyanga kadi usakanga bintu bitwendekele biyampe.—Ñim. 62:​1, 2.

6. Le i muswelo’ka obwanya kumwena ne pa mfulo mu ino mpangiko ya milombelo? (Tala ne kifwatulo.)

⁶ Byobwanya kulonga. Pouminina matompo, “ela kiselwa kyobe kilēma padi Yehova” kadi mulombe akupe ndoe yandi. (Ñim. 55:22) Ne kadi mulombe tunangu tosakilwa mwanda wa umone mwa kulwila na makambakano. (Nki. 2:​10, 11) Pozenza Yehova akupe bukomo bwa kūminina, kokelwa ne kumufwija’ko. (Fid. 4:6) Tala bintu bilombola’mba Yehova ukukwashanga mu makambakano, kadi mufwije’ko pa buno bukwashi bwandi. Kokileka makambakano obe akulengeje uleke kumona muswelo ke mukukwashe Yehova.—Ñim. 16:​5, 6.

KINENWA KYA LEZA

7. Le kwifunda Bible kubwanya kwitukwasha namani tūminine?

⁷ Yehova i mwitupe Kinenwa kyandi mwanda wa kwitukwasha tūminine. Mu Bible mudi mavese mavule etukulupija’mba Yehova uketukwatakanya. Tubandaulei’ko’tu kimfwa kimo. Mateo 6:8 unena’mba: “Shenu uyukile bine byomusakilwa ne banwe bene kemwamulombele’byo.” Yesu ye wānenene bino binenwa, kadi uyukile Yehova biyampe kutabuka muntu ye-yense. Nanshi ketudipo na bubinga bwa kutatena’mba Yehova ketutengapo mutyima kitatyi kyotutanwa na makambakano. Mu Bible mudi binenwa bivule pamo bwa bino, bine bibwanya kuningija kusumininwa kwetu kwa kwendelela na kūminina.—Ñim. 94:19.

8. (a) Leta kimfwa kimo kya musoñanya wa mu Bible ubwanya kwitukwasha tūminine. (b) Le i bika bibwanya kwitukwasha tuvuluke misoñanya ya mu Bible kitatyi kyotusakilwa’yo?

⁸ Misoñanya ya mu Bible ibwanya kwitukwasha tūminine. Mu ino misoñanya mudi tunangu twine tubwanya kwitukwasha tukwate butyibi buyampe. (Nki. 2:​6, 7) Kimfwa, Bible witukankamika tuleke kuzumbija mutyima pa dya kesha ino tukulupile mudi Yehova difuku ne difuku. (Mat. 6:34) Shi tudi na kibidiji kya kutanga Bible difuku ne difuku ne kulangulukila’po, biketupēlela kuvuluka misoñanya ya mu Bible yotusakilwa kadi pa kitatyi kyotusakilwa’yo.

9. Le nsekununi ya mu Bible ibwanya kuningija namani kikulupiji kyetu kya amba Yehova uketukwasha?

⁹ Kadi mu Bible mudi nsekununi ya bantu bākulupile mudi Yehova, nandi wēbakwasha. (Bah. 11:​32-34; Yak. 5:17) Kitatyi kyotulangulukila pa ino nsekununi, tuningijanga kikulupiji kyetu kya amba Yehova “i kinyemeno kyetu ne bukomo bwetu, bukwashi bupēla kusokola mu bitatyi bya tusua.” (Ñim. 46:1) Kulangulukila pa būmi bwa bengidi ba Yehova ba kikōkeji ba pa kala, kwitutononanga twiule lwitabijo lwabo ne kūminina kwabo.—Yak. 5:​10, 11.

