“Wi Muntu Mulēme Bininge”!

1-2. Le i muswelo’ka otubwanya kukulupila’mba twi balēme ku meso a Yehova?

MU BENGIDI balēme ba Yehova mudi bamo bemonanga abo bene bu kebadipo na mvubu. Padi i pa mwanda balongēlwe bintu bilombola’mba badi na mvubu mityetye. Le nobe kodi mutanwe na uno mwanda? Shi i amo, le i bika bibwanya kukukwasha ukulupile amba wi mulēme ku meso a Yehova?

² Kintu kimo bidi kibwanya kukukwasha i kubandaula nsekununi ya mu Bible mine ilombola muswelo usakanga Yehova bantu balongelwe bintu. Wandi Mwana Yesu, wālongēle bantu bintu na bulēme. Kulonga namino kwālombwele amba aye pamo ne Shandi bamonanga na mvubu mikatampe boba bemona bu ba mvubu mityetye. (Yoa. 5:19; Bah. 1:3) Mu kino kishinte, tusa kubandaula’mo: (1) muswelo wākweshe Yesu bantu bemone amba i balēme, ne (2) muswelo otubwanya kwikulupija batwe bene amba twi balēme ku meso a Leza.—Hak. 2:7.

MUSWELO WĀKWESHE YESU BANTU BEMONE AMBA I BALĒME

3. Le Yesu wālongēle namani bintu bene Ngadilea bāmulombele bukwashi?

³ Musunsa wa busatu wākasapwile Yesu mu Ngadilea, bantu ba mu bifuko palapala bāendele kwadi bāshilula kumuteja, kupwa nandi wēbondapa bulema bwabo. Yesu wāmwene amba “badi basusulwa kadi basūlwe pamo bwa mikōko yampikwa mukumbi.”(Mat. 9:36; tala bilembwa bya kwifunda mu Falanse.) Bendeji babo ba bipwilo bādi bebamona bu ba mvubu mityetye, enka ne kwibeta bu “bantu bafingwe mafingo.” (Yoa. 7:​47-49; bilembwa bya kwifunda mu Falanse) Inoko Yesu wālombwele amba wibalēmekele na kwitūdila’ko kitatyi kya kwibafundija ne kwibakomeja ku misongo yabo. (Mat. 9:35) Kadi pa mwanda wa kukwasha bantu bavule, wāfundije batumibwa bandi muswelo wa kusapula ne kwibapa bukomo bwa kukomeja babela ne babilema.—Mat. 10:​5-8.

4. Le i bika byotwifunda ku muswelo wādi ulongela Yesu bintu boba bādi bamonwa na bantu bakwabo bu ba mvubu mityetye?

⁴ Yesu wālombwele amba aye ne Shandi bamonanga na bulēme boba bamonwa na bantu bakwabo bu ba mvubu mityetye, na kulongela boba bādi bamuteja bintu na kanye ne na bulēme. Shi wingidilanga Yehova ino utatana’mba kudipo na bulēme, langulukila pa muswelo wādi utele Yesu mutyima bantu bādi basaka kumuteja, bene bādi bamonwa na bantu bakwabo bu ba mvubu mityetye. Kulonga namino kukakukwasha umone amba wi mulēme ku meso a Yehova.

5. Lombola ngikadilo yādi’mo mwana-mukaji mwine Ngadilea wētene na Yesu.

⁵ Yesu kādipo ufundija enka bibumbo kete, ino wādi uta muntu ne muntu mutyima. Kimfwa, kitatyi kyaādi usapula mu Ngadilea, wētene na mwana-mukaji wādi ususuka na muyeye wa mashi mu bula bwa myaka 12. (Mako 5:25) Ngikadilo yaādi’mo byoyādi imulengeja ekale wa disubi, muntu yense wa kumutenga wādi wākwikala wa disubi. Padi kino kyālengeje aleke kupityija kitatyi pamo na bantu. Kadi, kādipo ubwanya kwibungila pamo na bantu bakwabo nansha kukatanwa ku masobo a butōtyi a mu bantu bavule. (Levi 15:​19, 25) Na bubine, uno mwana-mukaji wāsusukile ku ngitu ne mu malango.—Mako 5:26.

