KIFUNDWA 14

Kulupwila Myanda Mikatampe Patōka

Bahebelu 8:1

MU KĪPI: Kwasha bevwaniki bobe balonde mwisambo obe, lombola patōkelela mukwatañenine myanda mikatampe na kitungo kyobe ne na mutwe wa mwanda.

Ikala na kitungo: Bandaula shi mwisambo obe udi na kitungo kya kulombola bevwaniki bobe myanda, kwibanekenya, nansha kwibakankamika, kupwa wiuvungulule mungya kino kitungo. Yuka biyampe amba myanda yonso mikatampe ikakukwasha ufikile pa kitungo kyobe.

Wiipangule amba: ‘Le bevwaniki bami babwanya kwipangula bipangujo’ka nansha kuleta bijika’ka pa uno mwanda? Le babwanya kwipangula bino bipangujo namani, ne shi nalondolola bakepangula kipangujo’ka kikwabo?’ Penepa teakanya myanda mungya bino’bi amba bevwaniki bobe bakulonde, bevwanije myanda ne kwiitabija.
Komeneja mutwe wa mwanda wa mwisambo obe. Kumuna ku mutwe wa mwanda mu bula bwa mwisambo obe na kupituluka mu bishima bikatampe bidi mu mutwe wa mwanda nansha na kwingidija bishima bikwabo bidi na buluji bumo.
Tōkeja myanda mikatampe ne kwiipēleja. Tonga’nka myanda mikatampe ikwatañene na mutwe wa mwanda kadi yobwanya kufundija senene mu kitatyi kikupelwe. Tyepeja buvule bwa myanda mikatampe, lombola patōka mwanda mukatampe onso, witūje pa kusambukila ku mukwabo, enda bityebitye ku mwanda mukatampe ulonda’ko.

Ubwanya kutela myanda mikatampe mu ntwelelo yobe mwanda wa kukwasha bevwaniki bakulonde nansha kwiipituluka mu mvuyo yobe mwanda wa kwibakwasha beivuluke.