10. Le tubwanya kumwena namani ne pa mfulo mu Kinenwa kya Leza?

¹⁰ Byobwanya kulonga. Tanga Bible difuku ne difuku, ne kulama mavese abwanya kukukwasha. Kadi bavule i bamone amba kubandaula kisonekwa kya difuku i muswelo muyampe wa kushilula difuku na milangwe ikankamika ya mu Bible. Kaka umo witwa bu Mariea wemwenine bubine bwa uno mwanda kitatyi kyakwetwe bambutwile bandi bonso misongo ya dyaya. Le i bika byamukweshe ominine kitatyi kyawadi ukwatakanya bambutwile bandi mu myeji mityetye kumeso kwa abo kufwa? Unena’mba, “Difuku ne difuku lubanga, mandaulanga kisonekwa kya difuku mu Tubandaulei Bisonekwa Difuku ne Difuku ne kulangulukila’po. Kulonga namino, kwankweshe ndyuje mu ñeni milangwe ya mu Bisonekwa, mine yadi inkwasha nte mutyima padi Yehova pa kyaba kya kuta’o pondi ne pa makambakano onadi nao.”—Ñim. 61:2.

BANABETU MU LWITABIJO

11. Mwanda waka kuyuka’mba ketudipo bunka kitatyi kyotūminina makambakano kwitukankamikanga?

¹¹ Yehova i mwitupe kisaka kya banabetu bene Kidishitu mwanda wa kwitukwasha tūminine. Kuyuka’tu amba “kisaka kituntulu kya [banabetu] mu ino ntanda kifikilwanga na masusu amo onka” kwitukulupijanga’mba ketudipo bunka. (1 Pe. 5:9) Ne i bine, nansha shi twikonde na makambakano’ka tuyukile amba kudi bantu bakwabo ke batanwe nao kadi beominine. Kino kilombola’mba netu tubwanya kūminina!—Bil. 14:22.

12. Le i muswelo’ka ubwanya kwitukwasha banabetu mu lwitabijo, ne le netu tubwanya kwibalongela bika? (2 Bene Kodinda 1:​3, 4)

¹² Kitatyi kyotūminina, banabetu mu lwitabijo betukankamikanga. Mutumibwa Polo wēmwenine bubine bwa uno mwanda. Divule wādi ufwija’ko boba bādi bamukwasha na kwibatela pa majina kitatyi kyaādi mu kifungo. Bādi basenga Polo, bamukankamika, ne kumukwatakanya mu miswelo mipotoloke. (Fid. 2:​25, 29, 30; Kol. 4:​10, 11) Dyalelo netu tubwanya kwimwena mwanda na uno. Kitatyi kyotusakilwa bukwashi pa kūminina, batutu ne bakaka betukwashanga; nabo shi kebasakilwa bukwashi, netu twibakwashanga.—Tanga 2 Bene Kodinda 1:​3, 4.

13. Le i bika byakweshe kaka witwa bu Maya ominine?

¹³ Kisaka kya banabetu kyakankamikile kaka witwa bu Maya ushikatanga mu Rusi. Njibo yandi yasātyilwe mu 2020, kadi mwenda mafuku bamukankeje kusapwila bantu bakwabo nkulupilo yandi. Maya unena’mba, “Mu bino bitatyi byonadi nzumbija mutyima, batutu ne bakaka badi bangita ne kunembela; ne kino kyaunkulupije amba basenswe. Nadi ndyukile nyeke amba ngidi mu kisaka kikatampe kadi kya buswe. Tamba mu 2020, nemwenine uno mwanda wa pa bula.”

14. Le i muswelo’ka otubwanya kumwena mu bukwashi bwa banabetu kitatyi kyotūminina makambakano? (Tala ne kifwatulo.)

¹⁴ Byobwanya kulonga. Kitatyi kyoūminina, pwana bininge na batutu ne bakaka. Kokikaka kulomba bukwashi ku bakulumpe. Babwanya kwikala pamo bwa “mwa kufyama kivula, kifuko kya kufyama mvula wa kimpumpu.” (Isa. 32:​2, kunshi kwa dyani) Vuluka’mba, banabetu mu lwitabijo nabo bomininanga makambakano. Kulongela muntu usakilwa bukwashi kilongwa kya kanye, kukakukwasha ulame nyeke bujalale ne kwikala na mumweno muyampe kitatyi kyoūminina makambakano obe.—Bil. 20:35.