6. Le i bika byālongele uno mwana-mukaji wa muyeye wa mashi pa kukoma?

⁶ Uno mwana-mukaji wāsusukile bininge wādi usaka Yesu amundape. Inoko, kāmufwenenepo kiponka na ponka. Mwanda waka? Padi i pa mwanda wādi wityepelwa nansha kulanga’mba usa kufutululwa pa mwanda wa misongo yandi. Nansha padi wādi na moyo wa amba Yesu usa kumupanga mwanda watwela mu kibumbo kya bantu aye papo wa disubi. O mwanda wātengele’tu kivwalwa kyandi kya pangala na kikulupiji kya amba usa kukoma. (Mako 5:​27, 28) Wāpadilwe mpalo pangala pa lwitabijo lwandi—ko kunena’mba wākomene. Yesu paādi ukimba kuyuka i ani wamutenga, uno mwana-mukaji wānenene amba i aye wamutenga. Le Yesu wālongele’po namani?

7. Le Yesu wālongēle namani bintu uno mwana-mukaji wāsusukile bininge? (Mako 5:34)

⁷ Yesu wālongēle uno mwana-mukaji bintu na kanye ne bulēme. Wāmwene amba uno mwana-mukaji waivwana ‘moyo ne luzakalo.’ (Mako 5:33) Aye pa kuyuka mwaādi wiivwanina, wēsambile nandi na kanye kadi bikankamika. Wāmwityile enka ne bu ‘wandi mwana’—kishima kilombola kisanso, bulēme, kanye, ne lusa. (Tanga Mako 5:34.) bilembwa bya kwifunda mu Falanse binena pangala pa kino kishima’mba: Ino “i nsekununi imo kete īsamba’mo Yesu na mwana-mukaji na kumutela bu ‘wandi mwana.’ Padi i pa mwanda wa ngikadilo mikomo yaādi’mo, nansha pa mwanda wa kuzakala kwaādi ‘uzakala.’” Fwatakanya’po mwāweivwanine! Shi Yesu kānenenepo bino binenwa bikulupija, uno mwana-mukaji wādi wa kukoma ku ngitu, inoko wādi wa kwendelela kwitopeka mu malango. Ino Yesu wāmukweshe emone bu mwana mulēme kudi Tata wandi wa buswe wa mūlu.

8. Le i bikoleja’ka byekondele na kaka umo wa mu Brezile?

⁸ Ne dyalelo nadyo, bengidi bamo ba Yehova bekondanga na misongo mine ibalengeja batyumukwe mutyima ne kwimona bu ba bule. Kaka Mariaa pania wa mu Brezile, wabutwilwe mulemane maulu onso abidi ne kuboko kwa lunkuso. Unena’mba, “Kitatyi kyonso ku masomo nadi nzobejibwa pa mwanda wa bulema bwami. Kadi badi bañinika ne majina asansa. Enka ne bantu ba mu kyami kisaka, kebadipo banongela bintu senene.”

9. Le i bika byakweshe Maria emone bu mulēme ku meso a Yehova?

⁹ Le Maria wakwashibwe namani? Pawaikele Kamoni wa Yehova, banababo mu lwitabijo bamusengele ne kumukwasha emone mumumwena Yehova. Unena’mba, “I bikomo’nka ne kuvuluka bantu bonso ke bankwashe! Mfwija’ko Yehova na mutyima wami onso pa kumpa kino kisaka kiyampe kya ku mushipiditu.” Batutu ne bakaka i bakwashe Maria emone amba i mulēme ku meso a Leza.

10. Le i makambakano’ka ēkondele na Madia mwine Makadala? (Tala ne bifwatulo.)

¹⁰ Kadi tubandaulei muswelo Yesu waākweshe Madia mwine Makadala. Wādi mukwatwe na bandemona basamba-babidi! (Luka 8:2) Ye uno wādi ulonga bintu bishile na byādi bilonga bantu bakwabo mwanda wādi na bandemona, kadi kino kyālengeje bantu bekale kulampe nandi. Mu bula bwa bino bitatyi bya makambakano mu bwandi būmi, ye uno wādi wimona bu mwelwe, wampikwa mutyima-ntenke, ne amba i kutupu wa kumukwasha. Ino mobimwekela, Yesu wāpangile bandemona bādi bamumwesha malwa, kupwa nandi wāikala mwanā bwanga mwipāne. Le i muswelo’ka mukwabo Yesu waākweshe Madia mwine Makadala emone bu mulēme kudi Leza?

