Kifundwa 13

I Muswelo’ka Okokeja Kusokola Mutōtelo Wabine?

Le mitōtelo yonso isangajanga Leza’ni nansha i umo kete? (1)

Mwanda waka kudi mitōtelo mivulevule ītela bu ya bwine Kidishitu? (2)

I muswelo’ka okokeja kuyuka bene Kidishitu babine? (3-7)

1. Yesu wāshilwile mutōtelo wabine umo kete wa bwine Kidishitu. O mwanda dyalelo kufwaninwe kwikala kibumbo nansha kitango kimo kete kya batōtyi babine ba Yehova Leza. (Yoano 4:23, 24; Efisesa 4:4, 5) Bible ufundija amba bantu batyetye’tu kete bo badi mu kashinda katyetye katwala ku būmi.​—Mateo 7:13, 14.

2. Bible wālaile amba pa kupwa kufwa kwa batumibwa, mu kipwilo kya bwine Kidishitu mukekuja bityebitye mfundijo ne bilongwa byakubulwa kukwatañana na mwiendelejo wa bwine Kidishitu. Bantu bakabombola bene Leza bavule pa kyaba kya kwibakokela kudi Kidishitu. (Mateo 7:15, 21-23; Bilongwa 20:29, 30) O mwanda kudi mitōtelo mivule mishileshile ītela bu ya bwine Kidishitu. I muswelo’ka otukokeja kuyuka bene Kidishitu babine?

3. Kayukeno kabajinji ka kuyukila’po bene Kidishitu babine i kano, badi na buswe bwabinebine umbukata mwabo. (Yoano 13:34, 35) Kebafundijibwepo kwilangila amba abo bo badi na mvubu kutabuka bantu ba misaka ingi nansha ba lukoba lwa musombelo ungi. Kadi kebafundijibwepo kushikwa bantu ba matanda angi. (Bilongwa 10:34, 35) O mwanda kebekujangapo mu bya mavita. Bene Kidishitu babine bemwene abo bene na bene bu bana na bana.​—1 Yoano 4:20, 21.

4. Kayukeno kakwabo ka kuyukila’po mutōtelo wabine i kano, bantu badi’mo bakwete Bible na bulēme bukatampe mpata. Bamwitabije bu Kinenwa kya Leza kadi bakulupile byanena. (Yoano 17:17; 2 Temote 3:16, 17) Bakwete Kinenwa kya Leza na bulēme amba kyo kidi na mvubu mikatampe kutabuka milangwe nansha bisela bya bantu. (Mateo 15:1-3, 7-9) Balonga buninge bwa kulonda binena Bible mu būmi bwabo bwa difuku ne difuku. Ko kunena amba kebasapulangapo bingi, byobalonga bingi.​—Tetusa 1:15, 16.

5. Kadi mutōtelo wabine ufwaninwe kulēmeka dijina dya Leza. (Mateo 6:9) Yesu wāyukenye dijina dya Leza, Yehova, ku bantu bakwabo. Ne bene Kidishitu babine nabo bafwaninwe kulongela monka. (Yoano 17:6, 26; Loma 10:13, 14) I bāni mu kyenu kibundi basapwilanga bakwabo dijina dya Leza?

6. Bene Kidishitu babine bafwaninwe kusapula myanda ya Bulopwe bwa Leza. Yesu wāsapwile’yo. Wādi wisambila nyeke pa Bulopwe. (Luka 8:1) Wāsoñanya ne bandi bana ba bwanga kusapula uno musapu pano pa ntanda ponso. (Mateo 24:14; 28:19, 20) Bene Kidishitu babine bakulupile amba enka Bulopwe bwa Leza kete bo abo bukaleta ndoe yabine ne mutyima-ntenke pano pa ntanda.​—Mitōto 146:3-5.

7. Bana ba bwanga ba Yesu kebafwaninwepo kwikuja mu bya ino ntanda. (Yoano 17:16) Kebekujangapo mu myanda ya mapolitike a ino ntanda nansha mu tuvutakanya tukwabo twa mu bibundi. Bepukanga mwiendelejo umbi, milongelo mibi ne mikadilo imbi isambakene ntanda yonso. (Yakoba 1:27; 4:4) Lelo ukokeja kujingulula mu kyenu kibundi mutōtelo udi na tuno tuyukeno twa bwine Kidishitu bwabine?

[Bifwatulo pa paje 26, 27]

Bene Kidishitu babine beswele abo bene na bene, balēmekele Bible, kadi basapulanga myanda ya Bulopwe bwa Leza