LUKULUPILO LWETU

15. Le lukulupilo i lukwashe namani bantu ba kikōkeji, mwine mubadilwa ne Yesu? (Bahebelu 12:2)

¹⁵ Yehova i mwitupe lukulupilo lukomo lwine lwitukwasha tūminine. (Loma 15:13) Tala lukulupilo molwākwashishe Yesu ominine difuku dibi mpata mu būmi bwandi pano pa ntanda. (Tanga Bahebelu 12:2.) Yesu wādi uyukile amba kikōkeji kyandi kikakwasha ku kubingija dijina dya Yehova. Yesu wātele mutyima ku kwenda mūlu mudi Shandi ne kukengila mwenda mafuku na banababo mu Bulopwe momwa mūlu. Mo monka netu, kukulupila kotukulupile kukekala na būmi bwa nyeke mu ntanda mipya ya Leza, kwitukwashanga tūminine makambakano etutana mu ino ntanda ya Satana.

16. Le lukulupilo lwakweshe namani kaka umo ominine, ne i bika byotwifunda ku binenwa byandi?

¹⁶ Tala kukulupila mu Bulopwe mokwakwashishe kaka umo wa mu Rusi witwa bu Anna, pakwetwe wandi mulume ne kutūlwa mu kaso ka masusu. Anna wanenene mu kine kitatyi’kya’mba: “Kulombela pa lukulupilo lwetu lwa mu mafuku a kumeso ne kulangulukila’po, binkwashanga ndeke kutyumukwa mutyima. Ne mwivwanije amba ino ke mfulopo. Panopano ponka Yehova usa kunekenya bulwi, ne batwe bene tusa kwibunekenya.”

17. Le tukalombola namani amba tufwijanga’ko pa luno lukulupilo lwitupele Bible? (Tala ne kifwatulo.)

¹⁷ Byobwanya kulonga. Witūdile’ko kitatyi kya kulangulukila pa būmi bwa kutendelwa bwa mu mafuku a kumeso bwitulaile Yehova. Wimone mokekadila mu ntanda mipya ya Leza ne kumona mu ñeni madyese okekala nao. Nabya ukamona’mba makambakano owikonda nao i a ‘lupito kadi apēla.’ (2 Ko. 4:17) Nanshi, longa byonso byobwanya mwanda wa kusapwila bantu bakwabo luno lukulupilo. Langa mobasusukila pa kwikonda na makambakano mu ino ntanda ya Satana kwampikwa kuyuka mpango ya Leza ya būmi bwa kumeso. Shi wisamba nabo, nansha bityetye, ukebakwasha basangele kuyuka lukulupilo lwa Bulopwe lotudi nalo.

18. Mwanda waka tufwaninwe kukulupila mu milao ya Yehova?

¹⁸ Yoba pa kupwa kūminina matompo mavule wāsapwidile Yehova amba: “Pano nayuka’mba abe ubwanya kulonga bintu byonso ne amba i kutupu kintu kyolanga kulonga kekibwanikapo kodi.” (Yoba 42:2) Enka mwānenene Yoba, i kutupu kintu kibwanya kukalakanya Yehova kufikidija mpango yandi. Buno bubine bubwanya kwitukwasha netu tūminine. Tulete kimfwa, langa’po mwana-mukaji ubela, watyumukwa mutyima mwanda badokitele bavule abakomenwa kumundapa. Inoko kubaiya dokitele wa bwino kadi ukulupilwa, wasokola misongo, wamulombola’mba usa kumundapa. Bine mutyima ukamutūka nansha byobikamulomba kitatyi pa kukoma. Pano usa kūminina mwanda wayuka’mba kudi lukulupilo—lukulupilo lwa amba usa kukoma. Mo monka netu lukulupilo lwa kukekala mu Paladisa lwitukwashanga tūminine.

19. Le i bika byotusakilwa pa kūminina?

¹⁹ Enka motwekimwena, Yehova witukwashanga tūminine makambakano etu kupityila ku milombelo, Kinenwa kyandi, banabetu mu lwitabijo ne ku lukulupilo lwetu. Shi twingidije ne pa mfulo bino bintu byaetupele, Yehova uketukwatakanya mu makambakano onso otubwanya kwikonda nao, kufikija’nka ne difuku dyakatalula’ko makambakano mu ino ntanda ya Satana.—Fid. 4:13.