11. Le Yesu wālombwele namani amba Madia mwine Makadala i mulēme kudi Leza? (Tala ne bifwatulo.)

¹¹ Yesu wāityile Madia mwine Makadala ende nandi mu mwingilo wa busapudi.b Kino kyāmukweshe endelele kumwena mu byādi bifundija Yesu bantu bakwabo. Kadi Yesu pa kupwa’tu kusanguka, wāmwekēle Madia. Ubadilwa mu bana ba bwanga babajinji bēsambile na Yesu mu dine difuku’dya. Kadi Yesu wāmupele enka ne mwingilo wa kukalombola batumibwa bandi amba i musanguke. Bine, kino i kilomboji kya kutendelwa kya amba, wādi mulēme ku meso a Yehova!—Yoa. 20:​11-18.

12. Le i bika byalengeje Lidia emone bu wa bule?

¹² Pamo’nka bwa Madia mwine Makadala, bantu bavule dyalelo bekondanga na milangwe ya kwimona bu bampikwa mvubu. Lidia kaka wa mu Eshipanye unena’mba kumeso kwa aye kubutulwa, inandi wadi ulanga ya kupulumuna dīmi. Uvuluka’mba enka ne paadi nkasampe, inandi wadi mumusūle kadi wadi umunena binenwa bisansa. Unena’mba: “Mu bwami būmi nadi nsaka kusanshibwa ne kwitabijibwa na bantu bakwabo. Nadi na moyo wa amba i kutupu muntu nansha umo ukansanswa, mwanda mama wami wadi unkulupija’mba ne muntu mubi.”

13. Le i bika byakweshe Lidia emone bu mulēme kudi Yehova?

¹³ Bintu byakweshe Lidia emone amba i mulēme ku meso a Yehova i kwifunda bubine, kulombela, binenwa bya kanye ne bilongwa bya banababo mu lwitabijo. Unena’mba: “Divule wami mulume unsapwilanga’mba unsenswe bininge. Umvulujanga kitatyi ne kitatyi ngikadila yami miyampe. Kadi ne balunda nami bakwabo ba buswe, bamvulujanga’nka namino.” Le kudi’ko muntu kampanda owavuluka usakilwa bukwashi pa kwivwanija’mba i mulēme ku meso a Yehova?

MUSWELO OTUBWANYA KWIMONA MWITUMWENA YEHOVA

14. Le 1 Samwele 16:7 witukwasha namani tumone muswelo umonanga Yehova bantu? (Tala ne kapango kanena’mba “Mwanda Waka Yehova Umwene Bantu Bandi na Bulēme?”)

¹⁴ Vuluka’mba Yehova kakumonengapo mukumwena ino ntanda. (Tanga 1 Samwele 16:7.) Kakumonengapo na mvubu pa mwanda wa mumwekelo obe, ludingo lodi nalo mu būmi, nansha masomo ofundile. (Isa. 55:​8, 9) Nanshi longa bukomo bwa kwimona mukumwena Yehova pa kyaba kya mukumwena ino ntanda. Tanga nsekununi ya mu Bible ilombola Yehova mwaādi ulongela bantu bintu bene bādi bemona bu bampikwa mvubu, pamo bwa Ediya, Naomi, ne Hana. Kadi ubwanya kulemba myanda yowimwenine mine ikukulupija’mba Yehova ukusenswe bya binebine kadi ukumwene na mvubu. Kadi ubwanya kubandaula ne myanda ya mu mabuku etu īsambila pa kwityepelwa.c

