BIPANGUJO BYA BANKASAMPE
Le Bible Ubwanya Kunkwasha Namani?—Kipindi 1: Jingulula Bidi mu Bible Obe
“Natompele kutanga Bible, inoko natyumukwa mutyima mwanda i mulampe!”—Briana, wa myaka 15.
Le nobe ye mwiivwanina? Kino kishinte kibwanya kukukwasha!
Mwanda waka Kutanga Bible?
Le mulangwe’tu wa kutanga Bible ukukōkejanga kala? Shi i amo, bibwanya kwivwanikwa. Ubwanya kulanga’mba Bible i dibuku dya mapaje tununu ne tununu, dya masomo matyematye kadi mwampikwa bifwatulo—i dipitwe na televijo ne mavideo!
Ino tompa kufwatakanya: Langa’po bidi ubasokola kibīko kikatampe kya kala kya byabulēme. Mwene ukakimba kuyuka bidi’mo?
Bible udi pamo bwa kino kibīko kya byabulēme. Mudi madingi mavule a tunangu abwanya kukukwasha:
Ukwate butyibi buyampe;
Wiivwane na bambutwile;
Usokole balunda;
Ulwe na kuzumbija mutyima.
Lelo dino dibuku dya kala dibwanya kwikala namani dya kamweno kodi dyalelo? I mwanda “Kisonekwa kyonso i kisonekejibwe na mushipiditu wa Leza.” (2 Temote 3:16) Kino kishintulula’mba madingi adi mu Bible atambanga kudi Muntu ukulupilwa.
Bible i kibīko kya byabulēme mudi madingi a tunangu
I muswelo’ka omfwaninwe kutanga Bible?
Muswelo umo bidi i kutanga’ye tamba ku ngalwilo kutūla ne ku mfulo. Kino kikakukwasha wivwanije musapu mukatampe udi mu Bible. Kudi miswelo mivule ya kutanga Bible. Tubandaulei’ko bimfwa bibidi:
Ubwanya kutanga mikanda 66 ya mu Bible na kwiilonda moilondela, kutamba ku Ngalwilo kutūla ku Kusokwelwa.
Ubwanya kutanga Bible na kulonda binkumenkume mobilondela mungya kitatyi.
Byobwanya kulonga: Mbwejo A7 ya Bwalamuni bwa Ntanda Mipya ilombola binkumenkume bikatampe bya mu būmi bwa Yesu pano pa ntanda, mobilondela mungya kitatyi kyobyālongekele.
Muswelo wa bubidi wa kutanga Bible i kutonga nsekununi ikwatañene na kikoleja kyowikonda nakyo. Kimfwa:
Lelo ukimbanga kusokola balunda bakulupilwa? Tanga nsekununi ya ba Yonafane ne Davida. (1 Samwele, shapita 18-20) Kupwa ingidija fishi “Comment se faire des amis fidèles” mwanda wa kuboila ñeni ya kamweno ku ino nsekununi.
Lelo ukimbanga mwa kukomenena biyampe matompo? Tanga nsekununi ya mwākomenene Yosefa ditompo. (Ngalwilo, shapita 39) Kupwa ingidija fishi “Comment résister à la tentation . . . JOSEPH—1re PARTIE” ne “Accusé à tort ! JOSEPH—2e PARTIE” mwanda wa kuboila ñeni ya kamweno ku ino nsekununi.
Lelo ukimbanga kuyuka muswelo ubwanya kukukwasha milombelo? Tanga myanda ya Nehemia (Nehemia, shapita 2) Kupwa ingidija fishi “Dieu a répondu à sa prière” mwanda wa kuboila ñeni ya kamweno ku ino nsekununi.
Byobwanya kulonga: Potanga Bible, longa bukomo bwa kwikala mu kifuko kya talala, mwa kutela mutyima ku byotanga.
Muswelo wa busatu wa kutanga Bible i kutonga nsekununi kampanda, nansha lwimbo lwa mitōto, kwiitanga, kupwa kulangulukila pa muswelo obwanya kwiingidija mu ngikadilo yodi’mo. Shi ubapu kutanga, wiipangule bipangujo pamo bwa bino:
Mwanda waka Yehova wasakile ino myanda ilembwe mu Bible?
Le imfundija bika pa bumuntu bwa Yehova nansha pa muswelo wandi wa kulonga bintu?
Le mbwanya kwingidija’yo namani mu bwami būmi?
Byobwanya kulonga: Ingidija Bible Bwalamuni bwa Ntanda Mipya mwanda wa kutala mavideo, tulata, ne myanda mikwabo ikakukwasha umwene bininge mu butangi bobe bwa Bible.