15. Mwanda waka Yehova wāmwene Danyele bu “muntu mulēme bininge”? (Danyele 9:23)

¹⁵ Vuluka’mba kikōkeji kyobe kikulengejanga wikale mulēme ku meso a Yehova. Kitatyi kimo, padi mupolofeto Danyele paādi na myaka 90 ne musubu ‘wapungile bininge’ ne kutyumukwa mutyima. (Dan. 9:​20, 21) Le Yehova wāmukankamikile namani? Wāmutumīne mwikeulu Ngabudyele mwanda wa kuvuluja Danyele amba i “muntu mulēme bininge” ne amba Yehova wivwananga milombelo yandi. (Tanga Danyele 9:23.) Le i bika byāmulengeje ekale mulēme kudi Leza? Kutentekela pa ngikadila yandi mivule, i mwanda Danyele wādi usenswe boloke kadi wādi mukōkele. (Ezk. 14:14) Yehova wālamine ino nsekununi mu Kinenwa kyandi mwanda wa kwitusenga. (Loma 15:4) Kadi Yehova utejanga milombelo yobe ne kukumona na mvubu mwanda usenswe kulonga byobya byoloke kadi umwingidilanga na kikōkeji.—Mika 6:​8, kunshi kwa dyani; Bah. 6:10.

16. Le i bika bibwanya kukukwasha umone Yehova bu Tata wa buswe?

¹⁶ Mona Yehova bu Tata ukusenswe. Usakanga kukukwasha, pa kyaba kya kumona bilubo bidi modi. (Ñim. 130:3; Mat. 7:11; Luka 12:​6, 7) Kulangulukila pa uno mwanda i kukwashe bantu bavule bemona bu ba mvubu mityetye. Tubandaulei’ko kimfwa kya kaka Michelle wa mu Eshipanye, mwine wadi wimona bu mwelwe kadi wampikwa mvubu pa mwanda wa wandi mulume wadi umunena binenwa bisansa mu bula bwa myaka. Unena’mba, “Kitatyi kyonso kyonemona bu wa bule noñanga bukomo bwa kumona Yehova unkwete mu makasa andi unombola buswe ne kunkinga.” (Ñim. 28:9) Kaka Lauren wa mu Afrika wa Kunshi unena’mba, “Shi Yehova waunkokēle kwadi na kanye ne buswe, kadi i mulame kipwano kyetu mu ino myaka yonso’i, ne kadi uñingidijanga mu kufundija bantu bakwabo, nanshi umwene na mvubu ne na bulēme.”—Hos. 11:4.

17. Le i bika bibwanya kukukwasha ukulupile amba wi mwitabijibwe na Yehova? (Ñimbo ya Mitōto 5:12) (Tala ne kifwatulo.)

¹⁷ Kulupila’mba wi mwitabijibwe na Yehova. (Tanga Ñimbo ya Mitōto 5:12.) Davida wānenene amba Yehova witabije bantu boloke kadi wibakiñanga pamo bwa “ngabo mikatampe.” Kuyuka’mba Yehova i mukwitabije kadi ukukwatakanyanga, kukakukinga ku milangwe ya kwimona bu wa bule. Le ubwanya kuyuka namani amba wi mwitabijibwe na Yehova? Monka motwekimwena, Yehova ukukulupija uno muswelo kupityila ku Kinenwa kyandi. Kadi wingidijanga bakulumpe, balunda ba pabwipi, ne bantu bakwabo mwanda wa kukuvuluja’mba wi mulēme ku meso andi. Le ukalonga namani shi muntu wa kukankamika?

18. Mwanda waka ufwaninwe kwitabija binenwa bya kukufwija’ko?

¹⁸ Kokapela binenwa bitamba ku mutyima bya kufwija’ko bya boba bakuyukile senene kadi bakusenswe. Vuluka’mba Yehova ubwanya kwibengidija mwanda wa bakukwashe ukulupile amba wi mwitabijibwe nandi. Kaka Michelle watelwanga monka unena’mba: “Nefundanga bityebitye kwitabija mu mutyima wami binenwa biyampe binsapwilanga bantu bakwabo. Shako ke bipelapo, inoko ndyukile amba byo binsakila Yehova kulonga.” Kaka Michelle i mumwene mu bukomo bulonga bakulumpe ba buswe. Pano i pania kadi wingilanga bu mwingidi wa kwilanga ku Betele.

19. Mwanda waka ubwanya kukulupila’mba wi mulēme ku meso a Leza?

¹⁹ Yesu wituvuluja’mba twi balēme bininge kudi Tata wetu wa mūlu. (Luka 12:24) Nanshi tukulupilei amba Yehova witumwene na bulēme. Ketufwaninwepo kwilwa nansha dimo uno mwanda! Kadi tulongei byonso byotubwanya mwanda wa kukwasha bantu bakwabo bemone amba, i balēme ku meso a Leza!